Eigum við bara ekki að færa fleira líka? "Sannleikurinn sjálfur er..."

Það myndi að sjálfsögðu vera þægilegra fyrir marga að sum fyrirbæri, sem hafa gert Ísland frægt, yrðu nær Keflavíkurflugvelli en þau eru og spöruðu þannig ferðafólki sporin. 

Í Grímsey ergir það marga, að heimsskautsbaugurinn skuli ekki vera niðri við þorpið, heldur í nokkurra kílómetra fjarlægð fyrir norðan það. 

Sá möguleiki, sem nefndur er, að færa bara kúluna til sem nú er á baugnum gæti gefið varasamt fordæmi. 

Til dæmis að búa til öfluga gjósandi borholu á Öskjuhlíð og nefna hana Geysi. Heitið Geysir varð alþjóðlegt heiti yfir fyrirbæri goshveri, þannig að engu er beinlínis logið með þessu snjalla bragði, þótt hálfsannleikur sé oft meiri lygi en lygin sjálf. 

Fordæmið hefur blasað við strax við komuna til landsins með risaauglýsingu Landsvirkjunar þar sem stendur að öll orka (100%) sem framleidd er á Íslandi sé endurnýjanleg og hrein. 

Þetta er fullyrt þótt vitað sé að rétt tala er aðeins um 70 prósent vegna þess að stóru gufuaflsvirkjanirnar á Reykjanesskaganum eru á niðurleið vegna rányrkju. 

Líka væri upplagt að setja upp skilti við Holtsós með heitinu Reynisfjara, svo að ferðamenn geti tekið sjálfsmyndir þar og sloppið við að fara alla leið á rétta staðinn. 

Það er nefnilega þannig, að enda þótt heimskautsbaugurinn sjáist ekki er hann þó á ákveðnum stað hverju sinni og færist ekki. 

Ef á annað borð á að gefa ferðafólki færi á að taka af sé mynd við bauginn, þar sem hann sannanlega er, er það hvorki gott afspurnar né heiðarlegt að ljúga til um það hvar hann er. 

Það er ekki gott afspurnar fyrir íslenska ferðaþjónustu og land og þjóð almennt.

En það, hvernig heimsskautsbaugurinn færist sífellt til og gerir staðsetningu frá í fyrra ranga í ár, minnir mig á stöku, sem ég man ekki nákvæmlega hvernig var, en læt mína útgáfu samt flakka hér í lokin. 

 

Falsfréttirnar sóma sér

á sínu efsta stigi

því sannleikurinn sjálfur er

sennilega lygi. 

„Vildum óska að hún hefði aldrei komið“

Athugasemdir

[Vagn (IP-tala skráð) 26.6.2019 kl. 16:11]

 

Og þó tekið sé það mikið úr borholum að þær hætti í einhvern tíma að skila nægu afli þá er það ekki rányrkja, þær endurnýjast og ná fyrri krafti við hvíld. Eins og miðlunarlón sem er tæmt, með tímanum fyllist það aftur. Og tún sem er slegið, grasið vex aftur. Stóru gufuaflsvirkjanirnar á Reykjanesskaganum eru því 100% endurnýjanleg orka.

[Ómar Ragnarsson, 26.6.2019 kl. 19:43]

Þetta er alveg ný kenning hjá þér, Vagn, og ég hvet þig til þess að færa betri rök fyrir því en bara að slá því fram sem þú segir, því að sé það rétt, er fæddur sérfræðingur sem gerir öll fræðin í þessum málum síðustu 40 ár ómerk.  

Viðurkennt er í mati á umhverfisáhrifum miðlunarlóna aurugra jökuláa, að  fyllist upp af auri með tímanum. 

Þannig stóð skýrum stöfum í mati á miðlunarlóni Villinganesvirkjunar að það lón myndi fyllast upp á sextíu árum og verða ónothæft. 

Miðlunarlónið mikla við Glen Canyon virkjunina er talið munu fyllast upp og verða ónýtt á 700 árum, en Hálslón á 100-200 árum. 

Þú virðist ekkert hafa kynnt þér þetta, heldur komast að byltingarkenndum niðurstöðum án þess að hafa þurfa að skoða neitt. 

Og sú spánnýja kenning þín að nýtingarsvæði gufuaflsvirkjana jafni sig strax eftir að þau hafa gengið sér til húðar, er í ósamræmi við álit og rannsóknir íslenskra sérfræðinga á þessu sviði, svo sem Stefáns Arnórssonar, Ólafs Flóvenz og Guðna Axelssonar.  

Meira að segja liggur það fyrir, ef þú skyldir ekki vitað það, að ekki gert ráð fyrir því í forsendum gufuaflsvirkjana að nýtingartími þeirra sé meiri en 50 ár. 

Ólafur Flóvenz og Guðni Axelsson skrifuðu greinarflokk í Morgunblaðið um gufuaflsvirkjanir og töldu, að því aðeins gæti nýting gufuafls verið sjálfbær, að farið væri svo varlega af stað að ekkert fall yrði á nýtingarsvæðunum, hvorki í upphafi né síðar. 

En slíkt hefur alls ekki verið gert á gufuaflsvirkjanasvæðunum á Reykjanesskaga, heldur fellur afl þeirra stöðugt og landið hefur þegar sigið um allt að 18 sentimetra samkvæmt mælingum Landmælinga uppi á Akranesi.

Sjór er þegar farinn að ganga á land í Staðarhverfi fyrir vestan Grindavík. 

Þegar tún er slegið vex gróðurinn aftur á skömmum tíma, jafnvel sama sumarið svo að það er hægt að slá túnið aftur fyrir haustið. . 

Samkvæmt lauslegum rannsóknum Braga Árnasonar myndi tíminn á Nesjavalla-Hellisheiðarsvæðinu, sem tæki svæðið til að jafna sig, að verða um 100 ár. 

Alla þá öld sem beðið yrði eftir slíku, yrðu fjórar til fimm kynslóðir rændar sjálfbærri þróun. Það telst rányrkja og gróft brot á hinni alþjóðlegu skilgreiningu á sjálfbærri þróun. 

Í vígsluræðu Þeistareykjavirkjunar viðurkenndi forstjóri Landsvirkjunar að virkjunin væri höfð allt að þrisvar sinnum minni en hægt hefði verið, og sagði Hörður, að með því væri leitast við að komast hjá stórfelldri rányrkju.