Magnaður flugvélakirkjugarður í Mojave eyðimörkinni.

Á ferð síðuhafa og konu hans um Kaliforníu 2002 lá leiðin um tvö af þurrustu svæðum Ameríku, Mojave eyðimörkina og Death Valley. 

Ýmis mögnuð og hrollvekjandi náttúrufyrirbæri mátti sjá á þessum eyðimerkurslóðum, en einna áhrifamest var að koma skyndilega eftir auðninni að risastórum flugvelli, þar sem flugvallarsvæðið, flugplön og akbrautir voru þakin flugvélum í hundraða tali. 

Eins og orðið bilakirkjugarður er notaður um geymslustaði aflóga bíla, má nota svipað orð um þennan einstæða flugvöll, þar sem flugvélarnar eru í mismunandi ástandi en eiga það sameiginlegt að vera á áfangastað í átt til enda flugferilsins. 

Sumar eru jafnvel fleygar, en er komið þarna fyrir til bráðabirgða vegna þess hve dýr stæði fyrir flugvélar eru á venjulegum flugvöllum. 

Nú er svo að skilja á tengdri frétt á mbl.is að farþegalaus MAX-vél á leið til bráðabirgða geymslu hafi þurft að nauðlenda þarna í eyðimörkinni. 

Hefði illa farið, hefði heitið "flugvélakirkjugarður" fengið óhugnanlega viðeigandi merkingu. 

MAX-þota Southwest þurfti að nauðlenda

Athugasemdir

[Jón Steinar Ragnarsson, 29.3.2019 kl. 19:14]

Hef komið þarna. Sá kirkjugarðinn úr fjarlægð en fór á safnið og ók í einhverskonar túristalest um svæðið. Man að ég skoðaði þarna airforce one sem kennedy kom í til Dallas þann örlagarika dag og fór liðinn heim og Johnson var vígður inn í vélinni. Fannst það tilkomumikið því þetta var líka stór atburður hér heima.