Það eru til þúsundir miðbæja en bara ein íslensk náttúra.

Merkilegt má telja, að mönnum detti það í hug að farþegar skemmtiferðaskipa, sem staldra við í erlendri höfn, séu komnir í leit að verslunargötum.

Og detti það líka í hug, að með einhverju sérstöku átaki sé hægt að nánast þvinga þetta ferðafólk til að koma niður á Laugaveg til að versla.  

Það er nóg af verslunargötum í þúsundum erlendra borga.

Kannanir sýna að einstæð íslensk náttúra er aðalatriðið sem útlendingar nefna oftast sem ástæðu þess að þeir ákváðu að fara til Íslands.

Ég vann eitt sinn á skemmtiferðaskipi fyrir tæpri hálfri öld, sem sigldi um Miðjarðarhafið.

Boðið var upp á 2-3 mismunandi ferðir í landi í hverri höfn og langoftast valdi fólkið einhverja ferðina en var ekki að slæpast í búðarápi nálægt höfnunum.

Í Sevilla var farið á nautaat, í Cataníu á Sikiley var Eyra Díónesíusar, frá Napoli var dagsferð til Pompei o. s. frv.  

 

Skila sér í litlum mæli í miðborgina

Athugasemdir

[Sumarliði Einar Daðason, 30.11.2015 kl. 01:09]

Hér á Akureyri höfðum við árið 2015:
Passengers: 82.891
Crew: 31.869
Total: 114.760

Þegar skemmtiferðaskip komu þá varð bærinn stappaður af ferðafólki. Fólk á skemmtiferðaskipum er ekkert að kaupa sér neysluvarning eins og margir íslendingar gera þegar þeir fara til útlanda. Þetta er fólk sem er efnað eða búið að spara fyrir ferðinni í mörg ár og er að sjúga í sig íslenska menningu, náttúru og njóta lífsins. Það eru helst þjónustuaðilar, minjagripaverslanir og veitingahús sem njóta góðs af þessu, fyrir utan auðvita rútufyrirtæki og leigubíla.
Það má ekki gleyma því að hafnargjöldin eru drjúg fyrir fyrir svona skip. Ég er viss um að ef það væri komið að rafmagnstengingu á helstu hafnir sem þjónustu þessi skip, þá væri hægt að selja þeim rafmagn líka. Flest nýju skipin er búin slíkum búnaði en þetta skortir á höfnum víðs vegar um heim.

[Sumarliði Einar Daðason, 30.11.2015 kl. 01:15]

(Fyrirgefið feitletrunina í færslunni hér að ofan, ég sá hana ekki þegar ég skrifaði.)

Fyrir árið 2016 er þegar búið að skrá eftirfarandi:

Passengers: 96.441
Crew: 35.751
Total: 132.192

Þannig að það er stöðug aukning. Þessi skip eru skráð svo langt fram í tímann upp á mínútu að það er lýginni líkast.

[Þorkell Guðbrands (IP-tala skráð) 30.11.2015 kl. 04:40]

Ómar spot on eins og venjulega. Það er líka hægt að spá í hvernig komur skemmtiferðaskipa myndu hafa áhrif á ýmsa aðra hluti ef hægt væri að láta þau leggjast að bryggju niður í gömlu höfninni. Jú, það yrði að sumu leyti eitthvað svipað og á Akureyri, margir væru að snöfla í "lundabúðum" en hvaða áhrif hefði þetta á umferð og umferðarflæði í miðborginni, þegar farið væri með einhver þúsund af fólki úr hverju skipi í rútuferð austur að Geysi o.s.frv.? Það eru ýmsar hliðar á þessu.

[Elín Sigurðardóttir (IP-tala skráð) 30.11.2015 kl. 09:41]

Já þetta er merkilegt.  Eru þetta ekki aðallega eldri borgarar sem gefa meira fyrir upplifun en drasl?

[Ómar Ragnarsson, 30.11.2015 kl. 09:43]

Þess má geta að á ráðstefnu árið 2001 um möguleika íslenskrar eldfjallanáttúru til að draga að sér ferðamenn var því sjónarmiði haldið hart fram af Austfirðingi einum að menn væru á villigötum í því efni, - það væri fyrst og fremst Hallormsstaðaskógur sem væri lang merkilegasta fyrirbærið þar eystra og þangað ætti að beina erlendum ferðamönnum.

[Sumarliði Einar Daðason, 30.11.2015 kl. 11:53]

Fyrir þá sem vilja skoða þetta nánar með skemmtiferðaskipin þá er hér kerfi sem ég bjó til fyrir Hafnasamlag Norðurlands og Faxaflóahafnir:

http://www.port.is/isl/index.php?pid=84http://www.faxafloahafnir.is/cruiseships/

Þar er hægt að sjá hve mikið kemur hvern dag og hvar skipin eru stödd hverju sinni. Þetta á að nýtast öllum sem standa í þessum ferðaþjónustugeira, sem og opinberum aðilum.

[Sumarliði Einar Daðason, 30.11.2015 kl. 11:55]

http://www.port.is/isl/index.php?pid=84

http://www.faxafloahafnir.is/cruiseships/

(Tilraun tvö til þess að láta linkana virka í þessu blog-kerfi )

[Sumarliði Einar Daðason, 1.12.2015 kl. 19:55]

Áhugaverður þáttur í Kastljósi áðan (1.12.2015) um rafmagnstengingar í höfnum. Ímyndið ykkur að geta tengt stórt skemmtiferðaskip á meðan það er stopp við bryggjuna. Það er eins og að selja rafmagn til heils bæjarfélags á meðan því stendur.