ÞYRFTU AÐ FARA Í MEÐFERÐ.

Ég vorkenni þeim mönnum sem varpa skugga á sjálft jólahaldið hjá samsveitungum sínum með skemmdarverkum. Þeir hljóta að eiga bágt sálarlega og eru sennilega haldnir áráttu sem þeir ráða ekki við og þyrftu að fara í meðferð til að lækna. Það er spurning hvort hér er um sömu menn að ræða og farið hafa með skemmdarverkum um Austurland undanfarin ár, allt frá Kringilssárana til Háreksstaða og Reyðarfjarðar. Í apríl-maí 2006 var ráðist á "Rósu", Feroza-jeppann minn í Kringilsárrana og hann grýttur og skemmdur, síðan aftur þegar hún var komin á land hinum megin við Hálslón og þá tekin undan henni öll hjól og þeim stolið.

Loks var stolið utanborðsmótor af Örkinni nú í haust þar sem hún stóð við vinnubúðir Suðurverks. Ég hef heyrt um skemmdarverk á bílum, sem hafa verið skildir bilaðir eftir á Háreksstaðaleið.

Skemmdarverkin hafa verið unnin það víða að skemmdarvargarnir hljóta að ráða yfir góðum og öflugum fjallabílum, - annars hefðu þeir til dæmis ekki verið á ferð í Kringilsárrana á þeim tíma sem aðeins jöklajeppar komast þangað.

Annað einkenni er að skemmdarverkin hafa alltaf verið unnin á frídögum eða um helgar. Það bendir til að Bakkus eigi hlut að máli hjá einhverjum þeirra.

Gott fólk og gott samfélag á Austurlandi eiga ekki skilið að svartir sauðir varpi skugga á það.

Skemmdarvargar á Reyðarfirði

Athugasemdir

[Halldór Egill Guðnason, 27.12.2007 kl. 00:08]

Ömurleg árátta hjá fólki að láta svona. Litlar sálir og dusilmenni.

[Jónína Dúadóttir, 27.12.2007 kl. 08:24]

Ömurlegt, vona að það komist sem fyrst upp um þessi fól

[Ómar Ragnarsson, 27.12.2007 kl. 09:25]

Hugarfar Ragnars Arnar blómstraði í Sovétríkjunum sálugu. Þar gátu menn ekki skilið að neinn gæti verið með efasemdir um sovétkerfið og voru hinir sömu því settir í meðferð á geðsjúkrahúsum. 

Samkvæmt skilningi Ragnars á náttúruverndarfólk bágt sálarlega og það að við höfum skoðun kallar hann að við höfum hana "sjálfkjörin."

Það að hafa skoðun er af og frá að dómi Ragnars ef hún er öðruvísi en skoðun hans og hans líka. Við eigum auðvitað ekki að vera svo stór upp á okkur að opinbera skoðanir okkar heldur hafa þær með okkur í leynum svo að enginn sjái að við höfum "sjálfkjörið" okkur til baráttu fyrir skoðunum okkar. 

Ragnar Örn og hans skoðanasystkin þurfa hins vegar ekki að óttast að vera kölluð "sjálfkjörin" þegar skoðanir þeirra og barátta þeirra fyrir þeim er annars vegar.

Þaðan af síður eru skoðanir þeirra árátta sem þau ráða ekki við.

Þegar Ragnar Örn heyrir um afbrot dettur honum fyrst ég og mín skoðanasystkin í hug og að við þurfum að fara í sovéska meðferð, væntanlega á Kleppi.

Mikið ætti nú lýðræði Ragnars gott ef við gerðum svo vel og hættum að tjá skoðanir okkar.  Ég hef samt ekki hugsað mér að fara að ráðum hans og bíð spenntur eftir því hvort næsti leikur hans gagnvart mér og mínum líkum verði svipuð og þeirra sem beittu sér fyrir því að Jónas frá Hriflu yrði settur á Klepp.  

[Ólafur Björnsson, 28.12.2007 kl. 09:22]

Þú mátt nú alveg, Ómar minn, gera aðeins minna af því að predika því þetta er orðið afskaplega leiðinlegt á að hlýða. Ég kunni ágætlega við þig í Stiklum og sem spyril í spurningakeppnum.

Nú gerirðu lítið annað en að predika daginn út og inn yfir ótrúlegustu hlutum.

Hvað varð um hinn síhressa Ómar?