ORÐ ÁRNA AÐ ENGU HÖFÐ? EÐA GABB?

Orð Árna Mathiesen á vef Morgunblaðsins í gær um að hann sé reiðubúinn að ræða við vöruflutningabílstjóra virðast ekki minnka lætin í þeim ef marka á þá yfirlýsingu þeirra nú að þeir muni sturta nógu mikilli möl fyrir framan Alþingi í dag til að 4x4 jeppamenn geti spólað á jeppum sínum í þeirri torfæru sem þar muni skapast. Með þessu ætla bílstjórarnir að stjórna aðgerðum 4x4 og þvinga jeppamenn til mjög svo vafasamra aðgerða sem aldrei hafa verið ræddar í þeirra hópi svo mér sé kunnugt.

Nema þetta sé bara aprílgabb Morgunblaðsins? Hver veit?

Sé svo er það samt í stíl við aðgerðir bílstjóra hingað til þegar þeir hafa ráðskast með tugþúsundir vegfarenda að vild undanfarna daga og skapað hættu fyrir sjúkraflutningamenn og slökkviliðsmenn að eigin geðþótta í trausti þess að lögregla aðhafist ekkert.

Bílstjórunum virðist ekki nægja að sá ráðherra sem málið heyrir undir ræði við þá heldur eigi aðir ráðherrar og alþingismenn að taka við sér, og þá væntanlega með tafarlausri lagasetningu, - eða hvað?

Kannski er þetta bara aprílgabb líka hjá bílstjórunum sjálfum eða sameiginlegt gabb Morgublaðsins og þeirra og allt í lagi með það, en stanslausar aðgerðir þeirra undanfarna daga, nú síðast við Höfn í Hornafirði, hafa ekki verið gabb.

Ég spyr bílstjóra: Hafa þeir, eins og aðrir kjósendur, óskað eftir viðtalstímum við alþingismenn og ráðherra? Eða nægir bílstjórum ekkert minna en að taka lögin algerlega í sínar hendur í trausti þess að lögreglan muni sem fyrr láta þá komast upp með það, einir mótmælenda hér á landi, að taka enga ábyrgð á gerðum sínum?

Það gerðu þú þingeysku bændurnir á sínum tíma sem sprengdu stífluna í Miðkvísl.

Sturta möl fyrir framan Alþingi

Athugasemdir

[Haraldur Bjarnason, 1.4.2008 kl. 08:49]

Ómar þú mætir á Fiat, Suzuki eða einhverju öðru litlu og spólar 

[Bart Skofe (IP-tala skráð) 1.4.2008 kl. 09:30]

Þú segir :"Ég spyr bílstjóra: Hafa þeir, eins og aðrir kjósendur, óskað eftir viðtalstímum við alþingismenn og ráðherra?"  það veit hver heilvita maður að ef þú pantar viðtal þá tekur 6 - 8 mánuði að fá tíma og eiga menn bara að bíða.

Maður gleðst yfir því að loksins þá láta menn ekki vaða yfir sig og grípa til aðgerða sem hefði verið fyrir löngu tímabært að gera.

Og hvernig dettur þér í hug að  menn taki mark á Árna eftir það sem undan er gengið.

Ganga menn ekki heilir, ja maður spyr sig.

[Gísli Baldvinsson (IP-tala skráð) 1.4.2008 kl. 10:38]

Það er ekkert gabb hér á Akureyri, held ég. En margir ætla í sund...

[Kjartan Pétur Sigurðsson, 1.4.2008 kl. 18:18]

Ómar fattar það ekki að hann hefur stöðu sinnar vegna mun greiðari aðgang að þessum sömu þingmönnum en þeir ökumenn sem standa í mótmælum þessa dagana.

Ég er mjög ánægður með að íslendingar hafi loksins nennu til að rísa upp á afturlappirnar og taka sig saman og mótmæla einhverju? Venjulega er þrælslundin þeim svo í blóð borin að það er aldrei sagt eitt eða neitt, sama hvað á gengur hjá yfirvöldum þessa lands!

Mig grunar nú að þeir sem voru í fararbroddi fyrir þessum mótmælum hafi verið atvinnubílstjórar að stórum hluta. Í dag er mikill fjöldi á breyttum bílum notaðir við flutninga á ferðamönnum inn á hálendið og jökla landsins. Spurning hvort væri ekki einfaldast að atvinnubílstjórar sem hafa atvinnu að því að flytja ferðamenn fái að aka á lituðu eldsneyti?

[Ómar Ragnarsson, 1.4.2008 kl. 21:18]

Eins og kemur fram í bloggi mínu reiknaði ég frekar með því að þetta væri gabb. En það að sturta möl fyrir framan Alþingishúsið hefði þó valdið mun minni vandræðum og tjóni en þær stórkarlalegu aðgerðir sem bílstjórarnir hafa staðið fyrir að undanförnu og ég hef leyft mér að efast um að þær hafi verið réttlætanlegar eða í samræmi við tilefnið miðað við aðrar mótmælaaðgerðir sem ekki hafa valdið eins miklum usla.

Ég hef allan tímann verið samsinna bílstjórum um svik stjórnvalda gagnvart því að hafa dísilolíu ódýrari en bensín en finnst að hægt hefði verið að ná sama árangri í mótmælum án þess að ganga miklu lengra en aðrir hafa gengið fram til þessa, einkum varðandi það að taka ekki ábyrgð á mótmælunum eins og aðrir hafa gert.

Það er alveg nýtt fyrir mig að vera sakaður um "þrælsótta og undirlægjuhátt". En úr því að sjálfur Jón Sigurðsson var sakaður um þrælsótta og undirlægjuhátt við Dani af því að hann hafði aðra skoðun á fjárkláðamálinu heldur en fór saman við álit flestra hér heima, þá getur smákall eins og ég ekki kvartað yfir því að vera talinn undirlægja valdamanna á Íslandi.

Eða, eins og Jón frá Skáholti orðaði það: "...úr því að þeir krossfestu þig Kristur / hvað gera þeir við ræfil eins og mig."

[Gullvagninn (IP-tala skráð) 1.4.2008 kl. 22:34]

[Gunnar Th. Gunnarsson, 1.4.2008 kl. 23:29]

Var það ekki Vilhjálmur frá Skáholti?  

[Ómar Ragnarsson, 3.4.2008 kl. 00:03]

Takk fyrir leiðréttinguna, Gunnar. Innsláttarvilla sem byggist á því að rugla saman Jóni frá Pálmholti og Vilhjálmi frá Skáholti.