Laumuspil og blekkingar.

Eitt sinn hitti ég að máli þingmann einn, sem var ákveðinn í að greiða atkvæði með Kárahnjúkavirkjun þegar það mál var á dagskrá.

Ég spurði hann hvort honum þætti það verjandi að sökkva 25 kílólmetra löngum og allt að 200 metra djúpum dal, að meirihluta grónu landi, með merkum náttúruverðmætum og stærsta fossinum á norðausturhálendinu og láta dalinn fyllast upp með drullu og auri aurburðarmestu jökulsár landsins. 

Ég benti honum á það, til samanburðar, að með Hvalárvirkjun vestur af Ófeigsfirði á Ströndum væri verið að tala um að virkja hreint vatn, þannig að hægt yrði að fjarlægja stíflur síðar og fá landið og fossana til baka. 

Honum hnykkti við og hann sagði: "Hvalárvirkjun! Nei, því myndi ég aldrei greiða atkvæði með."

Ég varð að sjálfsögðu hissa og spurði hann hvers vegna hann kæmist að svo furðulegri niðurstöðu. 

"Það er af því að ég hef komið á það svæði", svaraði hann. 

Um svipað leyti sat ég við hlið eins þingmanns á leið frá Egilsstöðum til Reykjavíkur og barst talið að fyrirætlunum um virkjanir á Torfajökulssvæðinu, sem þá komust á dagskrá. 

Hann kvaðst hlynntur nýtingu háhita en spurði samt hvar Torfajökull væri. 

Ég sagði honum það og bætti við að þarna væri líklega mesta jarðvarmaorka landsins, enn meiri en í Kerlingarfjöllum.  

"Þá er þetta líklega ágætasta fyrirætlun" sagði hann, en ég myndi ekki vilja leyfa virkjanir í Kerlingarfjöllum. 

"Af hverju ekki?" spurði ég. 

"Af því ég hef komið í Kerlingarfjöll," svaraði hann.

Fáfræði sú á upplýsingaöld, sem beitt hefur verið og ráðið hefur ríkjum í þessum málum hér á landi, er dapurleg.

Fyrir hundrað árum var ekki stundað jafn mikið laumuspil með eðli, áhrif og staðsetningu virkjana og nú er markvisst beitt.

Virkjun Urriðafoss í Þjórsá hét einfaldlega Urriðafossvirkjun.

Virkjun Gullfoss var ekki kölluð Brattholtsvirkjun. 

Með Holtavirkjun er ekki verið að virkja nein holt, heldur er verið að virkja Búðafoss í Þjórsá, sem myndin er af. 

Sem betur fer stefnir í það að þrír af tólf stórfossum ofarlega í Þjórsá verði ekki lemstraðir meira en orðið er, en á meðan svonefnd Kvíslaveita var gerð fyrir ofan þá var því vandlega leynt, að með því að taka allt að 40% af vatnsmagni árinnar og veita því í burtu, var unnið skemmdarverk á fossinum Dynk, sem er magnaðasti stórfoss landsins, þegar hann rennur með fullu vatnsmagni.

Í 20 ár hefur svonefnd Norðlingaölduveita verið á dagskrá, en í raun er ekki verið að virkja neina öldu, heldur Þjórsárfossana þrjá.

Þegar áformin um Norðlingaölduveitu hikstuðu, breytti Landsvirkjun lítillega um útfærslu og réttlætti með henni þá nafnbreytingu að virkjunin héti Kjalölduveita!

Það yrði langur, langur lestur að nefna öll þau atriði, sem reynt er með laumuspili og oft blekkingum að halda frá fólki þegar virkjanir eru annars vegar.

Hvað vita til dæmis margir hvar Austurengjavirkjun er?

Ef fólk á förnum vegi væri spurt hygg ég að varla nokkur maður myndi vita það.

En í raun ætti virkjunin að heita Krýsuvíkurvirkjun og þá myndu flestir vita hvar hún væri.   

En það má að sjálfsögðu helst ekki vitnast, því að þá kynnu að renna tvær grímur á marga. 

Fingraför í náttúru

Athugasemdir

[Þorsteinn Briem, 8.9.2016 kl. 01:39]

Landsvirkjun með laumuspil,
lyginn er þar Hörður,
ef hann væri ekki til,
annar kæmi mörður.

[Sumarliði Einar Daðason, 8.9.2016 kl. 06:45]

Gott að þú skulir benda á þetta. Ég held stundum að þeir í stjórn hjá Landsvirkjun og alþingismenn sem bakka þá upp séu ekki endilega að hugsa um land og þjóð. Þetta snúist fyrst og fremst um að græða peninga - persónulega. Þrátt fyrir að við höfum haft misgáfaða alþingismenn í gegnum tíðina þá má Landvirkjun samt ekki komast í einkaeign. Þá fyrst verðum við í djúpum skít.

Þessi sæstrengur til Bretlands er vitlausari hugmynd en að einkavinavæða norðurljósin, þó okkur hafi tekist að selja túristum að koma hingað til þess að njóta þeirra.

Í óbeinu samhengi, það eru til áhrifaríkir einstaklingar hér á jörðinni sem telja að það eigi að fá einkaleyfi á öllu vatni á jörðinni svo hægt sé að græða á því.

- - - - - -

Á meðan ég man Ómar, mér áskotnaðist eignahlutur á sólinni (e. Sun). Hann er bara 485.399.400.000 fm2. En ég get selt þér hann fyrir slikk eða skipt á Tesla geimflugvélinni þinni. Láttu bara ekki skattinn komast að þessu.

[kristinn geir steindórsson briem (IP-tala skráð) 8.9.2016 kl. 08:47]

látum ber þettað með þjórsá. en um hvalárvirkun sem að sögn ómars er hreint vatn, ef marka má iðnaðarráðherra eru þettað 4.virkjanir sem fer ínná spenuvirki sem þurfti að færa sérstaklega til þess að gera þessar virkjanir haghvæmar eru allar þær ár bergvatnsár eru einginn uppistöðulón er  eingin röskun vegna lína og spenuvirkis, hvalárvirkjun er að sögn á mörkum friðlandsins á hornströndum,senilega skiptir hvar fryðland má raska ef það er nógu langt frá reykjavík er víst í lagi alveg merkilegt að sumar virkjanir eru umhverfisvænar en aðrar ekki allar virkjanir eru röskun á umhverfi sínu ef lagðar væru niður virkjanir í soginu og þíngvallavatni væri komið nyður í samt horf og það var áður en hækkað var hvað skildi það verða leingi að jafna sig