Sérkennilegt deiluefni í 60 ár.

Bráðum eru 40 ár síðan umræða um notkun öryggistækja á borð við belti og hjálma hófst hér á landi og liðin eru 60 ár síðan hún hófst erlendis.

Merkilegt er að upplifa ennþá andstöðu margra, þeirra á meðal góðs, gegns og vel menntaðs fólks, gegn einstökum atriðum í þessum málum.

Ég er jafn undrandi nú vegna umræðna um belti og hjálma og ég var vegna umræðnanna fyrir 40 árum.

Í öllum tilfellum snerist umræðan strax um það að viðkomandi öryggistæki væru til skaða og tjóns en ekki gagns.

Og hún snýst enn um þetta, árið 2016.

Í gær átti ég samtal við bæklunarlækni sem hefur langa reynslu af meðhöndlun slasaðra og í ljósi reynslu sinnar lýsti yfir svipaðri undrun sinni og ég varðandi tregðuna til þess að gera notkun belta og hjálma almenna.

Tölur frá rannsóknarnefnd samgönguslysa benda til þess að á þeim 40 árum, sem liðin eru síðan umræðan um bílbeltin hófst, hafi um 200 Íslendingar hafi látist vegna þess að bílbelti voru ekki notuð. Hefðu annars lifað.

Óþörf örkuml gætu verið á annað þúsund hið minnsta.

Eftir að farið var að nota hlífðarhjálma á fiskiskipum hafa alvarleg höfuðmeiðsl nær horfið.

Ég hef þegar heyrt dæmi um gagnsemi hjálma á reiðhjólum og vélhjólum.

Myndin hér að ofan er tekin ofan í reiðhjólahjálm á hvolfi, sem braut framrúðu í bíl í slysi um daginn.

Í umræðu um hlífðarhjálma um daginn var því haldið blákalt fram að hjálmurinn hefði ekkert gagn gert í þessu slysi og að þegar allt dæmið væri reiknað, yllu hjálmarnir meira líkamstjóni og fjártjóni en sem næmi gagnsemi þeirra.

Tvö fjaðrandi innlegg eru í hjálminum, hið innra um 1 sentimetri á þykkt og mjúkt, en hið ytra er furðu hart og tæplega 2 sentimetrar á þykkt.

Hið ytra hlífðarefni verður að vera svona hart vegna þess að högg, sem svona hjálmar verða stundum fyrir, eru mun harðari en fólk gerir sér grein fyrir.

Á þessum hjálmi hef ég límt plástur yfir nafn framleiðandans.

Það er gert með tilliti til umræðunnar, sem oft er á því plani að hún er leidd eingöngu að auglýsingagildi hjálmsins og tekna framleiðandans af því að framleiða og selja hann, - eða að illa fengnum hugsanlegum tekjum þess, sem auglýsir vörumerkið með því að sýna mynd af hjálminum.      

Dýrt að spenna ekki beltin í rútum

Athugasemdir

[Hábeinn (IP-tala skráð) 29.4.2016 kl. 12:40]

Boð og bönn verða ætíð deiluefni. Hvað á að ganga langt í því að hefta frelsi fólks til að skaða sig? Eigum við að lögfesta mannbrodda? Banna hælaskó? Á að setja of þunga í fangelsi þar til kjörþyngd er náð? Getur löggjafinn skyldað þig til að nota sólarvörn? Bannað þér að vera illa klæddum í kulda?

[Ómar Ragnarsson, 30.4.2016 kl. 00:21]

Allt það sem þú nefnir hér, er ekki í umræðunni, því að engar tillögur hafa komið fram um það sem þú nefnir. Þessi umræða snýst um öryggisbelti í bílum og flugvélum og hjálma á hjólum.

[Gunnar Ottosson (IP-tala skráð) 30.4.2016 kl. 10:21]

Þegar ég keyrði hópferðarbílum í Svíþjóð á 9 áratug voru lög um notkun á öryggisbeltum í hópferðabílum þegar í notkun. Sem mér finnst vera gott mál, því náttúrulögmálin gilda einnig í rútum.