Aldrei að breyta vinningsliði?

Úrslit í vináttulandsleikjum geta kannski skipt máli þegar FIFA raðar landsliðum á styrkleikalista, - ég veit ekki hvernig því er nákvæmlega háttað.

En héðan af mun það ekki skipta öllum máli í hvaða sæti á styrkleikalista landslið verða þegar kemur að því að hefja leik á EM næsta sumar, heldur einungis geta liðsins í vörn og sókn í viðkomandi meistaramótsleik.

Þá er gott að hafa notað undirbúningsmánuðina fyrir mótið til þess að skoða sem best alla möguleika á uppstillingu liðins þegar komið verður að ögurstundu, - ekki úrslit í einstaka vináttulandsleikjum meira en hálfu ári fyrr.

Benda má á, að heimsmeistarar Þjóðverja töpuðu fyrir Frökkum í vináttulandsleiknum sögulega þegar hryðjuverkaárásirnar voru gerðar í París. Engum dettir samt í hug að á EM segi þau úrslit neitt um það hvernig þýska liðið stendur sig þá.

Þegar litið er á markatölurnar í undankeppni EM sést að aðall íslenska liðsins í henni var duglegasta, best skipulagða og agaða vörn undankeppninnar, sem hélt markinu hreinu leik eftir leik, jafnvel gegn sterkum knattspyrnuþjóðum.

Stundum er sagt: "Never change a winning team!" og einnig sagt í íslensku máltæki að ekki eigi að skipta um hest í miðri á.

En íslenska landsliðið er ekki komið út í ána og vonandi er að þeir Lars og Heimir séu að gera rétt með því að nota vináttulandsleiki til þess að prófa mismunandi uppstillingar á liðinu og þreifa fyrir sér um mannabreytingar, án þess að missa sjónar á nauðsyn þess að þegar á hólminn verður komið á mótinu sjálfu næsta sumar, standi slípað, agað og reynslumikið lið inni á vellinum þegar þjóðsöngvarnir verða leiknir.

Draumabyrjun dugði ekki til gegn Slóvakíu

Athugasemdir

[ls (IP-tala skráð) 18.11.2015 kl. 09:55]

"og einnig sagt í íslensku máltæki að ekki eigi að skipta um hest í miðri á"

Ertu viss um að þetta sé íslenkst en ekki þýðing á amerískum málshætti?

Man ekki í svipinn eftir neinum íslenskum (þ.e.a.s. sem ég er nokk viss að sé íslenskt) málshætti sem lýsir þess háttar íhaldssemi, enda Íslendingar frekar þekktir fyrir að haga seglum eftir vindi og vera fljótir að.

Sem er náttúrlega eins og flestir aðrir eiginleikar, stundum kostur og stundum galli.

[ls (IP-tala skráð) 18.11.2015 kl. 09:57]

En burtséð frá rövli um málshætti er athyglisvert að sjá muninn á landsliðinu frá því að vináttuleikirnir unnust glæasilega en mótsleikirnir töpuðust...