Aðalleiðirnar líða fyrir hjáleiðirnar.

Þegar hinn mikli og óhjákvæmilegi niðurskurður á útgjöldum til vegamála skall á í Hruninu var vegakerfið enn langt frá því að vera fullnægjandi fyrir nútíma umferð. 

Við niðurskurðinn, sem hefur raunar staðið síðan þrátt fyrir uppsveifluna af völdum margföldunar tekna af ferðaþjónustu, versnaði ástandið ef eitthvað var. 

Þetta hefur komið óþyrmilega í ljós þegar orðið hafa árekstrar eða aðalleiðir lokast af öðrum sökum, því að þá hefur það orðið ljóst, að hjáleiðirnar eru afar bágbornar og vart bílum bjóðandi. 

Telft á tæpasta vað í þeim efnum og er átta mánaða lokun Þingvallavegar um Bláskógaheiði dæmi um afar slæmar afleiðingar af lélegu vegakerfi. 

Leiðin um Meðalland og sunnanvert Landbrot var lengi vel notuð sem sérleið í ralli, og er enn í dag í slæmu standi. 

Það liggur beint við að verja stærri hluta af tekjunum af umsvifum ferðaþjónustunnar í að bæta þennan hluta innviðanna, sem reynir á í vaxandi mæli. 

 

Rennslið áfram í rénun

Athugasemdir

[Orn Johnson´43 (IP-tala skráð) 7.8.2018 kl. 11:10]

Þessi átta mánaða lokun á veginum um Þingvelli er mun lengri en búist var við og skrifast það alfarið á fyrirbrigði sem heitir "Landvernd". Kæra þeirra var síðan réttilega dæmd tómt bull. Hreint skemdarverk sem þeir bera svo enga ábyrgð á og hljóta engan skaða af en það gera aðrir. Ekki í fyrsta skipti sem þeir framkvæma svona hryðjuverk. Best að banna þetta fyrirbrigði með lögum. 

[Haukur Kristinsson (IP-tala skráð) 7.8.2018 kl. 14:34]

Orn Johnson (11:10). Hryðjuverk?

[Ómar Ragnarsson, 7.8.2018 kl. 19:10]

Hryðjuverk er íslenska þýðingin á erlenda orðinu "terrorism", og gerendurnir eru "terrorists" því að þeir beita morðum og limlestingum til þess að vekja skelfingu og ótta hjá fólki.  

Nú eru sumir Íslendingar farnir að nota orðið hryðjuverkafólk um þá, sem erlendis eru kallaðir dissidents eða activists. 

Í úttekt Fréttablaðsins nýlega var friðsamleg ganga rúmlega 10 þúsund manna niður Laugaveg 2006 með fullu leyfi yfirvalda skilgreind sem "náttúruhryðjuverk." 

Í mynd af göngunni mátti sjá Vigdísi Finnbogadóttur, fyrrverandi forseta Íslands, fremst í göngunni, og blaðamaðurinn, sem vann úttektina, skilgreindi hana ásamt rúmlega tíu þúsund manns sem "náttúruhryðjuverkamann."  

[Ómar Ragnarsson, 7.8.2018 kl. 19:12]

Annars er mótsögn í því að segja annars vegar að Landvernd sé að kenna að breikkun Þingvallavegar taki átta mánuði og upplýsa hins vegar að breikkunin verði alveg eins og til stóð í upphafi og taki þess vegna átta mánuði. 

[Már Elíson, 7.8.2018 kl. 20:27]

Sæll Ómar,- Er það rétt hjá þér að lokanir séu um Bláskógarheiði ? - Er það ekki Gjábakkavegur / hraun í átt að Lyngdalsheiði ? - 

[Hörður Björgvinsson (IP-tala skráð) 7.8.2018 kl. 22:39]

Eitt af því sem þarf að gera til að bjarga vegakerfinu úti á landi frá algjöru hruni er að endurreisa Skipaútgerð ríkisins.

[Ómar Ragnarsson, 7.8.2018 kl. 22:49]

Í kerfi Vegagerðarinnar og á kortum er þetta hluti af vegi 36 sem liggur frá Mosfellsbæ til austur í Gjábakkahraun en fer þvert í gegnum Bláskógaheiði, sem liggur frá vatninu í norður. 

Í bók Jónasar Kristjánssonar er reiðleið frá Brúsastöðum/Þingvöllum framhjá Bolabás og Hofmannaflöt í átt að Brunnum með þessu nafni, og samkvæmt því er þjónustumiðstöðin syðst á Bláskógaheiði. 

Vegurinn, sem þarf að breikka, nær frá vegamótum við þjónustumiðstöðina austur að Gjábakka og var lagður fyrir þjóðhátíðina 1974.  

[Ómar Ragnarsson, 8.8.2018 kl. 01:41]

Enn ein viðbót: Á nákvæmu korti sé ég að nánar tiltekið liggi umræddur vegarkafli um Þingvallahraun, en að Bláskógaheiði sé fyrir norðan Ármannsfell. 

[Örn Johnson ´43 (IP-tala skráð) 8.8.2018 kl. 18:19]

Ómar, þetta er yfirklór hjá þér með því að halda því fram að aðgerðin taki 8 mánuði eins og til stóð. Þetta "Landverndar" fyrirbrigði tefur fyrir málum sí og æ án þess að taka nokkra fjárhagslega ábyrgð á gjörðum sínum. Er svo oftast rekið til baka með bullið sitt. Það er slæmt og ætti ekki að vera hægt að hafa svona ábyrgðarlaus samtök.