ÞAÐ SEM ER ÓLÍKT MEÐ ÞESSARI ÚTRÁS OG HINNI.

Útrás orkufyrirtækja hefur að undanförnu verið borin saman við útrás fjármálafyrirtækja. Sumt er líkt með þessu tvennu en annað ólíkt. Talsmenn sameiningar REI og GGE hafa sagt hana nauðsynlega til að þessi fyrirtæki "níði ekki af hvort öðru skóinn". Samt hafa þessi orkufyrirtæki forskot á erlenda keppinauta hvað snertir tækniþekkingu og reynslu en á sínum tíma gátu íslensku fjármálafyrirtækin haslað sér völl erlendis án þess að sameinast í eitt fyrirtæki, þótt þau væru í samkeppni við miklu stærri erlend fyrirtæki sem bjuggu yfir mikilli reynslu og aðstöðu. 

Vandamál íslensku orkufyrirtækjanna í útrásinni verður sennilega fólgið í því að velja úr verkefnum erlendis fremur en að keppa við hvort annað um þau, slík er stærðargráða þessa verkefnis í öðrum löndum.  

Hin raunverulega skýring á leiftursókninni sem hefur sett allt á annan endann er líklega sú að öflugir auðmenn hafa séð möguleika á að ná undir sig bæði útrásinni sjálfri og ekki hvað síst orkuauðlindunum, sem Hitaveita Suðurnesja og önnur orkufyrirtæki ráða nú yfir.

Af þessu sökum er sérstök ástæða fyrir Íslendinga til að vanda öll vinnubrögð í þessum málum svo að við vöknum ekki upp við þann vonda draum um síðir að eitt fyrirtæki, t. d. Ríó Tintó, eigi allar íslenskar virkjanir og orkuauðlindirnar með.

Hinir ótrúlegu atburðir síðustu daga sýna að full ástæða er til aðgæslu í þessum efnum og þess vegna hýtur það til dæmis að vera fráleitt að rjúka upp til handa og fóta og selja með hraði eigur almennings í hendur auðmanna á eins konar "brunaútsölu" eins og Dagur B. Eggertsson hefur orðað það.

Fyrst þarf að setja vandaða löggjöf sem neglir niður eignarhald þjóðarinnar á orkuauðlindunum og nýjar leikreglur opinbers rekstrar og einkarekstrar á þessu sviði og reglur um samvinnu fyrirtækja með ólík rekstrarform.

Við eigum að varast það sem gerðist 1983 þegar menn gerðu sér ekki grein fyrir því hvað fólst raunverulega í því að úthluta án endurgjalds auðlindum hafsins.  

 

 

 

Athugasemdir

[Sævar Helgason, 10.10.2007 kl. 14:22]

Það er alltaf að koma betur og betur í ljós að þessir "kaupréttarsamningar " sem umræðan öll hefur snúist um síðustu daga varðandi þessa útrásarútfærslu á verkþekkingu okkar á sviði jarðvarma  er alls ekki mál málanna í þessum gerningi öllum.

Það eru sjálfar virkjanirnar og orkuauðlindirnar sem fjármálaöflin eru á höttum eftir, að eignast allan pakkann...og þessu hraði í "skjóli nætur " að negla gerninginn niður er framkvæmdur að löngum og víðtækum undirbúningi loknum. Allt er þetta að verða skýrara.

Taflmenskan er  svo vel útfærð að ef þetta REI dæmi klikkar ,að þá er næsti leikur að slá eign sinni á Hitaveitu Suðurnesja ..eina með öllu og þar með orkuauðlindum Reykjanesskagans.

Það eru stóratburðir í gangi.  Hvar er  Iðnaðarráðherra með  frumvarpið sem á að taka á þessum vanda sem við blasir ?