GÓÐ GREIN DOFRA.

Grein Dofra Hermanssonar í Morgunblaðinu í dag um Ölkelduháls er afar kærkomin því hún varpar skýru ljósi á svonefnda Bitruvirkjun. Samkvæmt greininni höfðu nefndarmenn í rammaáætlunarnefndinni ekki tíma til að skoða myndir af svæðinu eða kynna sér það að gagni. Þó voru til kvikmyndir af því sem ég notaði í innslag í Dagsljósi um það. Þetta er enn ein áminningin um það hvaða afleiðingar það hefur að spara svo við sig í vinnu og fjármagni við að skoða íslenska náttúru að teknar eru ákvarðanir byggðar á röngum forsendum.

En það liggur svo óskaplega mikið á að reisa hvert risaálverið af öðru að hvorki er tími né vilji fyrir því að láta svo lítið að kynna sér það sem fórna á fyrir stóriðjuguðinn.

Mér skilst að Dofri hafi átt stóran þátt í "Fagra Íslandi" og eiga hann og skoðanasystkin hans í Samfylkingunni skilið að því sé haldið á lofti og þakkað fyrir það.

Í samstarfi við stóra stóriðjuflokkinn mun ekki veita af baklandi fyrir Þórunni Sveinbjarnardóttur í því andófi sem hún lýsti yfir á Umhverfisþingi að hún myndi stunda í ríkisstjórninni eins og tíðkast hjá umhverfisráðherrum í öðrum löndum.

Athugasemdir

[Dofri Hermannsson, 3.11.2007 kl. 00:05]

Takk fyrir þetta Ómar.
Það var líka gott að sjá boggið þitt um Bitruvirkjun og hin fjölmörgu komment við þá færslu. Hvort tveggja er mikilvægt innlegg í umræðuna. Fyrir þá sem vilja er greinin sem Ómar vísar í komin á bloggið www.dofri.blog.is 

[Dofri Hermannsson, 3.11.2007 kl. 00:08]

PS. Græna netið - samtök jafnaðarmanna innan sem utan flokka um náttúruvernd halda fund á Kaffi Hljómalind kl. 11 í fyrramálið þar sem Svanfríður Jónasdóttir situr fyrir svörum um hvernig á að haga framkvæmd hinnar boðuðu Rammaáætlunar um náttúruvernd og aðra nýtingu verðmætra svæða. Það er mikilvægt að þar verði vandað betur til verka en gert var með Ölkelduháls.

[Sigurður Hr. Sigurðsson (IP-tala skráð) 4.11.2007 kl. 00:33]

Ég er sömuleiðis mjög ánægður með þessa grein hjá Dofra og vona að hún hreyfi við því fólki innan Samfylkingarinnar sem nú situr í ríkisstjórn. Ólíkt Einari tel ég ekki að orustan sé töpuð og treysti á að mörg góð rök gegn þessum virkjunum berist Skipulagsstofnun í tæka tíð. Ef úrskurðurinn verður gegn virkjunum við Bitru og/eða Hverahlíð eru engar líkur á öðru en að Þórunn slái þær af. Aldri aftur Framsóknarflokkinn í Umhverfisráðuneytið!