Sóknin hafin inn á Mývatnssvæðið.

Það virðist fátt við það að athuga að stækka Kröfluvirkjun umtalsvert og halda sig við núverandi borsvæði. En ósvarað er áríðandi spurningu: Hve lengi telja menn að svæðið afkasti þessari miklu viðbótarorku þar til orkan er þrotin? 40 ár? 20 ár? Fyrir 30 árum var sú aðferð notuð að fara varlega í þessum efnum en það er liðin tíð.

Nú sér orkustjórinn fyrir norðan í hillingum 1000 megavatta orku sem hægt yrði að kreista út úr jarðhitasvæðunum við Þeystareyki og norðaustan Mývatn. Draumsýnin er samfellt virkjanasvæði með borholum, gufuleiðslum, stöðvarhúsum og háspennulínum allt frá Bjarnarflagi við Mývatn norður um Kröflu, Leirhnjúk og Gjástykki.

Sú var tíð að Eysteinn Jónsson, Birgir Kjaran og fleiri slíkir gerðu sér grein fyrir verðmæti Mývatns og Laxár og Þingvallavatns sem helstu nátttúruundra meðal vatnasvæða Íslands og beittu sér fyrir lagasetningum þar að lútandi. En það er liðin tíð að áhrifamenn í tveimur stærstu stjórnmálaflokkum landsins leggist á þær árar.

Hin fræðilega hernaðaraðferð í upphafi þessrarar sóknar er kunn. Þegar Þjóðverjar hófu sína sókn til landa og sendu herlið inn í Rínalönd 1936 voru þeir bara "að athafna sig í sínum eigin bakgarði".

Næsta skref fyrir norðan verður að endurskilgreina hugtakið "ný virkjanasvæði".  Þegar er komin stór borhola skammt frá Leirhnjúki sem með endurskilgreiningu er talin á "gömlu  virkjanasvæði", eða "í eigin bakgarði" Landsvirkjunar.

Í haust hefst síðan sóknin inn í Gjástykki með nýtingu rannsóknarleyfis sem getur gefið möguleika til svo mikils rasks, svipuðu því sem varð við Trölladyngju, að menn standi frammi fyrir gerðum hlut hvað snertir náttúruspjöll.

Vélaherdeildunum, jarðýtum og borum verður fagnað þar á svipaðan hátt og þegar þegar Þjóðverjum var fagnað af Austurríkismönnum 1938 þegar þeir innlimuðu landið í Þýskaland með þeim rökum að Austurríkismenn og Þjóðverjar væru jú sama þjóðin sem talaði sameiginlegt tungumál.

Það virðist stutt í að talað verði sama landvinningatungumál virkjanamanna allt frá Bjarnarflagi við Mývatn og langt norður í Gjástykki á Lebensraum-svæði álversins á Bakka.  

Vilja stækka Kröfluvirkjun

Athugasemdir

[Gunnar Th. Gunnarsson, 11.5.2008 kl. 04:20]

"Lebensraum-svæði álversins á Bakka"  sniðug samlíking

[Eiður (IP-tala skráð) 11.5.2008 kl. 10:38]

Persónulega  finnst mér  aldrei "sniðug samlíking", þegar verið verið að líkja mönnum  við nazista undir  forystu Hitlers. Vitræn umræða á þeim nótum  er útilokuð.

[Þorsteinn Valur Baldvinsson, 11.5.2008 kl. 14:09]

Orkan til Álveranna og annarrar orkufrekrar starfssemi verður tekinn, hvort sem fólki líkar vel eða ekki.

Spurningin er bara hvar best er að gera það, og umhverfissinnar verða að gefa einhver svæði frá sér, það er ekki hægt að loka öllum svæðum Ómar.

Er því ekki ráð að umhverfissinnar setjist niður með fulltrúum Orkugeirans og Ríkisins, til að leita sátta um virkjanleg svæði í stað endalausra ritdeilna og upphrópana, sem þreyta bara fólk og munu fyrir rest snúast gegn friðunarsinnum.

Of mikið er ekki gott, samber mótmæli vörubílstjóra.

[Villi Asgeirsson, 11.5.2008 kl. 15:12]

Eiður, Ómar var ekki að líkja neinum við nasista. Hann var að líkja taktíkinni við þá sem notuð var á fjórða áratugnum. Það er rétt að margir hrópa orðið nasisti til að sjokkera fólk og sverta anstæðinga, en gera lítið annað en rýra sjálfa sig trausti. Þessi samlíking að ofan var ekki þannig.

.

Þorsteinn, af hverju verður orkan tekin, hvort sem fólki líkar eða ekki? Af hverju er það svona óumflýjanlegt? Er ekki búið að taka nóg á undanförnum árum? Er einhver vilji til að stoppa einhvers staðar? Hefur það eitthvað upp á sig að setjast niður og tala?

[Gunnar Th. Gunnarsson, 11.5.2008 kl. 15:49]

Ég tók nú ekki samlíkingunni eins og verið væri að líkja neinum við nasista. En að öðru leyti tek ég undir orð Þorsteins Vals, þó ég hafi reyndar efasemdir um að hægt verði að komast að einhverri sátt, þegar umhverfissinnar eru annars vegar. Ekki frekar en að það verði hægt að komast um sátt við Greenpeace um hvalveiðar.

[Þorsteinn Úlfar Björnsson (IP-tala skráð) 11.5.2008 kl. 16:26]

Veistu það Ómar, að farið verði inn í Gjástykki í haust eða er það bara ályktun?

[Ómar Ragnarsson, 11.5.2008 kl. 17:07]

Ég vil biðja ykkur um að líta nákvæmlega á orðanna hljóðan hjá mér þegar ég segi "hin fræðilega hernaðaraðferð", þ. e. taktik. Það er vel hægt að halda uppi vitrænni rökræðu um taktik án þess að líma við hana þá sem beitt hafa henni og ég nota þessar samlíkingar mínar ingöngu sem fræðilegar vangaveltur um bardagaaðferðir en alls ekki um þann málstað sem þær þjónuðu. 

Hjá öllum heimsins er orrustan við Cannae kennd sem klassísk dæmi um tangarsókn, (double envelopement) án þess að nokkurt mat sé lagt á þann málstað sem Hannibal eða Terrentinus stóðu fyrir. Ef banna á til dæmis notkun hugtaksins blitzkrieg vegna þess að nasistar fullkomnuðu hana er verið að svipta umræðuna góðri samlíkingu.

Hugmyndafræði og málstaður nasista er fyrirlitlegasta og viðbjóðslegasta stefna sem sagan þekkir en það breytir ekki því að hernaðaraðferðir þeirra voru athyglisverðar.

Ógnarjafnvægi kalda stríðsins (MAD, mutual assured destruction) er eitthvert kaldrifjaðasta fyrirbæri hernaðarsögunnar burtséð frá því hvort annar aðilinn var heimsveldi hins illa og hitt heimsveldi hins góða eins og Reagan orðaði það.

Ég hef um það upplýsingar úr iðnaðarráðuneytinu að farið verður inn í Gjástykki næsta haust með vélaherdeildirnar.

Þorsteinn Valur, umhverfisssinnar eru m. a. búnir að gefa frá sér þessi svæði: Nesjavelli, Hellisheiði, Hverahlíð, Þrengslin, Trölladyngju, Svartsengi, Eldvörp og Reykjanes.

Þegar við viljum berjast fyrir því að Ölkelduháls verði látinn eiga sig er talað um okkur sem öfgamenn og að við komum í veg fyrir sátt. Augljóst er hins vegar að hófsemdarmennirnir sem standa fyrir öllum þessum virkjunum sjá einungis sáttina í því að allt verði virkjað og að þeir séu öfgamenn sem vilji halda einhverju eftir. 

Staðan er þessi fyrir norðan: Umhverfisverndarmenn virðast búnir að tapa Þeystareykjum, Bjarnarflagi og Kröflu 1 og 2, en eru sakaðir um öfgar og ósáttfýsi með því að vilja halda í Leirnhnjúk-Gjástykki.

Þar eins og fyrir sunnan á sáttin að vera sú að allt verði virkjað og að þeir séu öfgamenn og friðarspillar sem vilja halda eftir einu virkjanasvæði ósnortnu. 

Þessi virkjanastefna að virkja allt langt umfram getu svæðanna stenst meira að segja ekki þótt alveg sé horft framhjá náttúrverndarnýtingargildinu, heldur á að ganga freklega á rétt afkomenda okkar og stilla þeim upp við þá úrslitakosti að jafnvel þótt eitthvað sé geymt, muni það ekki nægja þegar þar að kemur til að vinna upp það sem við hrifsum til okkar.  

[Þorsteinn Úlfar Björnsson (IP-tala skráð) 11.5.2008 kl. 17:21]

Þú segir "Ég hef um það upplýsingar úr iðnaðarráðuneytinu að farið verður inn í Gjástykki næsta haust með vélaherdeildirnar."

Er þá ekki rétt að reyna að safna liði og ná vopnum í baráttuna?

Þegar ég segi vopn, þá á ég við pennann og myndavélina og upplýsa fólk.

[Gunnar Th. Gunnarsson, 11.5.2008 kl. 18:30]

Það er nú eðlilegt að þið gefið frá ykkur að vernda sem þegar hefur verið virkjað, þó þarna séu líka áform sem eru langleiðina komin á koppinn.

Reyndar vildir þú og margir meðal V-grænna hætta við Kárahnjúkavirkjun þegar búið var að verja í hana 80 miljörðum. En hvað eru slíkir smáaurar þegar hægt er að fylla svæðið af ferðamönnum í 8 vikur á ári og græða á því margfalt meira en það?

[Þorsteinn Úlfar Björnsson (IP-tala skráð) 11.5.2008 kl. 19:02]

Hvað smásálarháttur er þetta Gunnar minn? Er eitthvað að því að sýna ferðamönnum íslenska vetrarveðráttu? Eða snæviþakin fjöll? Finnst þér rétt að binda ferðamannatímann við aðeins 8 vikur á ári? Ja, hérna, detta mér nú allar dauðar lýs úr höfði, ég segi nú ekki annað en það.

[Ólafur Þórðarson, 11.5.2008 kl. 19:39]

Mér þykir bakgarða-umræða Þjóðverja áhugaverð, í löndunum austan Þýskalands bjuggu Þjóðverjar og allt það mál er í raun flókið og krefst mikils undirbúnings til að ræða af viti. Og samlíking LV við nasista er óviðeigandi, alls ekki við hæfi miðað við hvað við vitum um söguna og svo það að hjá Landsvirkjun vinnur mikið af góðu og hæfileikaríku fólki sem hefur ekkert með hernaðarlega ofbeldishneigð gagnvart öðru fólki að gera. 

Ef menn eru hræddir við landsskemmdir af völdum virkjana er betra að ræða það á þeim umræðupalli. Tala um ákveðin svæði og benda á það sem þeim finnst vera að fara úrskeiðis. 

Ef menn eru hræddir við að auðhringar séu að seilast til valda er betra að ræða það beint út með þeim staðreyndum sem tengjast því.  Auðvitað er það umræðupalur einn og sér og hvernig eigi að standa að upbyggingu í gegnum erlent fjármagn án þess að það skerði sjálfstæði landsins o.s.frv. 

Það er engin spurning að orka sem slík er einn lykill velferðar landsins í framtíðinni.  Svo er umræðan, hvernig við stöndum að því að virkja hana svo flestir séu ánægðir.

[Ómar Ragnarsson, 11.5.2008 kl. 20:50]

Minn kæri veffari, allt orðalag mitt og skýringar eru í þá átt að mér dettur ekki í hug að bera nokkurn saman við nasista. Sjálfur hef ég átt samskipti við Landsvirkjun í áratugi og þar vinnur yfirleitt afbragðsfólk sem vill láta gott af sér leiða.

Forstjórinn er gamall aldavinur minn, nokkrir minna bestu vina úr skóla eru þar innstu koppar í búri og náskylt fólk.

Það er bara þannig að ýmsar aðferðir í hernaðartaktik hafa verið fundnar upp af herforingjum af mismunandi uppruna, og minna má á það að sumir af hershöfðingjum Þjóðverja voru aðeins að sinna því sem þeir töldu skyldu við föðurland sitt og sumir þeirra, eins og Rommel, guldu fyrir það með lífi sínu að reyna að halda aftur af vitfirringunni.

Ef ekki má nota hugtak eins og Blitzkrieg vegna þess hver notaði aðferðina erum við á leið inn í blindgötu að ræða um hernaðarstrategíu og taktik. 

[Gunnar Th. Gunnarsson, 11.5.2008 kl. 21:28]

Þorsteinn Úlfar Björnsson, ekki veit ég hvort þú þekkir Fljótsdalsheiðina eða svæðið í kringum Kárahnjúka, en af orðum þínum þá reikna ég með að þú þekkir ekki til aðstæðna þarna. Það geri ég sæmilega og ef ég vildi starfa í ferðamannaiðnaðinum, þá dytti mér ekki í hug að fjárfesta í fyrirtæki sem ætlaði sér að pluma sig á því að þjónusta ferðamenn á svæðinu, nema yfir blásumarið. Vissulega er hægt að sæta lagi og fara einstaka túra þangað á veturna líka, en það yrði ansi stopult og útilokað að gera plön um slíkt fram í tímann.

Ef ekki hefði komið til framkvæmdanna við Kárahnjúka, þá hefði aldrei verið lagt í vegagerð á svæðið af neinu viti og snjómokstur og önnur vetrarþjónusta vegagerðarinnar fyrir sumarslóða hefði aldrei verið inn í myndinni. Það hefði verið allt of kostnaðarsamt. Og vorbleytur hamla stundum þarna jeppaferðum langt fram eftir vori. Fjárfestingar í aðstöðu fyrir ferðamenn á svæðinu hefðu þess vegna aldrei getað orðið merkilegar.

Allar bollaleggingar um stórgróða af ferðamönnum á svæðið ef ekki hefði orðið af framkvæmdunum eru ýktar af andstæðingum virkjunarinnar og voru til þess gerðar að blekkja almenning sem ekki þekkir til þarna.

[Ómar Ragnarsson, 12.5.2008 kl. 07:00]

Kárahnjúkavegur var ekki dýr framkvæmd og hefur verið hægt að halda honum opna undanfarna vetur, meira að segja í vetur þegar mesti snjór hefur verið þarna sem menn muna eftir undanfarin ár. Fleiri ferðamenn koma til Lapplands á veturna en allt árið til Íslands.

Þeir koma þangað til að upplifa fernt: Þögn, kulda, myrkur og ósnortna náttúru.

Þeir flykkjast til Rovaniemi til að upplifa heimkynni jólasveinsins þar sem Finnarnir bjóða upp á einn jólasvein, hreindýr, snjó og frosin vötn.

Allt þetta er til á Fljótsdalsheiði plús fjöll, tólf viðbótarjólasveina, Grýlu, Leppalúða og álfana. 

[Gunnar Th. Gunnarsson, 12.5.2008 kl. 13:12]

Það er jú mikill kuldi í Lapplandi, en vindasamt er þar ekki. Á svæðinu við Kárahnjúka og á Fljótsdalsheiði getur orðið arfavitlaust veður skyndilega,  eins og hendi sé veifað. Sjúkrabíll með veikann mann varð veðurtepptur þar í fyrravetur í marga klukkutíma (minnir í 10-12 tíma) Það er ábyrgðarleysi að stefna miklum fjölda ferðamanna á svæðið yfir vetrarmánuðina.

Auðvitað er hægt að halda veginum þarna uppfrá opnum, annars hefði aldrei verið farið í framkvæmdina. En kostnaður við daglegan snjómokstur á þessari 40 km. leið myndi éta upp arðsemina af ferðamönnunum og töluvert gott betur en það.

[Ólafur Þórðarson, 12.5.2008 kl. 17:53]

Kæri Ómar minn. Að sjálfsögðu var ekki ætlunin að jafna þessu saman. En þarna er skondið að sjá þrjár tilvitnanir til samanburðar; anschluss, Lebensraum og Rínarlöndin. Sumir geta nú misskilið þetta. Ef hernaðartaktík MacArthur eða Patton hefði líka verið á listanum, þá er lesningin með öðrum tón.

Kannski les ég þetta bara svona. Við erum öll svo ólík. Eða kannski af því að á augnablikinu rétt áður en ég las bloggið þitt sá ég á vefsíðu "Saving Iceland" að hægt er að fá treyjur með áletruninni "ILLvirkjun" undir lógói LV.  Auglýsingataktíkin sem hefur tekið yfir töluvert af umræðu í þjóðfélaginu skilar sér oft í furðulegheitum með allsk. "stimplum". Ekki okkur að kenna.

En áhugavert nokk, þá tapaði Rommel kalinn stríðinu sínu af því hann fékk enga olíu. Hann þurfti einmitt oft að parkera skriðdrekunum þegar hann átti að keyra þá til orrustu. Svona getur "orka" verið lykill að velgengni. :-) smá hint. Hann ætlaði meir að segja að keyra yfir miðausturlönd og svo til norðurs, hitta herdeildirnar úr Barbarossa í Baku, risa-olíusvæðunum við Kaspíahaf. Af því að án olíu var stríðið tapað. Sem er jú m.a. það sem skeði. 

Ég held að það sem fólk skilur best -og skilar mestu- eru þættir eins og Stiklur sem eru almennileg og fagleg útlistun á þeim verðmætum sem leynast í landinu. Einhvern daginn mun ég hæstánægður eignast þá þætti    og sýna kornungri dóttur minni sem er að alast upp í Ameríku. Bíð líka spenntur eftir fleirum slíkum gersemum.