Þegar ég var rekinn á gat.

Um aldamótin síðustu kom amerískur blaðamaður til landsins, sem hafði gert umhverfismál og náttúru að sérgrein sinni og var því hnútum kunnugur um allan heim eftir langan feril. 

Hann skrifaði fyrir ýmsa og tók myndir, þó mest fyrir Los Angeles times. 

Hér á landi hitti hann marga, meðal annars þáverandi forseta Íslands. 

Tvennt sagði hann við mig, sem mér fannst merkilegt. 

Í fyrsta lagi að eftir kynnisferð sína hér og samtöl við ráðamenn teldi hann okkur Íslendinga vera á svipuðu stigi í þessum málum og Bandaríkjamenn hefðu verið fyrir 40 árum og að á grundvelli þess væri það spá hans að Íslendingar myndu ekki linna látum fyrr en virkjuð hefði verið öll vatnsföll landsins og hvert einasta jarðvarmasvæði. 

Mér þótti þetta firnum sæta þá en ekki eins núna, 15 árum síðar, þegar harðsnúnir handhafar valda og fjármagns gera áætlanir á fullu í þessa veru og stefna að því að við framleiðum tíu sinnum meira rafmagn eftir tíu ár en við þurfum fyrir eigin fyritæki og heimili. 

Eru búnir að kaupa og halda áfram að kaupa upp allar hugsanlegar jarðir með virkjanaréttindi, hvort sem þær eru í verndarflokki rammaáætlunar eða ekki. 

Í öðru lagi lagði hann fyrir mig gátu: Hver er merkilegasti foss Íslands?

Ég byrjaði á Dynk og giskaði síðan árangurslaust á hvern stórfossinn af öðrum.

Hann reyndi að hjálpa mér við að finna rétt svar með því að segja að fossinn væri á vestanverðu landinu.

En allt kom fyrir ekki.

Þá kom svar hans: "Merkasti og einstæðasti foss landsins eru Hraunfossar. Enga hliðstæðu kann ég að nefna í víðri veröld."  

Hyggjast rukka við Hraunfossa

Athugasemdir

[Steinar Frímannsson (IP-tala skráð) 30.6.2017 kl. 22:46]

Skammt fyrir ofan þar sem Kálfá innri rennur í Brúará eru fossar sama eðlis og Hraunfossar. Það er að vatn kemur út úr hrauninu við árbakkann og steypist beint í ána. Þar er að vísu bakkinn lægri þannig að fossarnir eru ekki eins glæsilegir.  Reyndar er venjuleg gönguleið niður með Brúará austan megin þannig að við sjáum ekki fossana á sama hátt og Hraunfossa.  Bara benda á að það er hæpið að fullyrða að eitthvað sé einstakt. 

[Ómar Ragnarsson, 1.7.2017 kl. 12:19]

Takk fyrir þessar upplýsingar um sérkennilegan foss við Brúará. Á dögum drónanna opnast þar möguleiki til óbeinnar skoðunar.

Ari fróði sagaði: "Hvatki er missagt er í fræðum þessum er skylt að hafa það er sannara reynist." 

Sem þýðir meðal annars líka, að meðan ekki er betur vitað, verður að styðjast við þá vitneskju sem fyrir hendi er á hverjum tíma.

Blaðamaðurinn víðförli hafði aldrei séð neitt líkt Hraunfossum á ferðum sínum, meðal annars um Nýja-Sjáland, Kamsjatka og fleiri eldafjallasvæði.

Hann hafði ekki heldur séð myndir né minnst á neitt líkt fyrirbæri.

Hefði því þó væntanlega verið haldið fram opinberlega ef vitað hefði verið um það.  

Augljós stigsmunur er á ónefndum leynifossi við Brúará og Hraunfossum, þótt það sé ekki eðlismunur. 

Frægð Hraunfossa er því tryggð um sinn, eða þangað til vitnast um jafnoka þeirra.