"Þangað til, verið þið sæl." Ekki sæl lengur en í ákveðinn tíma?

"Verið þið sæl" eða "verið þið blessuð" eru fallegar íslenskar kveðjur. En nú er í æ ríkara mæli farið að skilyrða þessar fallegu óskir. 

"Verið þið sæl að sinni" kom á sjónarsviðið fyrir um 60 árum. Mig minnir að Sveinn Ásgeirsson hafi rutt þeirri kveðju braut og gert að eins konar einkennisorðum sínum. 

Spurningin er af hverju velgengni hins ávarpaða er takmörkuð við afmarkað og stutt tímabil með svona kveðju, þannig að honum sé alls ekki óskað velfarnaðar síðar. 

"Fréttir eru næst klukkan xx. Þangað til, verið þið sæl." 

Í þessari kveðju er búið að stytta tíma sæluóskarinnar enn meira, kannski niður í nokkrar klukkustundir. 

Er þetta merki um rausæi varðandi það hve óskir um velfarnað geta hrokkið skammt? Vissara sé að hafa tímann sem stystan ef eitthvað kemur upp á sem gerir hinn ávarpaða vansælan?

Eða, að sæluóskin verði endurnýjuð í upphafi næsta fréttatíma eða þáttar og þess vegna dugi að takmarka fyrri óskina við upphaf endurnýjunarinnar, jafnvel þótt það verði annar sem segir þá "komið þið sæl" heldur sá sem sagði "þangað til, verið þið sæl."? 

Mér hefur alltaf þótt frekar tilgerðarlegt að skilyrða árnaðaróskir og binda við ákveðið tímabili. 

"Komið þið sæl" og "verið þið sæl" sagði Sigurður Sigurðsson ævinlega og þurfti ekki meira. 

Af hverju þarf meira en það?

Takk fyrir síðast hvað?

Athugasemdir

[Þorsteinn Briem, 11.12.2016 kl. 01:26]

Ansi margur er skíthæll,
út af kveðju landans,
afar stutt var Ómar sæll,
allt fór það til fjandans.

[Þorkell Guðbrands (IP-tala skráð) 11.12.2016 kl. 11:37]

Datt í hug að velta því upp hvort einhver tengsl geti verið þarna milli bandarísku kveðjunnar "so long" og þessa talsháttar?

[Öreigur í Hruna (IP-tala skráð) 11.12.2016 kl. 12:49]

Í framsókn virðist kominn kengur,

kappið hlaupið út í kinn:

Mun pörupiltur pissa lengur,

í pólitíska skóinn sinn? 

http://www.mbl.is/frettir/innlent/2016/12/11/sigmundur_bodar_til_veislu_nyrdra/

[Ragna Birgisdóttir, 11.12.2016 kl. 13:10]

„Verið óhræddir, því, sjá, ég boða yður mikinn fögnuð sem veitast mun öllum lýðnum sem fylgir mér (fagnaðarerindi Sigmundar Davíðs)

[Haukur Kristinsson (IP-tala skráð) 11.12.2016 kl. 15:20]

Á í erfiðleikum með kveðju eins og t.d. "góða helgi." Finnst það tilgerðarlegt.