Billegt að kenna útlendingum um "hernaðinn gegn landinu."

"Hernaðurinn gegn landinu," frægasta blaðagrein Halldórs Laxness, sem birtist í Morgunblaðinu 1970, fjallaði um það sem við Íslendingar sjálfir aðhöfðumst þá í umgengni við náttúru landsins, einkum varðandi eyðingu náttúruverðmæta vegna virkjana.

Laxness óraði þó ekki fyrir sumu af því sem við höfum gert síðustu ár og enn síður fyrir því sem ætlunin er að gera með því að tvöfalda ósköpin fyrir árið 2025.

Ferðamenn voru svo fáir 1970 að þeir voru ekki inni í myndinni.

Nú er svo að sjá í skoðanakönnunum að erlendir ferðamenn séu mesta váin.

En þótt þeir séu komnir yfir milljón árlega eru þeir þó margfalt færri en á sumum sambærilegum svæðum erlendis þar sem þeir komast ekkert upp með að vera "slæmir fyrir náttúru." 

Þrjár milljónir koma árlega í hinn 9000 ferkílómetra Yellowstone-þjóðgarð í Bandaríkjunum án þess að vera "slæmir fyrir náttúruna."  Flatarmál Íslands er 11 sinnum stærra. 

Það stefnir í 400 milljarða gjaldeyrisuppgrip okkar vegna erlendra ferðamanna á ári, en 0,3% af því fer til að byggja upp aðstöðu fyrir þá og verja náttúruna. 

"Þjóðargjöfin" 1974 til að sporna við jarðvegs- og gróðureyðingu hvarf á tíu árum og hefur ekki sést síðan. 

Við Íslendingar höfum að mestu reynst einfærir um "hernaðinn gegn landinu" en virðumst einblína á vonda útlendinga sem blóraböggla. 

Góðir fyrir efnahag, slæmir fyrir náttúru

Athugasemdir

[Hábeinn (IP-tala skráð) 13.8.2015 kl. 11:38]

Í frétt segir "Af þeim sem tóku af­stöðu töldu 51,8% að er­lend­ir ferðamenn hafi haft nei­kvæð áhrif á nátt­úru Íslands" Þetta túlkar Ómar Ragnarsson sem "Nú er svo að sjá í skoðanakönnunum að erlendir ferðamenn séu mesta váin" Hvergi var spurt hver væri "mesta váin" og Ómar að verða þekktur fyrir að umorða hlutina þannig að merkingin haldist ekki.

[Þorsteinn Briem, 13.8.2015 kl. 13:14]

Ísland er eitt strjálbýlasta land í heimi og er þar í 235. sæti.

Röð landa eftir þéttleika byggðar

Hér á Íslandi dvelja um 1,3 milljónir erlendra ferðamanna á þessu ári, 2015.

Hver erlendur ferðamaður dvelur hér á Íslandi í eina viku og því eru hér að meðaltali nú í ár um 25 þúsund erlendir ferðamenn á degi hverjum allt árið á öllu landinu.

Um níu af hverjum tíu Íslendingum ferðast hér innanlands á ári hverju og gista að meðaltali tvær vikur á þessum ferðalögum.

Að meðaltali eru því um ellefu þúsund Íslendingar á ferðalögum hér innanlands á degi hverjum, einungis um tvisvar sinnum færri en erlendir ferðamenn.

[Þorsteinn Briem, 13.8.2015 kl. 13:26]

Síðastliðinn mánudag:

Langflestir jákvæðir gagnvart erlendum ferðamönnum hér á Íslandi

[Ómar Ragnarsson, 13.8.2015 kl. 15:09]

Jæja, Hábeinn. Það er sem sagt ekki vá að "erlendir ferðamenn hafi neikvæð áhrif á náttúru Íslands."  Þá veit maður það. Í góðu lagi að erlendir ferðamenn fari illa með hana. Engin vá fólgin í því. 

[Hábeinn (IP-tala skráð) 13.8.2015 kl. 15:34]

Það má vel vera að erlendir ferðamenn séu einhver vá. En um það er ekki spurt í skoðanakönnuninni og ekki nefnt í fréttinni. Þannig að það að "erlendir ferðamenn séu mesta váin" sé niðurstaða skoðanakönnunarinnar er eitthvað sem varð til í hugarheimi þínum.

Og það að þér sé bent á þessa rangfærslu þýðir ekki að það sé í góðu lagi að erlendir ferðamenn fari illa með náttúru Íslands eins og þú túlkar athugasemdina. En lesskilningur þinn virðist vera eitthvað bjagaður þessa dagana.

[Jón Logi (IP-tala skráð) 13.8.2015 kl. 15:46]

Sem vanur lóðs (leiðsögumaður) verð ég að stíga hér inn og gefa athugasemd.
1:Ég merki það að hver útlendingur særir náttúruna afar lítið og umgengst hana yfirleitt betur heldur en venjulegur Íslendingur.
2:Það er alltaf misjafn sauður í mörgu fé.

[ls (IP-tala skráð) 13.8.2015 kl. 15:47]

Erfitt að lesa annað úr fréttinni en að kannað hafi verið hvað landsmenn teldu jákvætt og neikvætt við ferðamannabransann.

Býst við að ef samskonar spurninga yrði spurt varðandi stóriðju, yrðu svörin ekki svo ólík; neikvæð áhrif á náttúruna en væntanlega sæu margir jákvæð áhrif á atvinnu svo dæmi sé tekið.

[Ómar Ragnarsson, 13.8.2015 kl. 18:46]

Skilning þinn á þörfinni fyrir að lesa virðist skorta, Hábeinn, ef marka má mótbárur þínar við því að talsmenn álvera á Íslandi hafi skrifað greinar og talað við fjölmiðla um bjarta framtíð áliðnaðarins.

Nú hef ég nafngreint þá en það virðist engu breyta, enda sérðu fyrir því að engin leið sé fyrir nokkurn mann að vita hver þú ert.  

[Hábeinn (IP-tala skráð) 13.8.2015 kl. 19:20]

Það var ekki ég sem þóttist vera með tilvitnanirnar á hreinu og geta vitnað í þær.

"Talsmenn álvera svo sem Halldór Blöndal hafa líka skrifað.." Hjá hvaða álveri starfar Halldór Blöndal sem talsmaður og hvað hefur hann sagt síðustu vikurnar?

"Það hefur ekki vantað hástemmd lýsingarorð hjá talsmönnum álveranna undanfarnar vikur um það hve bjart væri framundan og komandi uppsveifla í áliðnaðinum.    Þeir hafa líka andmælt harðlega öllum efasemdum um dýrð áltrúarinnar."  Fullyrðingar þínar um yfirlýsingar manna er oft erfitt að finna annarstaðar en hjá þér. Tilvitnanir þínar virðast æði oft vera hreinn tilbúningur. Og getir þú ekki komið með tilvitnanirnar orðrétt þá er lítið að marka það sem þú segir.