Viðkvæmt orðaval.

Umræður, sem snerta hlut kynjanna í þjóðlífinu, verða oft býsna viðkvæmar, og þarf lítið til að orðaval og ummæli komi róti á huga fólks. 

Þannig skilur einn ákveðið orðaval á allt annan hátt en annar.

Orðið móðir er eitthvað það fegursta sem hugsast getur. 

Jörðin okkar er til dæmis kölluð Móðir jörð, jafnvel með stórum staf eins og hér er skrifað. 

Benedikt Jóhannesson uppskar gagnrýni þingkonu vegna orðavals síns varðandi hugtakið hagsýn húsmóðir. 

Móðir hússins er þó hliðstætt móður jörð, að því leyti að bæði húsið og jörðin eru heimili, eitthvað það dýrmætasta sem til er fyrir hverja manneskju. 

Benedikt baðst afsökunar á því að hafa ekki getað komist betur að orði þannig að enginn misskildi það sem að baki orðum hans bjó varðandi það að nefna hina hagsýnu húsmóður. 

Það hefðu ekki allir í hans sporum gert það,  og það að hann viðurkenndi að orðavalið gæti verið viðkvæmt og jafnvel óheppilegt í eyrum sumra, jafnvel kjánalegt í hans eigin eyrum um leið og hann hafði sagt þau, er því dæmi um að fjármálaráðherrann á til auðmýkt og raunsæi í bland þegar það á við.  

„Hinar hagsýnu húsmæður“

Athugasemdir

[Gústi (IP-tala skráð) 7.2.2017 kl. 22:12]

Orðið móðir er eitthvað það fegursta sem hugsast getur.... nema lafmóðir, móðursýki og hin illa stjúpmóðir. Orðið sjálft er nefnilega ekkert fallegt þó það veki einhverjar hlýjar tilfinningar í brjósti sumra. Óþjált, stirt og hljómar ekki sérstaklega vel, "mamma" kemur því oftast í staðinn í almennri notkun. Að tengja orð einhverju sem maður telur fallegt gerir orðið ekkert fallegra.

Karlpungur verður seint talið fallegt orð þó úr pungi komi kraftaverk, líf og öll séum við að hálfu upprunin þaðan. En karlpungar nota gjarnan kynhlaðna orðræðu til að lítillækka konur, viljandi og óviljandi. Þeir tala niður til kvenna þó þeir telji sig vera að lofsyngja þær. Þannig verða konur sem kosnar eru á Alþingi Íslendinga bara hagsýnar húsmæður, sem í öðru samhengi gæti verið hrósyrði, meðan þeir ávarpa hvern annan sem virðulegan fyrsta þingmann og háttvirtan ráðherra.

[Haukur Kristinsson (IP-tala skráð) 7.2.2017 kl. 22:23]

Auðmýkt. Það þarf ekki mikð til á skerinu til að vera lofaður fyrir auðmýkt. Litlu verður Vöggur feginn.

[Jón Magnússon (IP-tala skráð) 8.2.2017 kl. 23:56]

Hér er vísnagáta sem passar við umræðuefnið:

Hvað er það sem konan nær að verða?

Karlinn ei, það á sér ekki stað.

Ef greikka spor og göngu sína herða

gerast feitir karlar jafnan það.