"Fíflagangurinn" hér um árið.

,Fyrir tæpum sjö áratugum viðraði Jóhannes Kjarval það í blaðaskrifum að hætta mætti hvalveiðum og skoða hvalina í staðinn.

Eftir frétt af fyrsta hvalaskoðunarbátnum á Hornafirði fyrir aldarfjórðungi fékk ég orð í eyra fyrir svona fréttaflutning um fíflagang, sem byggðist á "geimórum."

Þetta voru dæmi um það, sem menn hneyksluðust yfir eða hentu dár að varðandi "fíflagang".

Hallór Laxness setit fram þá sýn 1970 að sú tíð myndi koma að mokað yrði ofan í allar þær þúsundir kílómetra af skurðum, sem þá var verið að grafa um allt land á kostnað skattgreiðenda.

Margir hentu gaman að þessum "fíflagangi" hjá skáldinu og nefndu sem dæmi um ruglið í umhverfis- og náttúruverndarfólki.

Ef myndin af forsetanum, umhverfisráðherrum og forstjóra Landgræðslu Íslands, sem nú birtist í fjölmiðlum, hefði verið sýnd jafnframt þessum orðum skáldsins hefði það verið talið sem merki um "óra" eða í besta falli sérlega einkennilegt skopskyn viðkomandi.  

Fyrir 14 árum flaug ég með Hrafn Gunnlaugsson út á land til myndatöku fyrir mynd hans "Ísland í öðru ljósi" og meðal þess sem við tókum myndir af, var af skurðgröfu að grafa nýja skurði í Skagafirði, en öðru jarðvinnslutæki að moka ofan í skurði á öðrum bæ þar skammt frá.

Ennþá fyndnari mynd af "fíflagangi."

Hófust handa við verkið á Bessastöðum

Athugasemdir

[Hábeinn (IP-tala skráð) 15.7.2016 kl. 22:30]

Var Halldór Laxness sérfróður um skurðgröft og þörfina fyrir skurði? Stundum þarf að grafa skurði og stundum að moka ofan í skurði. Og það mundi flokkast sem "fíflagangur" að grafa skurði þegar Þarf að moka ofan í skurði og moka ofan í skurði þegar þarf að grafa skurði. Að grafa skurði vegna þess að þess þarf og moka síðan ofan í skurði þegar þess þarf kallast ekki "fíflagangur", sama hver framtíðarsýn rithöfundar kann að vera.

Það er ástæða fyrir því að ekki var byggð flugstöð sem getur afgreitt 10.000.000 manns á ári og ekki settir nokkrir hvalskoðunarbátar í hverja höfn fyrir 70 árum síðan. Það hefði verið "fíflagangur".

Fyrir nokkrum áratugum var því einnig spáð að eftir árið 2000 mundum við aka um á svifbílum og rafmagnið kæmi þráðlaust frá gervihnöttum. Samt lögðum við vegi og rafleiðslur um allt land. Einhverjir hefðu kallað það "fíflagang" ef spáin hefði ræst.

Eins má segja að það sé "fíflagangur" að bæta ekki allt umhverfi og aðgengi að náttúruperlum þannig að gríðarleg umferð ferðamanna skemmi þær ekki. Jafnvel þó ferðamenn hætti að koma og einhverjir kalli þá framkvæmdirnar "fíflagang" engum til gagns.

[Ómar Ragnarsson, 17.7.2016 kl. 16:52]

Innihald pistils míns var einfalt ef einhver skyldi ekki hafa náð því: 

Ég er að segja frá því að á sínum tíma töldu flesir ummæli Laxness og Kjarvals algera vitleysu.  

[Már Elíson, 17.7.2016 kl. 22:10]

Ómar..#hábeinn" náði því aldrei....