"Sá, sem aldrei getur breytt um skoðun..."

Það hefur oft verið talið til galla á fólki, ef það skiptir um skoðun. Orðin "hringlandaháttur" og "tækifærismennska" eru oft notuð í því sambandi. 

Þó hafa mörg stórmenni sögunnar og merkt fólk skipt um skoðun og staðið af sér gagnrýni fyrir það. 

Eitt frægasta dæmið er Sál, sem ofsótti kristna menn, en sneri síðan algerlega við blaðinu og barðist svo einarðlega fyrir hinni nýju trú, að hann fékk annað nafn, Páll, og meira að segja titlaður postuli sem áhrifamesti trúboði og leiðtogi kristinna manna eftir daga Krists. 

Þegar Winston Churchill var átalinn fyrir að hafa snúið baki við Frjálslynda flokknum í Bretlandi og farið yfir í Íhafdsflokkinn, er hermt að hann hafi svarað:  "Sá sem aldrei breytir um skoðun mun aldrei geta breytt neinu." 

Einar Ágústsson, alþingismaður og utanríkisráðherra í stjórn Ólafs Jóhannessonar sagði eitt sinn að hann áskildi sér rétt til að skipta um skoðun. 

Það gildir þegar slíkt á við, og ný rök, staðreyndir eða viðhorf kalla á endurmat. Því að það er stutt bilið á milli þess að standa fast á sínu eða vera haldinn fordómum og berja höfðinu við steininn. 

Gladstone varð æ frjálslyndari eftir því sem hann varð eldri. Oftast er það öfugt. 

Jónas Haralz og fleiri aðhylltust sósíaliskar kenningar sem ungir menn Laxness varði Stalín og kommúnismann. 

Jónas gerðist helsti ráðgjafi miðhægristjórnar krata og Sjalla og Laxness játaði að hafa bæði verið blekktur og blekkt sjálfan sig varðandi kommúnismann. 

Varasamast er að falla í þá gryfju að víkja gildum rökum til hliðar og ástunda það, sem kalla mætti "áunna fáfræði". 

Það getur hent alla að hafa rangt fyrir sér eða misstíga sig, og það er ekki sanngjarnt að taka einstakar setningar og gjörðir ungs fólks og nudda því upp úr slíku löngu síðar. 

Þegar leið á ævi Einsteins stóð hann alveg fyrir sínu.  

Var Einstein rasisti?

Athugasemdir

[Hörður Þormar (IP-tala skráð) 15.6.2018 kl. 15:19]

Enginn er óskeikull, jafnvel ekki afburðamenn. Megnustu illmenni og hrottar geta verið séní á ýmsum sviðum, sem dæmi má nefna Hitler og Stalín.

Á meðal okkar er sjálfsagt til fólk sem myndi hegða sér eins og þeir við sömu aðstæður.

Sagt er að í heilanum séu "þrjóskustöðvar" sem valdi því að menn eigi erfitt með að skipta um skoðun, þær munu vera ættgengar og misjafnlega þróaðar eftir einstaklingum og tegundum. Sjálfsagt eru þær nauðsynlegar til viðhalds lífinu (sbr.íslenska þjóðin og íslenska sauðkindin), en stundum geta þær verið til mestu óþurftar.

Það getur því stundum kostað mikið andlegt átak að skipta um skoðun og oft hafa menn ekki gert það fyrr en eftir að hafa þolað mikla reynslu eða áfall, sbr. Pál postula.

Albert Einstein var afburðamaður, en hann var ekki óskeikull fremur en Stephen Hawking eða hver annar. Einstein var alinn upp í umhverfi sem er nútímamnninum að mörgu leyti framandi og skoðanir hans skal meta með tilliti til þess.

Ef ég man rétt þá taldi hann að alheimurinn væri eilífur og hann átti erfitt með að sætta sig við kenninguna um "Miklahvell". Einnig var hann eitthvað ósáttur við skammtakenninguna, taldi að "guð kastaði ekki teningum". 

Kannski hafði hann rétt fyrir sér, ég veit það ekki.

[Anna (IP-tala skráð) 15.6.2018 kl. 21:36]

Tesla var snillingur og Einstein hirti hróðurinn