"Jólastemning" kallast á við reginöflin.

Rauður er litur jólanna og nú eru rauð jól þar sem við mannfólkið ræktum með okkur jólastemningu með kærum kveðjum og óskum.

En rauður er líka litur eimyrjunnar sem nú þrýstir sér upp á við nokkra kílómetra norðaustur af Grindavík. 

Þetta minnir á að ræktun æðruleysis og trúar er nauðsynlegst þegar við erum minnt svona rækilega á ógnir undirdjúpanna. 

Með kærum jólakvæðjum er hér textinn "Jólastemning" við lagið "Christmas time is near" sem er að finna á plötunni "Jólalög" sem Sinfóníuhljómsveit Íslands gaf út fyrir sex árum, þar sem Bernhard Wilkinson stjórnaði hljómsveitinni, Margrét Pálmadóttir stjórnaði í Stúlknakór Reykjavíkur og Hulda Björk Garðarsdóttir söng einsöng.  

 

JÓLASTEMNING. 

 

Jólastemning er 

yfir öllu hér; 

gleðitíð, sem börnin blíð

nú biðja´að veitist sér. 

 

Snjókorn blærinn ber. 

Boðskap flytja mér 

dýrðarsöngvar dægrin löng, 

sem dilla mér og þér. 

 

Sögur, ljós og ljóð

ljúft við tónaflóð. 

Mitt í dróma myrkurs ljómar 

minninganna glóð. 

 

Jólastemning ber

birtu, ósk mín er, 

að alla tíð, já ár og síð

allt árið ríki´hún hér; 

 

að einlæg gleði´og ástargeð

æ gæfist mér og þér.

 

p.s.  Á tónlistarmyndbandinu á facebook síðu minni er í lok 3. erindis lesið "...minninganna flóð."  En á að vera  "...minninganna glóð."

 

 

 

 

 

 

 

 

 

 

 

 

 

2  

 

Skjálftinn var 4,7 að stærð

Athugasemdir

[Sigríður B Svavarsdóttir, 25.12.2021 kl. 09:55]

Gleðilega hátíð kæru vinir elsku Ómar og Helga. Fallegt er jólaljóðið þitt Ómar. Þú klikkar ekki þó að árin tifi. Hér á borðinu hjá mér er bók sem heitir Sumargleðin og önnur sem heitir Guðni. Hlakka til að skoða hana og lesa. Hafið það gott kæru hjón. Jólafaðmlag sent og kær kveðja  frá Siggu Svavars 

[Bjarni G. Bjarnason (IP-tala skráð) 25.12.2021 kl. 13:59]

Fallegt!

Var að hlusta á messu í sjónvarpi og þó ekki en rauk upp og að skjánum þegar ég heyrði sérlega fallegt lag. 

Grufl og grúsk leiddi í ljós að þetta var "Bæn einstæðingsins" lag eftir Ómar Ragnarsson og texti eftir þá Gísla á Uppsölum. 

Svona getur maður nú stundum verið lengi að kveikja. 

Sérlega fallegt í flutningi kórs Langholtskirkju. 

https://www.youtube.com/watch?v=D38m6S6NGVA

[Ómar Ragnarsson, 25.12.2021 kl. 16:27]

Takk fyrir þetta. 

Smá leiðrétting vegna algengs misskilnings. 

Ljóðið, sem sungið er, er samsett af sex ferskeytlum og þremur tengingum. 

Tvær ferskeytlurnar eru eftir Gísla og voru samdar sitt í hvoru lagi með nokkru millibili í tíma, án tengingar. 

Þessar ferskeytlur eru, sú fyrri hringhenda:  

Jólin færa frið til manns; 

fegurð næra hjarta. 

Ljósið kæra lausnarans

ljómar skæra, bjarta. 

Ljúfi drottinn, lýstu mér, 

svo lífsins veg ég finni. 

Láttu ætíð ljós frá þér

ljóma´í sálu minni. 

Þessar tvær ferskeytlur eftir Gísla gáfu tilefni til að samið yrði lag fyrir sjónvarpsþátt um útlaga, þar sem þær yrðu settar í samhengi við nauðsynlega viðbót í texta, sem varð rúmlega þrisvar sinnum lengri. Nánar tiltekið jafn langt og fjórar og hálf ferskeytla.  

Frá minni hálfu fór því þetta í hendur Gunnars Gunnarssonar, sem útsetti lagið, með þessari höfundarlýsingu:   Lag: Ómar Ragnarsson. Ljóð: Omar Ragnarsson og Gísli á Uppsölum. 

Án vísnanna tveggja hefðu hvorki lag né ljóðið í heild orðið til.