HVE MARGIR EIGA LEIÐ TIL HVAMMSTANGA ?

Var að koma úr leiðangri til Sauðárkróks og Blönduóss til að árita nýjar Stiklur og undraðist í ca 800. skiptið á því að hvergi á þessari leið sér ókunnugur vegfarandi hve langt er til Staðarskála eða Bifrastar en hins vegar er þess skilmerkilega getið á skiltum hve langt er til Hvammstanga en þangað eiga kannski 1-2% vegfarenda leið. Á leiðinni milli Borgarness og Blönduóss eru það líklega vel yfir 90% vegfarenda sem kæmi sér vel fyrir að vita hve langt er í veitinga- og bensínsöluna í Hrútfirðinum, sem er helsti áfangastaðurinn á þessum kafla hringvegarins. 

Þetta sést að vísu á litlu bláu skilti rétt áður en komið er að sunnan að Brú, og þá eru aðeins 5km eftir í Staðarskála og Brú er nokkur hundruð metra í burtu. 

Sjálfum væri mér nákvæmlega sama þótt engin skilti væru, - undrast þetta bara fyrir hönd þeirra sem myndu njóta forgangs hins gríðarlega stóra meirihluta sem þarf á þessum upplýsingum að halda frekar en það hve langt sé til Hvammstanga.

Ef það er atriði í málinu að Hvammstangi sé þorp er það ekki nægileg röksemd fyrir því að taka þennan stað fram yfir helstu áfangastaði á leiðinni. Í Bifröst er líka fjölmenni í vaxandi þorpi og aðeins er 1km frá hringveginum að bensínsölu og sjoppi í þorpinu á Laugabakka í Miðfirði sem hugsanlega kæmi sér vel fyrir bensínlítinn eða þurfandi vegfaranda að vita um.

Í Víðihlíð og Baulu er líka þjónusta sem margfalt fleiri þyrftu að vita um en Hvammstanga.  

Á þessa staði færi vegfarandi frekar til að fá slíka þjónustu en 6km fram og aðra 6km til baka út á Hvammstanga.

Hvammstangabúar fara það oft um næstu kafla hringvegarins að þeir vita vel um fjarlægðina heiman og heim. En þeir eru bara samt það fáir að umferð þeirra um hringveginn er eins og ég giskaði á áðan, líklega aðeins milli 1 og 2% af heildinni.

Með þessu er ég ekki að gera lítið úr Hvammstanga og leiðinni út fyrir Vatnsnes sem er vel þess virði fyrir ferðafólk að skoða. En yfir 90% erinda um þennan kafla hringvegarins snýst um gang og skipulagningu ferðarinnar eftir hringveginum án útúrdúra.

Auðvitað væri gott að sem mestar upplýsingar um vegalengd til flestra staða væri að sjá á hringveginum en það verður að forgangsraða og hafa í huga að þjónusta þann hóp best sem stærstur er og mest þarf á upplýsingum að halda, en það eru vegfarandur, sem ekki þekkja vel til vegalengda á leiðinni. Og þeir eru sko margir á okkar tímum þegar æ fleiri vita lítið um lífið utan suðvesturhornsins og íþrótta- og skólakrakkar eru upplýstir um það hve langt sé í Staðarskála með því að segja að þangað sé "tveggja spólu ferð" frá Reykjavík. 

Ég gæti alveg fellt mig við það að á einu skilti sitt hvorum megin við Hvammstanga væri greint frá vegalengdinni þangað og bætt við skiltum sem greina frá vegalengdum til áfangastaðanna í Hrútafirði eða jafnvel fleiri áfangastaða á leiðinni Borgarnes-Blönduós.  

Eins og áður sagði er Hvammstangi að þessu slepptu hinn merkasti staður og þegar ég var ungur heyrði ég dæmi um gott tilsvar þegar Stefán Íslandi átti tal við mann sem hann þekkti ekki, og sýndist sá maður ekki vera merkilegur. Stefán var þá heimsfrægur á Íslandi og meðvitaður um það, enda innistæða fyrir því.

Hann sagði við viðmælanda sinn, hnarrreistur og stoltur: "Veistu ekki hver ég er? Ég heiti Stefán Íslandi." Hinn rétti þá úr sér og horfði stoltur framan í stórsöngvarann og sagði: "Ég heiti Magnús Hvammstangi."

Hentu þeir sem viðstaddir voru gaman að því að við þetta varð Stefán alveg kjaftstopp. 

Svona minnir mig að mér hafi verið sögð þessi saga og síðan hefur mér alltaf þótt svolítið vænt um Hvammstanga og fólkið þar og þykir enn, þrátt fyrir þennan vegaskiltapistil. Ég bið bara um það að fólk fái að vita um vegalengdina til fleiri staða en þangað á þessum hluta hringvegarins.

Athugasemdir

[Steini Briem (IP-tala skráð) 16.12.2007 kl. 05:24]

Alla vega sagði Matti Jó söguna svona á Mogganum og þótti alltaf jafn fyndin. Hins vegar ætti að standa með tíu kílómetra millibili á öllum hringveginum hversu langt er til Vítis, því þangað fara allir, fyrr eða síðar.

[Þórður Ingi Bjarnason, 16.12.2007 kl. 08:47]

Ég er sammála þér Ómar.  Ég keyri þessa leið oft þar sem ég bý í Skagafirði.  Við sem erum mikið á ferðinni þurfum þessar upplýsingar ekki, en það er fullt af fólki sem þekkir landið ekki neitt og fyrir það er nauðsýnlegt að hafa góðar merkingar.  Það eru ekki nema tvö ár síðan að gott merki kom sem seigir hvað sé langt heim að Hólum. 

[Margrét (IP-tala skráð) 16.12.2007 kl. 10:30]

Eitt sinn skrifaði ég einn lítinn letters pistil í Mbl(velvakanda) um afgreiðsluna og viðurgjörninginn í Staðarskála.. Þá birtust ein 3 varnarbréf frá eh sveitungum og vinum skálans.

Hjörtur Hovser skrifaði síðan litla grein í Mannlíf og lýsti því hve ömurleg matsalan væri og að hinir ungu krakkar höfðu meiri áhuga á að tuskast sín á milli ,en að afgreiða ferðalanginn.

Mig langar að auglýsa eftir drekkandi kaffi,þá meina ég kaffe latte og þannig  drykkjum,veit að nóg er til hér í landinu af postulíni og vélum er sjóða vatnið og þrýsta því síðan niður í gegn um kaffiduftið.                                                                       Nenni ekki að borga 300 kr fyrir þennan drykk úr könnu með pumpu afgreitt í frystihúskönnum. ! Annars,eiga bensínsjoppur eingöngu að fara með matsölu hér við þjóðvegina ?

Síðan,þá hef ég ávallt nestið með og heita drykki einnig.! 

[Kjartan Pálmarsson, 16.12.2007 kl. 10:41]

Ef maður reynir að setja sig í bílstjórasæti erlends ferðamanns t.d. þá er þörf á að merkja þjóðvegina upp á nýtt, því ekki bjóða Norðurlandaþjóðirnar né aðrir í næsta nágrenni við þau upp svona ,,engar''upplýsingar.

[Ása Hildur Guðjónsdóttir, 16.12.2007 kl. 11:48]

Algerlega sammála þér Ómar. Það þurfa  að vera merkingar um hversu langt sé á næstu bensínstöð og helstu áfangastaði. Frekar en Bæi sem liggja ekki við hringveginn. Þó þeir séu allra góðra gjalda verðir.

[Nöldrarinn (IP-tala skráð) 16.12.2007 kl. 16:59]

Leysist þetta ekki af sjálfu sér þegar vegurinn fer norður Kjöl, því það á jú enginn erindi norður í land nema til Akureyrar - þau sem eiga önnur erindi vita hvert þau eru að fara, ekki satt? 

[Guðmundur Jóhannsson, 16.12.2007 kl. 18:16]

Athugasemdin er ágæt en það er reglan í merkingum um allan heim að merkja vegalengdir til næsta "stóra" bæjar eða borgar.  Á korti sést að Hvammstangi er bær á leiðinni frá Borgarnesi til Blönduós og því er hann notaður sem kennileyti.  Algengt er erlendis að merkja hve langt er í næsta matsölustað eða bensínstöð og það mætti gjarnan bæta á Íslandi.  Hér í landi öfgana (USA) eru merkjafarganið fáránlegt og mikil ofnotkun á alslags upplýsingamerkjum "auglýsingum" sem eru meðfram öllum vegum og eru lýti í umhverfinu. 

Þar sem þú veist svo margt Ómar, segðu mér er komið í gagnið heima nýtilegt leiðsögukerfi í GPS, "Never lost" eða Navigation á Enskunni.

[Guðjón Sigþór Jensson, 17.12.2007 kl. 09:02]

Fyrir fyrri vinstristjórn Ólafs Jóhannessonar (1971-74) voru upplýsingar um fjarlægðir milli staða ákaflega fáar og fremur ómerkilegar. Þá var samgönguráðherra Halldór E. Sigurðsson fyrrum kaupfélagsstjóri í Borgarnesi. Hann tekur þessa ákvörðun að hefja átak í þessum málum. Enn þann dag í dag má víða sjá á Íslandi hversu fjarlægðin er löng til Borgarness en Reykjavíkur ekki jafn oft getið! Á þessu þyrfti að ráða bót hið snarasta enda þótt Borgarnes sé ágætur staður til að gera stuttan eða lengri stans á ferð um landið.

Spurning um hvort Hvammstangi, um 2 km frá þjóðvegi 1, sé betra kennileiti en t.d. bærinn Gauksmýri í Línakradal þar skammt austur frá. Þar er t.d. mjög athyglisverður áningarstaður fyrir þá sem unna náttúru og vilja gjarnan skoða merka og sérstæða náttúru. En það er ekki áhugamál allra þeirra sem um þjóðveginn fara fremur en þeirra sem eiga erindi til Hvammstanga. Þetta sýnir auðvitað hve stutt er síðan samgöngur komust á það stig að unnt væri að komast lengra en eina þingmannaleið (36 km) sem þótti fyrrum þokkalegur dagsáfangi. Þá voru leiðir fleiri þar sem ferðamenn þræddu heiðar, fjallaskörð, straumharðar ár og aðra farartálma sem á leiðinni voru.

Með bestu kveðjum

Mosi - alias

[Ómar Ragnarsson, 17.12.2007 kl. 21:17]

Hvammstangi er 6 km frá hringveginum en ekki 2 km. Á þessu er svo mikill munur að ég hefði ekki farið að blogga um þetta mál nema vegna þess hve fáir af heildarfjöldanum aka þessa 2x6 km, alls 12 km.