Vindorkugarðar lágværari en kæliskápar?

Á almennum kynningarfundi um fyrirhugað vindorkuver í landi Hróðnýjarstaða, skammt frá Búðardal, gylltu talsmenn þess mjög hina gríðarlegu kosti þeirra og umhverfismildi. 

Upplýst var að hávaði af vindorkuverum væri minni en hljóð frá kæliskápum!

Það voru fréttir fyrir síðuhafa, sem hefur haft sínar upplýsingar beint frá ferðum sínum um svæði vindorkugarða á Jótlandi og á strandsvæðum syðst í Danmörku og nyrst í Þýskalandi. 

Hávaði hefur verið ein af ástæðunum fyrir andófi gegn miklum áforum um vindorkugarðana, en einnig sjónmengun. 

Á fundinum í Búðardal voru sýndar myndir sem áttu að sanna, að vindorkugarðarnir sæust ekki. 

Þessar myndir voru teknar næstum því beint ofan frá niður á vindmyllurnar, og sagt að þær sýndu að þær hyrfu nánast í landslagið. 

Ekki fylgdi sögunni hve margir yrðu á ferli horfandi niður á vindorkugarðana. Eða hvort þeir myndu ekki sjá alla vegagerðina, pallana og annað sem fylgir vindmyllunum. 

Norðmenn virðast vera orðnir efins um allsherjar umhverfismildi þeirra á landi, þar sem dauðir ernir og aðrir fuglar auk plastmengunar frá spöðunum vekja spurningar um algerlega hreina orku hvað umhverfisáhrif varðar. 

Ekki er að spyrja að því, að enn eina ferðina verði umræða á borð við þá sem nú er að hefjast í Noregi um risa vindmyllugarða á hafi úti skrifuð á reikning öfgafólks "sem vill að við flytjum aftur inn í torfkofana." 

En í Noregi eru það helst Norska hafrannsóknarstofnunin og hagsmunasamtök í sjávarútvegi sem "eru á móti atvinnuuppbyggingu og rafmagni".  

Gera athugasemdir við vindmyllugarða á hafi úti

Athugasemdir

[Gunnar Heiðarsson, 3.4.2022 kl. 09:50]

Sæll Ómar.

Þessi fleygu orð, um hávaða frá vindmillum, er féllu á kynningarfundi vestur í Dölum, voru einnig notuð á kynningarfundi vegna vindmilluhugmynda í landi Sólheima í Laxárdal. Þar komu íbúar hins vegar nokkuð betur undirbúnir á fundinn, höfðu kynnt sér málið  nokkuð og lögðu fram spurningar. Þetta kom fundarbjóðendum nokkuð á óvart.

Meðal annars var spurt um lágtíðnihávaða frá spöðunum sem mannseyrað heyrir ekki en truflar sum önnur dýr, plastmengun frá þeim, fugladrápið, undirstöðurnar og endurheimt landsins og á hverjum hvíldi sú ábyrgð að fjarlægja mannvirkin að loknum starfstíma þeirra.

Um lágtíðnihljóðið varð lítið um svör. Vildu í fyrst ekki kannast við þann vanda en viðurkenndu hann að lokum. Ekki gátu þeir upplýst um hvernig skyldi bregðast við honum, bentu  á að vindmillurnar væru tiltölulega langt frá byggð. Hvort eða hvaða áhrif þetta hefði á eitt af betri fjárbeitarsvæðum landsins vildu þeir ekki svara. 

Um plastmengun og fugladráp var erfitt að fá þá til að tjá sig, enda með öllu útilokað að ljúga neinu þar, vindmillum til bóta.

Um undirstöðurnar, sem útilokað verður að fjarlægja og endurheimt landsins töldu þeir lítið mál að þökuleggja yfir svæðið. Það getur varla talist endurheimt lands að þökuleggja heiðarnar og hafa undir þökunum 1000 m3 steypuhnall fyrir hverja vindmillu.

Um það hver bæri ábyrgð á að fjarlægja mannvirkin bentu þeir á að nægur tími væri til að ákveða það, þar sem nýtingartíminn væri talinn vera um 20 ár. Þetta er í takt við matsskýrslur um vindmillugarða, flesta ef ekki alla. 20 ár er stuttur tími, og þar að auki er vitað að þar er  verið að ræða besta hugsanlega nýtingartíma. Erlendis, þar sem veðurfar er mun hagstæðara svona mannvirkjum en upp á íslenskum fjöllum, nær nýtingartíminn sjaldnast 20 árum. Það liggur því ljóslifandi fyrir, jafnvel staðfest skriflega, að þessir aðilar ætla öðrum það verk að fjarlægja mannvirkin, eftir að hagnaður þeirra dvín. 

Eitt er sammerkt öllum kynningum á vindmilluhugmyndum, hvort heldur er frá þeim aðilum er vilja byggja slíkar ófreskjur, fréttum miðlanna og jafnvel þeim er mótmæla þessum áætlunum, en það er hversu lítið er gert úr hæð þeirra.

Þau möstur byggðalínu er reyst hafa verið seinni árin eru að meðaltali 20 metra há og þykir sumum nóg um. Vindmillur Landsvirkjunar ná rétt yfir 70 metra hæð, með spaða í toppstöðu. Það er svipað og Hallgrímskirkjuturn, nokkuð hærra en sementsskorsteinninn sálugi, er stóð upp á Skaga. Þær hugmyndir sem í gangi eru hér um byggingu vindmmilla eru flestar eða allar þrisvar sinnum hærri! 

Í matsskýrslum er gjarnan skilið af hæð turnsins og lengd spaða, haft í sitthvorum kaflanum. Þetta er ruglingslegt þar sem hæð turnsins er kannski sögð 150 metrar en annarstaðar talað un lengd spaða frá 65 - 85 metra. Hvoru tveggja ekkert svo svakalegar tölur en þegar 80 metrum er bætt við 150 metra, verður staðan nokkuð önnur! Þá er ekkert smá haf sem vindmilla með 160  metra þvermál spaða tekur. 

Í öllum skýringamyndum er fölsunin enn meiri, bæði með því, eins og þú nefnir að hafa hátt sjónarmið en einnig með beinni fölsun á stærðarhlutföllum. Þetta er ljótur leikur sem allir taka þátt í.

Að lokum þessarar löngu athugasemdar má benda á að sumir  bændur í Bæjarhrepp hinum forna, hafa gefist upp í baráttunni. Sjá beitarlönd sín hverfa og eina í stöðunni að falbjóða land sitt undir enn fleiri vindmillur.

Afsakaðu þessa löngu athugasemd 

Kveðja

[Ómar Ragnarsson, 3.4.2022 kl. 12:10]

Kær þökk fyrir þessar fróðlegu upplýsingar, sem mikil þörf er á.