Ætlunarverkið lá fyrir og litlu munaði að það tækist.

Atburðarásin 6. janúar var fyrirsjáanleg. Hún hófst fyrir rúmum fjórum árum þegar Donald Trump marg hvatti öfgasamtök lengst til hægri og hin öflugu og stóru samtök byssueigenda til þess að vopnbúast sem best og nýta sér stjórnarskrárvarinn rétt til eignar og beitingar skotvopna. 

Næsta skref var stigið strax í fyrrasumar með fyrirfram spádómum um að forsetaskosningarnar yrðu mesta hneyksli síðari tíma.  Í samræmi við það var hrundið af stað þvílíku flóði af ákærum vegna þeirra að enda þótt ekki fyndist sönnun fyrir neinni þeirra var því haldið fram að fjöldi þeirra sannaði að þær væru réttar. 

Í sjónvarpskappræðu beindi Trump orðum sínum beint til byssudýrkenda sinna þegar hann horfði beint í myndavélina og sagði: "Verið rólegir og bíðið átekta, tilbúnir."

Síðan kom loforð um hinn "stórmerka dag í sögu Bandaríkjanna, 6. desember" sem væri svo mikilvægur, að þar þyrfti að vera mikið fjölmenni. 

Í lok fundarins var hvatt til þess að marserað yrði til þinghússins og að fundarmenn skyldu ganga berserksgang, "go wild".  Þetta heitir á mannamáli að eggja til strórræðanna.

"Ég kem með ykkur" lofaði Trump sem benti jafnframt á það í ræðunni að Mike Pence væri heigull og svikari.  

Múgurinn sem braut sér leið í gegnum girðingar, dyr og glugga, klifraði upp veggi og barði varðmenn til óbóta og einn til dauða, hrópaði: "Hengjum Pence! Hengjum Pence!"  Settur var upp gálgi með tilbúinni snöru og handjárn höfð með í för inn í þingsalinn. 

Aðeins einni mínútu munaði að ætlunarverkið yrði unnið, þingmenn og Pence handteknir og yfirlýstri refsingu fullnægt. 

Á leið um dyr hrópaði hópur innrásarmanna:  "Við stöðvuðum þetta! Við stöðvuðum þetta.!" 

Trump hafði að vísu í hetjuskap miklum farið heim í Hvíta húsið í stað þess að efna loforðið um að verða samferða valdaránsmönnum, en mærði þá hins vegar óspart í frægu ávarpi í gegnum Twitter. 

Allt ofanskráð horfði heimsbyggðin öll agndofa á í sjónvarpi. En eftir á fullyrða samt enn sumir, að þeir, sem voru fremstir í flokki í innnrásinni hefðu verið félagar í Black Lives Matter og Antifa. 

Þeir sem skylt er að sjá til þess að innsetningarathöfnin verði ekki svipuð því sem gerðist 6. desember eru nú í ýmsum bloggpistlum og á netinu vændir um vænisýki og misbeitingu hervalds ef þeir dirfast að reisa rönd við því, sem hefur verið heitið í fjögur ár; að gripið verði til vopna í samræmi við heilaga grein stjórnarskrárinnar til þess að viðhalda völdum forsetans sem telur sig eiga hinn eina réttmæta handhafa forsetavaldsins.   

Sögð hafa ætlað að selja gögn Pelosi til Rússa

Athugasemdir

[Gunnar Rögnvaldsson, 18.1.2021 kl. 15:35]

Ómar. 

Bæði dómsmálaráðuneytið og saksóknari sá sem lögsækir þá ólátabelgi sem verða ákærðir, hafa fellt burt sögusagnir um að ganga hefði átt í skrokk á þingmönnum. Ekkert slíkt var nokkru sinni á dagskrá og engar sannanir hafa fundist um neitt slíkt og hefur það verið fellt út úr ákæruskjalinu.

Trump hvatti fundarmenn til að reyna að hafa áhrif á að 10 daga hraðrannsókn yrði gerð á forsetakosningunum með viðurvist stuðningsmanna fyrir utan þinghúsið. En sjálfur var Trump og stuðningsmenn hans í 1,5 km. fjarlægð frá þinghúsinu þar sem Trump enn að halda ræðu, er ólátin við þinghúsið hófust. En þau er verið að rannsaka.

En enn sem komið er er þó ekki hafin rannsókn á því þegar leiðtogi Demókrata á þingi æsti upp múg fóstureyðingarfrömuða sem brutu sér leið inn í byggingu hæstaréttar Bandaríkjanna á meðan á dómsfundi stóð, þar sem leiðtoginn hótaði persónulega að minnsta kosti tveimur dómurum með nafni og sagði að þeir myndu ekki vita hvað þeir ættu í vændum fyrr en þeir yrðu fyrir einverju hroðalegu.

Held að þú horfir of mikið á CNN Ómar, sem nú krefst þess að við íhaldsmenn séum færðir í sérstakar búðir eins og gert er í Kína.

Minnir mig að þú hafir ekki tekið þennan pól í hæðina þegar ráðist var á Alþingishúsið hér heima og hinn gamli DDRÚV-vinnustaður þinn auglýsti heimilisföng þeirra sem ráðast átti á.

Kveðjur

[Grímur Kjartansson, 18.1.2021 kl. 16:42]

Stuðningsmenn Trump eru margir miklir byssudýrkendur en mig furðar að hafa hvergi séð myndir af þeim sem fóru inn í þinghúsið með byssur

Allir virtust vera með farsímana á lofti að taka myndir svo ef einhver var með byssu þá ætti að vera til mynd af því

[Ómar Ragnarsson, 18.1.2021 kl. 19:24]

Enn einu sinni er RÚV sakað um að standa að baki öllum ósóma sem fram fer hér á Íslandi og þótt víðar væri leitað. Það kemur ekki lengur á óvart. 

[Grímur Kjartansson, 18.1.2021 kl. 20:27]

Það líka þversögn í því að ákærur á hendur Trump munu tefja fyrir Biden.

Þingið þarf að samþykkja alla ríkisstjórn Biden en það tekur lengri tíma en ætlað því þingið þarf að fjalla um ákærurnar á Trump 

Þannig að fyrstu 100 dagarnir sem Biden ætlaði að taka með trompi dragast á laginn og jafnvel allt fram til millikosninga á þingið og þá gætu Demókratar misst meirihlutann?