"Betri" veðurspá er ekki endilega réttari spá.

Það hefur tvívegis gerst hér á landi að fararstjórar leituðu fanga hjá veðurstofum í nágrannalöndum okkar og fundu "betri" veðurspá þar hvað snerti veður á þeim slóðum, sem þeir ætluðu með ferðamannahópa sína, en íslenska veðurstofan spáði.

Í bæði skiptin lentu hóparnir í miklum hremmingum og mátti þakka fyrir að ekki urðu banaslys.

Augljóst var þegar staðbundnar aðstæður voru skoðaðar fyrirfram, að íslenska spáin var rétt en ekki þær spár sem fararstjórarnir notuðu.

Í ýmsum tilfellum ber veðurspám ekki saman, jafnvel ekki í grundvallaratriðum, og þá getur það stundum verið heppni á hvað hver veðurstofa veðjar.

Í slíkum tilfellum getur það verið einhver erlenda veðurstofan sem hefur vinninginn.

En í tilfellunum tveimur, sem nefnd eru hér að ofan, skipti miklu máli að veðurfræðingur sem gerði spá væri kunnugur staðbundnum aðstæðum sem geta haft áhrif á veður á einstökum svæðum og stöðum.

Þar reyndist íslenska veðurstofan hafa vinninginn.

Það eru góðar fréttir að íslenska veðurstofan sé með endurbætur í framsetningu í undirbúningi, svo góðar, að veðurspárnar verði betur framsettar en fyrr og því "betri" í þeim skilningi.  

Hvers vegna er norska veðurspáin betri?

Athugasemdir

[Gunnar Heiðarsson, 15.11.2015 kl. 07:53]

Það var einmitt á þennan veg sem ég tók fyrirsögn fréttarinnar, að norska veðurspáin væri réttari. Ekki að verið væri að tala um framsetningu veðurfrétta á veraldarvefnum. Enda hélt ég að gæði veðurspár lægi í áreiðanleik þeirra, ekki hversu auðvelt væri að lesa þær.

Sjálfur er ég með veðurhræddari mönnum. Því tek ég fegins hendi hverri þeirri spá sem hægt er að komast yfir, hvort hún er norsk, íslensk, eða hvaðan sem hún kemur. Er með a.m.k. þrjár tengingar við veðurspár í símanum, m.a. yr.no.

Það er ljóst að oftar en ekki eru þessar spár mismunandi, þó munurinn sé kannski ekki mikill á skammtímaspám. Það er því ómetanlegt fyrir veðurhræddan mann að geta valið verstu spánna hverju sinni og því talið sig nokkuð öruggann. Stundum hefur verið hlegið að manni, en það gerir lítið til.

Það sem norska spáin hefur umfram flestar aðrar er langtímaspáin. En að spá veðri allt að tíu daga fram í tímann er einungis hægt gegnum kristalkúlu. Engin tækni er enn til sem gerir slíkar spár áreiðanlegar. Þetta sannast líka á langtímaspá norðmanna, nánast tilviljun ein sem ræður því hvort hún sé áreiðanleg eða ekki.

Þó ég líti reglulega á spánna á yr.no finnst mér einhvern veginn eðlilegast að treysta mest á þær spár sem gerðar eru á hverjum stað fyrir sig, hér á íslandi á íslenskar veðurspár.

Það er hins vegar umhugsunarefni ef farið er að meta gæði veðurspáa eftir því hversu auðvelt er að lesa þær. Að áreiðanleikinn sé settur til hliðar.

[Jakob R.Möller (IP-tala skráð) 15.11.2015 kl. 14:42]

Hver voru þessi tvö tilvik með "of góðri" veðurspá og hvar birtust þær? Jakob

[Ómar Ragnarsson, 16.11.2015 kl. 00:28]

Önnur var í ferðalagi með útlendinga upp á Langjökul fyrir um áratug og hin í ferðalagi með útlendinga frá Skálafellsjökli norður í Kverkfjöll fyrir rúmlega 15 árum. Mig minnir að önnur þessara erlendu veðurspáa sem buðu upp á betra veður en hin íslenska hafi verið frönsk.