MÓTSAGNIR OLÍUGRÓÐAVONARINNAR.

Fróðlegt er að fylgjast með gróðavonum Íslendinga vegna hugsanlegra olíulinda norður af landinu. Á sama tíma er rætt um að við verðum að leggja okkar af mörkum til að minnka losun gróðurhúsalofttegunda. Ef framlagið felst í því að auka framleiðslu á þeim orkugjafa sem veldur mestri loftmengun er um augljósa mótsögn að ræða. Mótsagnirnar eru fleiri.

Við mótmælum harðlega hverju því sem valdið gæti mengun í hafinu við landið, svo sem vegna Sellafield-stöðvarinnar á Skotlandi en dollaraglampinn skín úr augum okkar við tilhugsunina um olíugróða sem byggist jafnvel á "rússneskri rúllettu" hvað varðar þekkingu á hafsbotninum og ekki síður hvað varðar tæki til að verjast mengun vegna olíuslyss.

Og gróðaglampinn vex enn við tilhugsunina um að með tilkomu olíulindanna muni skapast möguleikar á að reisa hér olíuhreinsistöðvar á sama tíma og þjóðirnar sitt hvorum megin við Atlantshafið reyna að bægja frá sér slíkum stöðvum.

Ég biðst afsökunar ef ég hef verið full snöggur að því að fara mótsagnanna á milli. Ragnar Reykás tækis sér kannski svolítið lengri tíma.

Athugasemdir

[Gunnar Th. Gunnarsson, 19.10.2007 kl. 13:48]

Þú ert sem sagt á móti því að við nýtum okkur olíuauðlindir við Ísland ef þær finnast?

[Ómar Ragnarsson, 19.10.2007 kl. 18:35]

Iðnaðarráðherra sagði í útvarpsfréttum áðan að ekkert myndi gerast í þessum málum hér fyrr en 2011 og ég held að við ættum að bíða þar til 2012 þegar séð verður hvernig þessum málum reiðir af á alþjóðlega vísu. Olían fer ekkert á meðan ef hún er þarna.

Þótt tryggt yrði að olíuvinnslan skapi enga áhættu vegna olíuslyss eða öryggis er ekki víst að það sé verjandi að fara út í þetta "ævintýri."

Það verður að huga að þvi hvers virði sú viðskiptavild er fyrir þjóðina sem fæst vegna þess að hún sé í fararbroddi í umhverfismálum og baráttunni gegn hinni of hröðu heimshlýnun. Henn má að mínu mati ekki fórna fyrir happdrættishegðun í von um vafasaman skammtímagróða.

Sú staða kynni samt að koma upp að síðar meir yrðu not fyrir olíu af Íslandsmiðum á umþóttunanartímanum frá notkun jarðefnaeldsneytis yfir í orkugjafa sem ekki skapa gróðurhúsalofttegundir.

Aðalatriðið er að hafa hreinan skjöld og koma út úr þessu með fullum heiðri og sóma sem ekki er hægt að meta til fjár.