Hvað gerði stjórnlagadómstóll Þýskalands?

ÚRSKURÐUR Hæstaréttar Íslands vegna stjórnlagaþingkosninganna 2010 var einsdæmi í Evrópu. Þeir sem studdu þennan dóm sögðu þetta vera merki um það, hve alvarlegir hnökrar hefðu verið á framkvæmd kosninganna. 

Miklu sennilegra er þó, að sagan og frekari rannsóknir muni álykta á hinn veginn, að þetta endemi sýni alvarlegan galla á dómnum. Enda var í engu sýnt fram á það í úrskurðinum, að hnökrarnir í framkvæmdinni hefðu breytt úrslitum kosninganna. 

Þegar dómurinn var kveðinn upp benti Þorkell Helgason á, að stjórnlagadómstóll Þýskalands hefði brugðist mildar við stærri ágöllum við kosningar þar í landi, og ekki ógilt niðurstöður þeirra, heldur mælt fyrir um að agallarnir í framkvæmdinni skyldu lagfærðir í framtíðinni.  

Niðurstaðan vegna hnökranna í Norðvesturkjördæmi í alþingiskosningunum 2021 var á endanum sú að endurtaka kosningarnar ekki, alveg hliðstætt því, sem úrskurðað var í Þýskalandi. 

Þegar Alþingi tók af skarið með þetta nú var skondið að sjá, að margir þeirra sem stóðu að þessari lausn höfðu samt verið svo innilega sammála ógildingarúrskurðinum um stjórnlagaþingkosningarnar 2010! 

Mál á hendur Inga fellt niður

Athugasemdir

[Hörður Þormar (IP-tala skráð) 15.6.2022 kl. 12:22]

Fávís spyr: Hver var munurinn á stjórnlagaþingi og stjórnlagaráði? Hverju breytti hann um  endalok stjórnarskrármálsins?

[Einar S. Hálfdánarson (IP-tala skráð) 15.6.2022 kl. 14:43]

Röng niðurstaða, hafi svo verið, í NV kjördæmi gerir réttan úrskurð Hæstaréttar ekki rangan.

[Ómar Ragnarsson, 15.6.2022 kl. 23:58]

Eins og segir í pistlinum, véfengdi Hæstiréttur ekki úrslit stjórnlagaþingkosningar, heldur úrskurðaði um hnökra á framkvæmdinni.  

Meiri hluti Alþingis ákvað því að skipa stjórnlagaráð á sama hátt og gert hafði verið formlega margsinnis síðan 1946, þ. e. að stjórnarskrarnefnd yrði skipuð en notuð röð þeirra sem voru í efstu 25 sætunum í kosnningunum til að skipa ráðið. 

Það var mikils virði, því að hvert okkar, sem skipuð voru, töldu umboð sitt komið frá þeim sem kusu okkur í stjórnlagaþingkosningunum, en ekki frá einhverjum þingflokki eins og verið hefur í stjórnarskrárnefndum með þeim afleiðingum að engri þeirra hefur tekist að ná árangri.