Búnaðurinn á Stuka svínvirkaði 1937. Íslenskir fálkar fyrirmynd.

Junkers Ju-87 steypiárásarflugvél Þjóðverja var með sjálfvirkan búnað sem tók stjórnina af flugmanninum í steypiárásum strax árið 1937 í spænsku borgarastyrjöldinni. 

Þessi árásarflugvél var á þeim tíma það skelfilegasta ógnarvopn sem þekkt var. 

Til þess að auka á skelfinguna á jörði niðri var komið fyrir sírenu á hjólalegg Stuka, sem fór í gang í árásinni og ærði þá, sem heyrðu í drápstækinu koma nær lóðrétt niður að sér. 

Voru þessar sírenur kallaðar "trompetar Jeríkó". 

Notkun þessa hryllilega tækis byggðist á því að flugmaðurinn steypti vélinni nær lóðrétt niður úr 6000 feta hæð og miðaði henni á 600 kílómetra hraða beint niður á skotmarkið. 

Í 600 "metra hæð sleppti hann sprengjunni og reif í stýrið til þess að rífa vélina upp úr þessari miklu dýfu án þess að hún skylli til jarðar, og kom vélinni jafnframt í burt frá sprengingunni. 

Dýfan var það kröpp, að flugmaðurinn þrýstist með sexföldum þunga sínum (6g) niður í sætið og fékk "black-out" eða meðvitundarleysi á meðan hann var að klára dýfuna. 

Til þess að koma í veg fyrir meðvitundarleysið ylli brotlendingu, tók sjálfvirkur búnaður við stjórn vélarinnar og kláraði dýfuna fyrir flugmanninn, sem gat tekið stjórnina aftur þegar hann hafði fengið meðvitund. 

Magnað er að þessi tækni skyldi hafa verið komin til sögu fyrir 80 árum og svínvirka. 

1937 sendi Hermann Göring sveit manna til Íslands með leyfi íslenskra yfirvalda til þess að fanga nokkra fálka og fara með þá til Þýskalands og þjálfa sem veiðifálka. 

Fálkarnir gáfu samsvörun í náttúrunni að steypiflugs árásaraðferð Stuka vélanna og eru hraðskreiðustu dýr jarðarinnar. 

Stunduðu ægifagurt flug en jafnframt afar óhugnanlegt í því samhengi sem þeir voru sendir til Þýskalands til að gleðja þá vinina flugmarskálkinn og Foringjann. 

P. S. Vegna athugasemdar við þessa færslu eru hér þrjár myndir og nánara svar verður í athugasemd minni við þessari athugasemd. 

 

MCAS-búnaðurinn var virkur fyrir hrapið

Athugasemdir

[Gunnar Th. Gunnarsson, 30.3.2019 kl. 12:33]

Fróðlegt

[Vagn (IP-tala skráð) 30.3.2019 kl. 18:20]

En Stuka var hönnuð og flogið mörgum árum áður en Göring fékk fálkana. Vænglag stuka var enn eldra og kennt við máfa. Og flughraði fálka var ekki mældur fyrr en löngu síðar. Förufálkinn, lifir ekki á Íslandi, er hraðskreiðasta dýr jarðar.

Er hér um einhverja Íslenska þjóðrembingslega þjóðsögu að ræða sem á sér enga stoð í raunveruleikanum eða einhverja aðra fálka, jafnvel útlenda, sem komu til fyrir valdatíma Görings?

En það er athyglisvert, í ljósi þess að kvartað er yfir því að sjálfvirknin í nútíma flugi sé orðin of mikil þegar hún tekur stjórnina af flugmanninum, að sú tækni sé yfir 80 ára. Og þú hefur áður bent á annað sem komið var í bíla og flugvélar löngu áður en fólk almennt heldur. Við Trump þurfum að fara að hugsa okkur um tvisvar áður en við bölvum nýjustu tækni.

[Bodvar Gudmundsson (IP-tala skráð) 30.3.2019 kl. 18:33]

Stukan for nu ekki alveg svona hratt i dyfunni, ca 220  km.

Varnarlausar fyrir Spitfire og Hurricane i dyfunni. 

[Ómar Ragnarsson, 30.3.2019 kl. 20:30]

Mínar upplýsingar eru fengnar úr talsverðum slatta af flugvélabókum, sem ber saman um að hraðinn í dýfu Stuka var allt að 600 km/klst fallinu í dýfunni. 

Vænglag Stuka var í engu eftirlíking af vænglagi máfa, því að þetta vænglag er "öfugt" máfavængjalag, og ekki flugu þær á hvolf. 

Vænglagið á Stuka og fleiri vélum var haft svona til þess að hægt væri að hafa hjólaleggina sem stysta. 

Endanlegt lag á Stuka varð ekki ljóst fyrr en 1935, en þar áður var meðal annars verið að gæla við tvíþekjur í samkeppni framleiðenda um dýfuvélarnar. 

Og för manna Görings til Íslands 1937 með leyfi íslenskra yfirvalda til að fanga fálka og hafa með sér til Þýskalands er staðreynd. Þarf ekki annað en að fletta Öldinni okkar til að sjá það.

[Ómar Ragnarsson, 30.3.2019 kl. 20:43]

Síðan má geta þess að það var fyrir og eftir hverja steypiárás sem Stuka-vélar voru berskjaldaðar fyrir árásum Spitfire og Hurricane, sem voru með uppdraganleg hjól og gátu flogið miklu hraðar í láréttu flugi en Stuka. 

Þess vegna voru Stuka vélarnar teknar út úr orrustunni um Bretland strax í miðjum ágúst 1940 eftir að tugir þeirra höfðu verið skotnar niður. 

Þær voru síðar notaðar með góðum árangri í árásum á skriðdreka á vígstöðvunum. 

[Gunnar Heiðarsson, 30.3.2019 kl. 20:58]

Fróðleg grein Ómar. Vissi ekki um þennan búnað Stuka vélanna.