SÖMU KJÖR FYRIR ÁL OG KÁL!

Þetta var eitt af slagorðum Íslandshreyfingarinnar fyrir síðustu kosningar, komið úr smiðju Jakobs Frímanns Magnússonar og einkum borið fram að ungliðum hreyfingarinnar, sem dreifðu miða með því.

Ekki þarf að fjölyrða um skeleggan málflutning Ástu Þorleifsdóttur og annarra frambjóðenda hreyfingarinnar í kosningabaráttunni á Suðurlandi þar sem hagsmunir garðyrkjubænda eru mestir.

Nú hefur viðskiptaráðherra tekið undir þetta og er það vel.

Það hefur alla tíð verið notað sem afsökun fyrir óheyrilegum verðmun á rafmagni fyrir ál og almenn not að álverin noti orkuna stöðugt allan sólarhringinn árið um kring en ekki mismunandi mikið eftir aðstæðum.

Þetta á ekki við um garðyrkjubændur í sama mæli og aðra almenna notendur og hefði átt að vera búið að jafna þennan mun fyrir mörgum áratugum.

Nú er bara að sjá hverjar efndirnar verða hjá nýjum viðskiptaráðherra.

Athugasemdir

[Arnar (IP-tala skráð) 23.7.2007 kl. 16:12]

Fréttin á Stöð 2 var úr samhengi. Í hádegisviðtali var viðskiptaráðherrann að tala um að "leita leiða"... og tók fram þetta með milljónfalda magnmuninn o.fl. Skilaði sér ekki í fréttina. Niðurgreiðslur ríkisins á raforku til einnar atvinnugreinar? Hvað þá með t.d. bakara og önnur iðnfyrirtæki? Trúir því einhver í alvöru að Björgólfur Thor greiði sömu vexti fyrir lán eins og Jón og Gunna borga? Að Hagar (Bónus, Hagkaup og 10-11) greiði sama innkaupsverð á gosi og það sem félagsheimili Leiknis í Breiðholti greiðir? Ef Íslandshreyfingin vill að ríkið niðurgreiði orkuna til einnar tiltekinnar atvinnugreinar, þá hún um það. Nýi viðskiptaráðherrann virðist vera til í það, enda spurning um hans kjördæmi.

[Árni Gunnarsson, 23.7.2007 kl. 17:14]

Hefði allt verið með felldu væru garðyrkjubændur í dag á fríu rafmagni og hitaveitu.

Þetta fékkst ekki rætt í neinni ríkisstjórn svo langt sem ég man.

Nú er ríkið ekki lengur samningsaðilinn og þá horfir málið öðruvísi við.

Um þetta ætla ég ekki að rökræða við neinn. Þetta er mín skoðun og hefur lengi verið. Og læt mér í léttur rúmi liggja þó ég reynist í andstöðu við alla spekinga okkar.

[Baldvin Jónsson, 23.7.2007 kl. 17:40]

Væri gaman ef einhver gæti rifjað upp með okkur hverjir það voru sem komu fram með hugmyndina upphaflega, þ.e. hugmyndina um sömu kjör til Garðyrkjubænda eins og til Álbræðslu.

Það fylgdi nefnilega á sínum tíma þeim hugmyndum upplýsingar um framlegðina sem það myndi skapa og það var verulegur tekjuauki fyrir ríkið og skapaði margfalt fleiri störf en álbræðsla gerði miðað við sömu orkunotkun.

Framleiðsla blóma, ávaxta jafnvel og grænmetis í gróðurhúsum hefði þá alla burði til að keppa við framleiðslu annarsstaðar í heiminum.  Væri ekki gaman t.d. að geta keppt við Hollendinga í blómaframleiðslu?  Frá Hollandi eru flutt út 70 milljón blóm á hverjum einasta morgni. Væri það ekki verðugt verkefni að stefna að því?

[Hans Haraldsson (IP-tala skráð) 23.7.2007 kl. 21:29]

Skyldi það hafa eitthvað að gera með það að álvinnslan er í sterkari samningsstöðu vegna þess að fyrirtækin eru stórkaupendur?

Auk þess vil ég minna á að álvinnsla er atvinnugrein sem er samkeppnishæf á heimsmarkaði og færir þjóðarbúinu tekjur. Ef það yrði tekin pólitísk ákvörðun um að láta orkufyrirtækin selja garðyrkjubændum orku á sama verði og áliðnaðinum myndi það líklega leiða til verðhækkana þar fyrr eða síðar. Mér finnst það ekki góð hugmynd að láta alvöru atvinnugrein greiða niður aðra atvinnugrein sem er háð tollvernd nú þegar.

[Ingimundur Kjarval (IP-tala skráð) 24.7.2007 kl. 02:39]

Ég hef velt þessu fyrir mér með raforkuverðið til garðyrkjubænda. Hvers vegna stofna þeir ekki samtök sem gætu svo samið um verðið fyrir hönd þeirra, þar með orðnir stórkaupendur. Þeir gætu jafnvel fjárfest í rafokruveri eða fengið viðskiptaaðila til að fjárfesta með þeim. Ef að þetta er eins góð fjárfesting og haldið er fram, ætti ekki að vera mikið mál að koma þessu af stað, íslenskir fjárfestar vaðandi í pening. Ég get ekki séð neinn setja sig upp á móti raforkuveri til blómaræktunar, eða hvað. Kv. Ingimundur Kjarval

[Árni Gunnarsson, 24.7.2007 kl. 12:48]

Hvort ætli að skapi þjóðinni betri ímynd, álver aða blómleg garðyrkja?

[Jón Magnússon, 24.7.2007 kl. 13:31]

Að sjálfsögðu eiga íslenskir garðyrkjubændur að fá raforku á góðu verði. En það þarf að gera fleira. Það þarf að athuga það að aðföng til framleiðslunnar séu á svipuðu verði og erlendir samkeppnisaðilar fá þau. Síðan verður að gera þá kröfu að íslenskir neytendur fái framleiðsluna á sama verði og sömu vörur erlendis.

En þá er spurningin hvað með annan iðnað í landinu. Á hann ekki líka rétt á því að njóta sömu kjara. Kálverið verður að vera á sömu kjörum og bakaríið hvað orkuverð varðar.

[Theódór Norðkvist, 24.7.2007 kl. 16:13]

Munurinn á samanburðinum milli álvera og garðyrkjubænda annarsvegar og garðyrkjubænda og bakaría hinsvegar, er sá að rökin fyrir lægra orkuverði til garðyrkjunnar eru manneldis- og umhverfissjónarmið.

Þungaiðnaður mengar, en matjurtarækt er umhverfisvæn, a.m.k. sú lífræna. Í bakaríum er að stórum hluta seld óhollustuvara, s.s. kökur og snúða, þó brauðin séu yfirleitt holl. Menn verða samt feitir af of miklu brauðáti, en það þarf að borða mjög mikið af ávöxtum og grænmeti til að fitna af því.

[Geir Guðmundsson (IP-tala skráð) 25.7.2007 kl. 15:26]

Það myndi ekki gagnast garðyrkjubændum mikið til að lækka raforkuverð, að kaupa sameiginlega raforku frá almennu orkufyrirtæki sem byggði orkuver sem væri fjármagnað með einkafjármagni. 

Ástæða þess að hægt er að bjóða álverum jafn ódýrt rafmagn og talið er, er eingöngu vegna þess að lán Landsvirkjunar vegna Kárahnjúkavirkjunar eru ríkistryggð og arðsemiskrafa Landsvirkjunar er langt undir eðlilegri ávöxtunarkröfu á markaði.   Það myndi ekkert einkafyrirtæki treysta sér í að reisa og reka Kárahnjúkavirkjun á því raforkuverði sem verið er að bjóða Alcan.  Það má því segja að við séum að niðurgreiða rafmagnið til stóriðjunnar, en hins vegar væri ólíklegt að stóriðjan myndi koma til landsins ef raforkuverðið væri á eðlilegu verði.  Tapið er því fyrst og fremst í glötuðum náttúruperlum og mögulegum framtíðar tekjum af þeim.   

[Gunnar Th. Gunnarsson, 31.7.2007 kl. 16:36]

Þegar ég var í Garðyrkjuskóla Ríkisins fyrir um 20 árum síðan þá velti ég því mikið fyrir mér þetta með raforkuverð til garðyrkjubænda. Það væri gaman að fá að sjá heildar orkukaup greinarinnar (o.fl., bakara, húsbyggjenda o.s.fr.v.) Einnig væri gaman að sjá hvert hlutfall orkukaupa er við heildar framleiðsluverð hjá ýmsum atvinnugreinum.

Mér finnst ástæðulaust að að niðurgreiða orkuverð til fyrirtækja ef það skilar sér ekki að fullu til neytenda.