POPPLAG Í D-DÚR, ENGIN LEIÐ AÐ HÆTTA.

Stuðmenn sungu um það að engin leið væri að hætta í popplagi í G-dúr. Nú syngja stuðmenn íslenskra stjórnmála popplag í D-dúr og það er engin leið að hætta að ráða trekk í trekk "innvígða og innmúraða" í helstu embætti íslenska dómskerfisins. Með þessu er ekki sagt að það sé einhlítt að umsagnaraðilar hafi ávallt rétt fyrir sér um mismikla hæfni umsækjenda og þess vegna kann vel að vera að Þorsteinn Davíðsson muni reynast jafn vel í embætti og til dæmis hinn umdeildi og óreyndi Pálmi Hannesson eftir að hann var ráðinn rektor Menntaskólans í Reykjavík og í ljós kom í áranna rás að hann gegndi starfinu af mikilli reisn og virðingu. 

Þegar það er hins vegar farið að nálgast reglu að þegar hinir innvígðu sækja um séu þeir teknir fram yfir aðra, sem umsagnaraðilar telja hæfasta, er hverjum þeirra sem um sig, sem ráðnir eru, enginn greiði gerður með svona háttalagi, nú síðast Þorsteini Davíðssyni.

Hér á árum áður voru nánast allir sýslumenn landsins og dómarar úr helmingaskiptaflokkunum Sjálfstæðisflokki og Framsóknarflokki. Ævinlega var hægt að benda á að hver þeirra væri hæfur til starfans en það var vafalaust líka hægt að gera í Sovétríkjunum þar sem aðeins voru ráðnir menn sem voru "innvígðir" félagar í kommúnistaflokknum.

Að því leyti til var íslenska kerfið verra en það sovéska að þar í landi var ekkert verið að fela það að aðeins félagar í kommúnistaflokknum gátu fengið embætti. Það var bundið í lög í landinu þar sem allir áttu að vera jafnir en í ljós kom að sumir voru svo miklu jafnari en aðrir að á endanum molnaði þetta kerfi innan frá.   

Athugasemdir

[Steini Briem (IP-tala skráð) 21.12.2007 kl. 22:04]

Sómafólk, allt það fólk.

[Anna Benkovic Mikaelsdóttir, 21.12.2007 kl. 22:13]

já annað hvort á að sleppa matsnefndum eða taka þær alvarlega...þetta gengur ekki!

[Valgerður Halldórsdóttir, 21.12.2007 kl. 22:31]

Nú er það bara gleðileg jól ágæti bloggvinur

[Anna Benkovic Mikaelsdóttir, 21.12.2007 kl. 22:36]

já......GLEÐILEG JÓL og takk fyrir frábæra pistla á árinu!

[Anna Benkovic Mikaelsdóttir, 21.12.2007 kl. 23:13]

Bjarni...segjum að Dómnefndin hafi rett fyrir sér....hefdur þú að Árni "hetja" víki???

[Anna Benkovic Mikaelsdóttir, 22.12.2007 kl. 00:11]

Bjarni , ég er þér alveg sammála.  ER handviss um að ÞorsteinnDavíðsson er besti drengur, en ég veit af minni reynslu sem dóttir innflytjenda að ég hefði ALDREI verið ráðin af fjármála-dómsmálaráðherra ...sem 4-5 hæfasti umsækjandi! 

Þetta er bjarnargreiði góðum dreng!

[Kjartan Pétur Sigurðsson, 22.12.2007 kl. 00:28]

HALLÓ! ... við búum á Íslandi :)

[Anna Benkovic Mikaelsdóttir, 22.12.2007 kl. 00:47]

vil líka taka fram að Þorsteinn Davíðsson á ekki, aldrei að GJALDA ÞESS að vera sonur föður síns...frekar en ég að vera dóttir föður míns

[Ómar Ragnarsson, 22.12.2007 kl. 01:04]

Þetta er rétt hjá þér, Anna, að fólk á HVORKI að gjalda þess né njóta hverra manna það er, heldur að vera metið af eigin verðleikum. Ég er í pistli mínum eingöngu að gagnrýna það heildardæmi að í öll þau skipti sem einhver innvígður sækir um er stöðuveitingin þeim hinum sama í vil.

Þú orðar það svo að þetta sé bjarnargreiði góðum dreng og ekki efa ég það að Þorsteinn er drengur góður eins og hann á svo sannarlega kyn til. Hann geldur þess nú hvernig stöðuveitingarnar hafa verið til þessa en málið hefði horft öðruvísi við ef í bara eitt skipti af þessum fyrri skiptum hefði ekki verið valinn sá innvígði.

[Anna Benkovic Mikaelsdóttir, 22.12.2007 kl. 01:10]

já svona sé ég það og er alin upp við Ómar! Þetta er góðum dreng bjarnargreiði?

[Kjartan Pétur Sigurðsson, 22.12.2007 kl. 01:22]

Gleðileg jól og takk fyrir skemmtilegt bloggár :)

[Rómverji (IP-tala skráð) 24.12.2007 kl. 01:24]

Málið snýst ekkert um innræti Þorsteins Davíðssonar. Hér er  blasir einfaldlega við SPILLING.