Blekkingaleikur: Eigendur Hvalárvirkjunar þurfa alla orkuna suður.

Erlendir auðmenn eiga í raun Vesturverk, sem skrifað er fyrir Hvalárvirkjun, því að HS Orka á Vesturverk og á sínum tíma var hægt að rekja eignarhald HS Orku um skúffufyrirtækið Magma Energie til kanadíska auðmannsins Ross Beaty. 

Fyrir tveimur árum upplýstist að gufuaflsvæðið HS Orku sem liggur frá sameiginlegu orkuhólfi Svartsengis og Eldvarpa og endar úti á Reykjanestá, hefði sigið niður um allt að 18 sentimetra. Árum saman hafði verið reynt að halda þessu leyndu, en í lítilli grein í innanhússblaði í landmælingarfyrirtæki uppi á Akranesi leyndust þessar tölur . 

Þetta mikla sig orkuöflunarsvæðanna rímaði við þær staðreyndir að sjór er farinn að ganga á land í Staðarhverfi vestan við Grindavík, nýjar bolrholur gefa ekkert afl, og að í örvæntingu við að pissa í skóinn með því að stúta Eldvörpum til þess eins að endanlegt orkufall frestist eitthvað, verður endanlegt orkufall enn svakalegra en ella. 

Í örvæntingu reyna eigendur HS Orku að verða sér úti um orku annars staðar frá, og þess vegna sækja þeir stækkaða Hvalárvirkjun (átti fyrst að verða 30MW en verður 55MW) svo fast vegna þess að þeir munu þurfa hvert einasta megavatt til þess að standa við orkusölusamning sinn við álverið á Grundartanga. 

Eins og þetta sé ekki nóg blekkingarspil telja þeir líka Vestfirðingum trú um að Hvalárvirkjun verði gerð til að "auka rekstraröryggi" á útnára, sem kosta mun mikla fjármuni að tengja. 

Enginn skyldi verða hissa þótt á endanum yrði reist kolaorkuver til að framleiða orku og hita upp byggð á Suðurnesjum ásamt því að mjólka hvert megavatt Hvalárvirkjunar suður. 

Ef einhver hefði sagt árið 2012 að innan fárra ára yrði brennt 120 þúsund tonnum af kolum á ári hér á landi, hefði hann verið hleginn í hel. 

En þetta hefur þegar gerst með tilkomu kílilversins á Bakka við Húsavík.  

Tenging um Ísafjarðardjúp hefði mest áhrif

Athugasemdir

[Vagn (IP-tala skráð) 16.3.2019 kl. 22:49]

Og auðvitað verður að hætta við, það er glatað að einhverjir útlendingar gætu hugsanlega grætt eitthvað. Ekkert fer eins illa í Íslendinginn og að útlendingur sjái sér hag í því að eiga við hann viðskipti. Það er hræðilegt þegar útlendingar græða. Við sveltum frekar en að sjá það ske. Svo eru þetta ábyggilega múslímar líka.

[Ómar Ragnarsson, 16.3.2019 kl. 22:55]

Aðalatriði þessa pistils er blekkingaleikurinn sem blygðunarlaust er leikinn gagnvart Vestfirðingum. 

[Þorsteinn Siglaugsson, 16.3.2019 kl. 23:12]

Ég held að það sé alveg rétt hjá þér Ómar að þetta er blekkingaleikur. Þessi frétt Morgunblaðsins ber það svo augljóslega með sér. Hún er vel og vandlega unnin af upplýsingafulltrúa HS orku.

[Vagn (IP-tala skráð) 17.3.2019 kl. 00:04]

Aðalatriði þessa pistils er blekkingaleikurinn sem blygðunarlaust er leikinn gagnvart Vestfirðingum....og þess vegna þótti við hæfi að gefa það sterklega í skyn strax í upphafi að útlendingar gætu jafnvel verið viðriðnir fyrirtæki sem á hlut í öðru fyrirtæki sem ætlar að virkja og nefna sérstaklega útlending sem seldi sitt fyrirtæki fyrir einhverju síðan. Gott er að byrja strax á inngrónu útlendingahatri mörlandans ef ást á Íslenskri náttúru er ekki líkleg til að afla andstöðu stuðnings. Ertu viss um að þetta séu ekki múslímar? Það trekkir hjá þeim sem þú ert að reyna að höfða til.

[Már Elíson, 17.3.2019 kl. 00:24]

"vagn"#1 og 4 - Þú ert kjáni, og innleggin þín barnaleg og full af hatri til landa þinna. - Hafðu skömm fyrir, nafnleysingi.

[guðmundur Ingi Kristinsson (IP-tala skráð) 17.3.2019 kl. 09:13]

Þörungaverksmiðjan á Súðavík mun kaupa 10 megavött og vonandi geta vestfirðingar hætt að framleiða rafmagn með olíu upp á nokkur hundruð þúsund tonn á ári sem mér skilst ásamt annarri jarðefnabrennslu  sé að eyða jöklum og þar með Hvalá.

[Gunnar Heiðarsson, 17.3.2019 kl. 10:11]

Nú er það svo að ég kaupi mína orku frá OR. Hvar hún er framleidd veit ég ekki, gæti allt eins verið suður í Svartsengi, hjá HS Orku, eða jafnvel vestur í Mjólkárvirkjun. Um þetta er bara alls ekki hægt að segja, enda fer öll orka inn á sama netið og dreift þaðan um landið.

Hitt liggur fyrir að orkumál Vestfirðinga er í miklum lamasessi. Þar er oftar en ekki verið að framleiða orku með innfluttu eldsneyti, sem er jú alveg út úr kú, hér á landi. Ástæða þessa er einfalt og lélegt dreifikerfi. Hringtengingu vantar, þannig að ef lína gefur sig sé hægt að keyra rafmagnið hina leiðina.

Vissulega má hringtengja Vestfirði, þó ekki komi til Hvalárvirkjun. Vandinn er þó sá að einungis ein lína liggur til Vestfjarða, frá botni Hrútafjarðar vestur í Kollafjörð. Þessi lína liggur að stórum hluta á fjöllum og getur gefið sig í slæmum veðrum. Mjólkárvirkjun hefur ekki nægilegt afl til að fóðra Vestfirði við slíkar aðstæður og þá gæti Hvalárvirkjun sparað mikla olíu.

Svo má ekki gleyma þeirri staðreynd að til er nokkuð sem kallast rammaáætlun Þar er mögulegum virkjanakostum raðað niður í þrjá flokka, vernd, bið og virkjun. Hvalá er í virkjanaflokk.

Vernd á vissulega rétt á sér, við eigum að ganga um landið af virðingu. Virkjanir kosta alltaf rask, mis mikið. Því var ákveðið af Alþingi að fara þá leið sem rammaáætlun er ætlað. Þeir virkjanakostir sem þegar eru komnir í virkjanaflokk rammaáætlunar eiga að vera búnar að fá umræðu. Þeir kostir sem eru í bið eiga eftir að fá næga umræðu, hvort þeir fari í virkjun eða vernd. Um þá kosti sem eru komnir í vernd þarf ekki frekar að ræða, þeir eru verndaðir.

Vilji menn fara að breyta þessu, fara að taka kost sem er kominn í virkjanaflokk og færa hann í vernd, verða menn að vera viðbúnir þeirri umræðu að kostir sem þegar eru komnir í vernd, verði teknir aftur til umræðu og lendi þá jafnvel í virkjanaflokk. Þetta yrði skelfilegt, en ef ramminn er tekinn sundur, þá heldur hann ekki lengur. Megin málið er þó að umræðan sé tekin á réttum tíma, þ.e. áður en endanleg ákvörðun liggur fyrir.

Hitt er svo annað mál að blessaður ramminn verður fljótur að fjúka ef stjórnvöld ákveða að samþykkja tilskipun ESB um 3. orkupakkann. Þá verður lítt hlustað á rök umhverfissinna eða íslendinga yfirleitt. Ákvarðanir verða þá teknar suður í Slóveníu. Orkuþörf Evrópu er nánast óendanleg og þeir vilja endurnýjanlega orku. IceLink1 er þar ofarlega á dagskrá og á eftir munu fylgja IceLink2, IceLink3 ......

[Ómar Ragnarsson, 17.3.2019 kl. 13:30]

Þegar rammaáætlun var sett af stað var strax vitlaust gefið með því að gefa það út að það yrði að flokka virkjanakosti í jafna flokka. 

Í fyrsta lagi er slík skipting mistúlkun á rammaáætlun,  og í öðru lagi var þegar búið að virkja um 30 bestu virkjanakostina. 

Ef það átti að skipta jafnt, hefði fyrst átt að gefa náttúruverndarfólki kost á að velja um 30 bestu virkjanakostina til friðunar, og skipta síðan jafnt þar á eftir. 

Hvalárvirkjun í núverandi mynd er miklu stærri og hefur miklu meiri umhverfisáhrif en upphaflega var áætlað. 

[Símon Pétur frá Hákoti (IP-tala skráð) 17.3.2019 kl. 13:31]

Takk fyrir góðan og þarfan pistil Ómar.

[Símon Pétur frá Hákoti (IP-tala skráð) 17.3.2019 kl. 13:37]

Steingrímur J. og VG virðast hafa sérstaka ást á að þjónusta vel erlenda auðjöfra og innlenda leppa.  Kolaást VG er aðhlátursefni, en einkum dæmi um hræsni og tvískinnung þess flokks.

[Ómar Ragnarsson, 17.3.2019 kl. 14:11]

"Útlendingahatur." Er það útlendingahatur að í landinu eru lög um að erelendir aðilar megi ekki eiga meira en 49 prósent af sjávarútvegsfyrirtækjunum.  

Er það útlendingahatur að við viljum eiga orkuna og sjávarauðlindina sjálf?

[MMK (IP-tala skráð) 17.3.2019 kl. 17:17]

Það er hægt að vita með vissu hvaðan við kaupum rafmagnið.Því virkjanir eru neð mismunandi tíðni (HZ) fól þarf einungis tíðnimæli ínstungu í húsinu og Tíðnikort yfir raforkuver

[Vagn (IP-tala skráð) 17.3.2019 kl. 20:14]

Hver eru þessi "við" sem vilja eiga orkuna og sjávarauðlindina sjálf? Hvað er það sem þessir "við" hræðast svona mikið? Það hlýtur að vera til skynsamt svar ef ekki er um inngróna útlendingahræðslu að ræða.

[Þorvaldur Sigurdsson (IP-tala skráð) 17.3.2019 kl. 21:05]

"Það er hægt að vita með vissu hvaðan við kaupum rafmagnið.Því virkjanir eru neð mismunandi tíðni (HZ) fól þarf einungis tíðnimæli ínstungu í húsinu og Tíðnikort yfir raforkuver"???

Staðreyndin er hins vegar sú að allar virkjanir á landinu sem selja raforku eru tengdar á sama netið og til þess að svo megi verða eru þær samfasaðar þannig að allt rafmagn sem selt er hérlendis frá almenningsveitum er á sömu tíðni. Og tíðnin er 50 rið.