Merkilegt að Sampaoli lærði ekkert af Íslendingum.

Oft byggist stærsti hluti aðferðar við að fást við erfiðan andstæðing á því að aðlaga sig að leikaðferð eða stíl hans. 

Þegar Lennoz Lewis saltaði Mike Tyson 2002 sagði hann eftir bardagann, að sigurinn hefði byggst á því að aðlaga sig að stíl og aðferð Tysons. 

Gene Tunney þaulskoðaði myndir af öllum bardögum Jack Dempsey og fann ráð til að verjast öllum sóknaraðgerðum eins af helstu stjörnum hnefaleikanna og byggja eigin sóknaraðgerðir á gagnhöggum og gagnsóknum. Þannig dró hann smám saman úr krafti og getu Dempseys eftir því sem leið á þá tvo metbardaga, sem þeir háðu. 

Svipað getur átt við um keppnislið, og það svo mjög, að lið, sem er neðarlega á lista í deild, hefur oft eitthvert lítt skiljanlegt tak á efsta liðinum. 

Minnir til dæmis á knattspyrnulið ÍBK um síðustu aldamót þegar það gerði KR sífelldar skráveifur. 

Þegar Sampaoli þjálfari Argentínumanna er að lýsa því hvernig Króatar fóru að því að lama sókn argentínska liðsins í kvöld, er hann í grófum dráttum að lýsa því hvernig Íslendingar notuðu svipaða aðferð til að draga vígtennurnar úr argentínska liðinu um daginn. 

Sampaoli hafði sex daga til þess að bregðast við þessari sýnikennslu íslenska liðsins á því hvernig átti að gera Messi óskaðlegan, án þess þó að ráðst neitt að honum beint, heldur einungis að "lesa" hann og loka svæðum fyrir hann og spil hans.

Sampaoli annað hvort fann ekki nýja aðferð eða leið, eða reyndi það ekki. 

Þess vegna er það bæði manndómsbragð hjá honum og eðlilegt í alla staði að taka á sig sökina á eindæma óförum liðsins. 

Hann játar ókosti þess að láta mest allan sóknarleik liðs síns snúast í kringum einn afburðamann. 

Það þýðir, að mótherjarnir geta kæft flestar skæðustu sóknaraðgerðirnar í fæðingu, því að það liggur fyrir hvar þær muni byrja og á hvaða svæði á vellinum þær verði.  

Biður argentínsku þjóðina afsökunar

Athugasemdir

[Halldór Egill Guðnason, 22.6.2018 kl. 02:27]

 Sampaoli er þjálfari Argentínu, Ómar. Þetta kallast sennilega skriðvilla á takkaborðinu;-)

 Það ég hef heyrt frá vinum kunningjum og samstarfsfélögum í Argentínu undanfarið, áttu fæstir von á neinu frá þessu liði.  Ástríðan horfin og peningarnir búnir að eyðileggja boltann. Það er ekki hægt að setja saman landslið úr eintómum sóknarsnillingum og stórum nöfnum. Leikur Íslands gegn þeim sýndi það. Síðasta markið sem Argentína fékk á sig, ef vel er skoðað, sýnir steinrunna vörn og helsta framherjann Messi standa kyrran inni í eigin vítateig!  Hann hreyfði sig ekki!

 Vorkenni þessu landsliði við heimkomuna. Það verður ekki fallegt.

 Góðar stundir, með kveðju að sunnan.

[Helga Kristjánsdóttir, 22.6.2018 kl. 05:01]

Eitthvað held ég þó að vanmat hafi spilað inn í það hjá þeim blessuðum.. Miðað við ummæli Messi,að leikur Islendinga hefði verið lítið nema innköst. Mér taldist til að innköst Króata hefðu ekki verið færri.það þýðir þó að Argentína þurfti að hreinsa eða klapsa æði oft útaf. Það getur verið jafn gaman að horfa á góða varnarmenn t.d.Hannes og aðra leika þessa skemmtilegu íþrótt. Staðreyndin er að það kemur aldrei pattstaða upp í leiknum eins og í skyldri íþrótt skákinni,það fást alltaf úrslit. Kannski er þessi hálfgerð kvíða kasts færsla því ég get bara ekki sofnað.   

v

byggat á innköstum.