Í Kröflueldum voru 14 umbrotahrinur í níu ár með 9 eldgos.

Þrír sentimetrar sýnist ekki há tala, en er það samt þegar tillit er tekið til þess að þetta ris hefur orðið á aðeins fáum dögum.  

Til samanburðar sýnir talan 18 sentimetrar varðandi sig af völdum uppdælingu fyrir virkjanirnar á þessu svæði nokkurra ára þróun. 

Kröflueldar 1975-1984 voru líklega lærdómsríkasta eldgosahrina, sem íslenskir og þar með erlendir jarðvísindamenn hafa fengið að rannsaka og fylgjast með. 

Þar hófust flest hinna níu gosa á því að jörðin rifnaði, skammt frá Leirhnjúki, sem var ekki ósvipuð miðja umbrotanna og Þorbjörn er nú. 

Í gosinu 1984 náðist loftmynd, eina kvikmyndin, sem til er af því tagi, af því þegar í myrkrinu var líkt og eldrauður hnífsoddur kæmi upp í gegnum jörðina og hækkaði hratt, jafnframt því sem eldoddurinn breyttist í eldvegg sem líktist eldrauðu og ógnarlöngu sagarblaði. 

Síðar dróst eldvirknin í afmarkaða gíga á gossprungunni. 

Svipað gerðist í upphafi Heimaeyjargossins 1973, nema að í því færðist eldurinn afar fljótt í afmarkaðar eldsúlur og eldstólpa á stuttri gossprungunni sem mynduðu litla gíga og loks eitt eldfjall, Eldfell, utan í austurhlið Helgafells. 

Á tímabili í upphafi gossins í Holuhrauni var svipuð þróun í gangi og fyrir gosið mátti sjá stutta gígaröð frá mun minna gosi fyrr á tíð. 

Gígaröðin Eldvörp er á meira en tíu kílómetra langri þráðbeinni gossprungu, er örfáa kílómetra frá þeim stað, þar sem skjálfti upp á um þrjú stig varð í morgun fyrir vestan Þorbjörn. 

Hvergi á þurrlendi jarðar nema á Íslandi er að finna gígaraðir á borð við Eldvörp, Lakagíga og fleiri svipaðar.  

Í Kröflueldum reis land og seig á víxl í umbrotahrinum alls fjórtán sinnum. 

Í fimm skipti komst jarðeldur ekki upp á yfirborðið, þótt afar litlu munaði þegar hraunmylsna kom upp í gegnum borholurör í Bjarnarflagi og sáði glóandi hreunmynslu í kringum sig. 

Fyrsta gosið 1975, var afar lítið, en síðan reis land hærra og hærra með hverri umbrotahrinu og gosin urðu stærri og stærri á árunum 1980, 1981 og 1984.   

Engin leið er að vita hvort slíkt getur verið í uppsiglingu við Þorbjörn, né heldur, hvort og þá hve oft umbrotahrinur enda án eldgoss. 

Í hinu ógnarstóra gosi í Lakagígum urðu til um 130 gígar, og gengu þeir inn í hlíðar fjallsins Laka, sem var á miðju sprungunnar. 

Að norðanverðu var þetta smágigafyrirbæri utan í Laka ekki ólíkt því sem sjá mátti utan í Helgafelli í Eyjagosinu.  

En megin umbrotahrinurnar í Skáftáreldum urðu tvær og enduðu báðar með stórgosi, hinu fyrra á suðvesturhluta sprungunnar, suður af Laka, og hinu síðara fyrir norðaustan Laka. 

 

 

Athugasemdir

[Vagn (IP-tala skráð) 28.1.2020 kl. 21:00]

"Til samanburðar sýnir talan 18 sentímetrar varðandi sig af völdum uppdælingu fyrir virkjanirnar á þessu svæði nokkurra ára þróun." Gallinn er sá að það er ekkert til samanburðar sem segir að sigið sé vegna uppdælingar. Enginn núllpunktur. Sig hefur verið frá því mælingar hófust og ekkert vitað um hreyfingar fyrir þann tíma. Það eru 30 ár af mælingum en 65 ár frá fyrstu borholu.

Land rís og sígur á Íslandi, núllpunkt er erfitt að negla fastan. Sem kemur sumum sífellt á óvart og þeir leita skýringa í dægurmálum nútímans, eins og forðum. Hverju reiddust goðin...hvaða virkjun orsakaði landsigið sem skóp Almannagjá?

[Ómar Ragnarsson, 28.1.2020 kl. 22:34]

Eins og greint var frá í pistlinum í gær, sem fer svona mikið fyrir brjóstið á Vagni í launsátri hans, er það ekki aðeins landssigið allra síðustu ár, sem er grundvöllur ályktana kunnáttumanna um rányrkju og ásókn HS orku, heldur aðrar staðreyndir auk landssigsins, sem allar hníga að sömu niðurstöðu:   

Gufu/vatnsmagnið, sem dælt hefur verið upp frá byrjun orkuvinnslunnar á þessu svæði. 

Afkastaminnkun í borholum á sama tíma. 

Örvæntingarfullar fyrirætlanir HS orku um að fara í framkvæmdir í Eldvörpum, sem munu þenja virkjunarmannvirkin allt til sjávar, en jafnframt fara enn verr með háhitasvæðið í heild, af því að þá verður tekin orka úr sameiginlegu orkuhólfi Svartsengis og Eldvarpa og hrun vinnslunnar því verða enn hraðara að lokum eftir að farið hefur verið með miklum náttúruspjöllum um Eldvarpasvæðið af fullkomnu ábyrgðarleysi um loka niðurstöðuna.  

Sókn HS orku í byggingu  nýrra virkjana víða um land, meðal annars Hvalárvirkjun, til að ná þar orku í stað þeirrar, sem ganga mun til þurrðar á Suðurnesjum.

[Vagn (IP-tala skráð) 29.1.2020 kl. 01:27]

Og þú skrifar blaðsíður af útúrsnúningum og dylgjum frekar en fimm línur með heiðarlegum svörum og heimildum. Hvað á maður að halda?

[Ómar Ragnarsson, 29.1.2020 kl. 15:34]

Bara nokkrar staðreyndir sem hafa flestar komið marg sinnis fram í fjölmiðlum en Vagn afgreiðir úr launsátri sínum sem dylgur og bull:   

Fyrir nokkrum árum voru kaup erlendra aðila á HS orku á allra vörum í fjölmiðlum. 

Margsinnis hefur komið fram að HS orka átti meirihluta í Vesturverki, þegar það fyrirtæki fór í Hvalárvirkjun, en á þeim tíma voru sýndar heimildir fyrir því hér á síðunni að kanadíski auðkýfingurinn ætti þetta allt í raun. 

Afkastaminnkun í borholunum gátu kunnáttumenn á borð við Sigmund Einarsson séð í gögnum HS orku, en fyrir tveimur árum brá svo við að Hs orka hætti að gera þau jafn aðgengileg. 

Innanhússpósturinn hjá Landmælingum um GPS mælingarnar á gufuaflsvirkjanasvæðunum voru staðreynd, sem aldrei var mótmælt þá, þótt Vagn teljur það ekki heimild, heldur dylgjur. 

Í hitteðfyrra var sýnd mynd af nýrri borholu HS orku við Eldvörp og fjölmiðlar hafa greint frá framkvæmdaleyfi til þess að fara í virkjun svæðisins, sem er hrein rányrkja, því að allt frá því að á tíma Guðmundar Pálmasonar hefur það verið staðreynd, sem sýnd er á kortum, nú síðast í mörgum fjölmiðlum, að svæðið Svartsengi-Eldvörp er með sameiginlegt orkuhólf og kerfi. 

Margsinnis hefur verið fjallað í fjölmiðlum um virkjanahugmyndir HS orku allt frá virkjunum á Vestfjarðakjálkanum yfir í Skaftárhrepp. 

Vagn virðist vera að komast i kunnuglegan ham, sem ríkti hér á síðunni árum  saman hjá mönnum með dulnefnunum Hilmar og síðar Hábeinn, þar sem ótrúlegri elju var beitt við að afgreiða stöðugt allt sem sagt er hér á síðunni sem "rangfærslur og lygar"

[Ómar Ragnarsson, 29.1.2020 kl. 15:36]

Þegar upplýst var hér á síðunni um að til væru áætlanir um að grafa skurð mikinn frá Svartsengi alla leið til sjávar vestan við Grindavík til að tappa af affalli frá virkjuninni var þess krafist á ÍNN að ég bæðist afsökunar á því að nefna þetta. 

Ekki leið nema ár þar til þess gerðist ekki þörf og hið sanna kom í ljós. 

[Vagn (IP-tala skráð) 30.1.2020 kl. 02:20]

Í þriðja sinn, hvað eru þessi örfáu ár mörg ár? Á hve löngum tíma skeði þetta 18 sentimetra jarðsig sem þú þrástagast á? Það sýndi sig strax og mælingar hófust fyrir 30 árum að það væri jarðsig upp á tæpan sentimeter á ári. Það var fyrir tíma Reykjanesvirkjunar.

Sennilega verður þú að bíta í það súra að það verði stundum einhverjir sem lesa fullyrðingar þínar og spyrja spurninga sem þú svo þráast við að svara heiðarlega hreint og beint. En það segir meira um þig en þá.

Mér er nokk sama hverjir og hvers lenskir þeir eru sem kaupa og selja HS Orku. Eignarhlut HS Orku í Vesturverki. Og skurð við Grindavík. Spurningin var: Hvað eru þessi örfáu ár mörg ár, á hve löngum tíma skeði 18 sentimetra jarðsigið?

Og ekki svara með skurðum og skónúmerum eigenda HS Orku. Ekki samsæriskenningum. Og ekki hvað allir eru vondir að vilja heiðarleg svör frá þér.

Og svo þú gleymir ekki hver spurningin var: Hvað eru þessi örfáu ár mörg ár, á hve löngum tíma skeði 18 sentimetra jarðsigið?