Sagði ég ekki?

Fyrir kosningarnar 2007 benti ég á að nútíma álfyrirtæki teldu sig, af hagkvæmnisástæðum, þurfa að minnsta kosti eins stór álver eins og álverið í Reyðarfirði. Með einfaldri samlagningu væri hægt að finna út að á endanum þyrfti að virkja alla orku Íslands til að fullnægja kröfum þeirra sex staða, sem stefnu að byggingu álvers á Íslandi og þá yrði ekkert eftir til okkar eigin þarfa eða fyrir fyrirtæki sem ekki menguðu og sköpuðu fleiri og betri störf fyrir hverja orkueiningu.

Forsætisráðherra taldi slíkt ýkjur og blaðafulltrúi Alcoa setti ofan í við mig og sagði Alcoa ekki stefna að stærra en 250 þúsund tonna álveri á Bakka.

En er gamla sagan uppi á teningnum og stefnir í sama og gerðist þegar 120 þúsund tonna fyrirhugað álver á Reyðarfirði var allt í einu orðið of lítið og 400 þúsund tonna álver talið lágmark.

Skilaboðinvoru skýr þá: Annað hvort verður reist risaálver eða ekki neitt.

Sama gerðist í Straumsvík þegar Alcan tilkynnti: Annað hvort leyfið þið stækkun álversins eða við leggjum það niður.

Ég varaði við því að á Norðurlandi kynni að stefna í það að Alcoa teldi sig þurfa alla jarðvarma- og vatnsorku Norðurlands og fékk að heyra að þetta væri óþarfa ótti. Nú er annað að koma á daginn og ballið rétt að byrja.

Skoða stærra álver á Bakka en áður var áformað

Athugasemdir

[Sigurður Þórðarson, 18.7.2008 kl. 13:56]

Rétt, ég man eftir þessu.

[Tryggvi L. Skjaldarson, 18.7.2008 kl. 14:20]

 Alcan sagði aldrei:"Annað hvort leyfið þið stækkun álversins eða við leggjum það niður".

Ákaflega lífseig fullyrðing en röng eins og svo margt sem sagt var um álverið í Straumsvík í hita kosningaleiks.

[Þorsteinn Briem, 18.7.2008 kl. 15:18]

Jón Baldvin Hannibalsson 22. febrúar í fyrra:

"Hvað tók það langan tíma fyrir fyrrverandi starfsfólk varnarliðsins að finna sér ný störf? Svo lengi sem álverið [í Straumsvík] getur grætt á hagstæðum orkusamningi, sem reyndar rennur ekki út fyrr en 2024, þá fer það  hvergi ...

Við þurfum að gera ráð fyrir allt að fimmtungi þessa orkuforða [okkar Íslendinga] í þágu nýrrar tækni til að knýja farartæki, sem nú valda hvað mestri mengun á Íslandi. ... Til viðbótar við núverandi stóriðju kemur stækkun Norðuráls, Fjarðarál, stækkunin í Straumsvík, álver við Helguvík og enn annað við Bakka á Húsavík og hugsanlega Norsk Hydro í Þorlákshöfn.

Ef öll þessi fimm álver verða stækkuð í Straumsvíkurstærð, væri orkuforði Íslands þar með uppurinn. Ísland væri orðið að nýlendu nokkurra álauðhringa ..."

http://www.solistraumi.org/archives/126#more-126

[Þorsteinn Briem, 18.7.2008 kl. 18:39]

Verkalýðsfélag Húsavíkur og nágrennis 23. febrúar síðastliðinn:

"Alls hafa 635 félagsmenn rétt til að kjósa um kjarasamning Samtaka atvinnulífsins og Starfsgreinasambands Íslands sem undirritaður var 17. febrúar. Þar af eru 21,4% erlendir starfsmenn [136 talsins] sem starfa á félagssvæði Verkalýðsfélagsins. Þessi tala hefur aldrei verið hærri í sögu félagsins."

http://www.vh.is/frett.asp?fID=1930

Stéttarfélögin í Þingeyjarsýslum 17. júlí síðastliðinn:

"Á félagssvæði stéttarfélaganna í Þingeyjarsýslum voru 45 skráðir atvinnulausir í lok júní sem er fjórðungs fækkun á milli mánaða. Í þeim hópi voru 10 karlar og 35 konur."

http://www.vh.is/frett.asp?fID=2038

Vinnumálastofnun 30. júní síðastliðinn:

Erlent starfsfólk á íslenskum vinnumarkaði var samkvæmt áætlun Vinnumálastofnunar um 17 þúsund talsins árið 2007, rúmlega 9% af vinnuaflinu, og verður að öllum líkindum að jafnaði um 8,5% af vinnuaflinu í ár.

http://www.vinnumalastofnun.is/frettir/nr/1348/

[Guðjón Sigþór Jensson, 18.7.2008 kl. 19:00]

Merkilegt er að Landsvirkjun gefur ekki upp verð á raforku nema til almenningsveitna. Þeir telja sig vera bundna við einhverja viðskiptaleynd hverning sem túlka beri það.

Pukrið kringum samninga Landsvirkjunar og ríkisins við hina erlendu auðhringa minna því miður á pukrið þegar Hitler samdi við Krupp og aðra stóriðjufursta í ársbyrjun 1933. Á þessum leynilegu samningafundum voru fulltrúar Reichswehr, þýska hersins og júnkarar sem voru gömlu landeigendurnir einkum í gamla Prússlandi.

Allt pukrið og leyndóið varð öllum þessum aðilum til mikilla vandræða síðar meir þegar samsuða þessi mistókst með skelfilegum afleiðingum. Óskandi er að svo verði ekki raunin en ljóst er að „veiki“ aðilinn í samningaferli milli stóriðjunna, Landsvirkjunar og ríkisins er náttúra landsins sem því miður á sér of fáa formælendur og um fram allt verjendur.

Við þurfum að fá ALLAR staðreyndir upp á borðið! 

Mosi 

[Tryggvi L. Skjaldarson, 18.7.2008 kl. 20:26]

Jón Baldvin fór ekki alveg rétt með.  Samningurinn í Straumsvík er til 2014 með ákvæðum um framlengingu til 2024.  Sem stuðningsmaður Jóns Baldvins til margra ára varð ég furðu lostinn þegar hann tjáði sig um stóriðjuna og afstöðu sína.

[Kristján Pétursson, 18.7.2008 kl. 22:08]

Ég man vel eftir aðvörun þinni um hagkvæmnisástæður um stærð ávera fyrir síðustu alþingiskosningar.Þetta hefur þegar allt komið fram,þú reyndist eins og oft áður sannspár Ómar minn.Viðspyrna rikisstjórnarinnar við ágegni álrisanna er afar veik.Viðkomandi sveitafélög virðast ráða mestu um framgang þessa mála.Hvað um orku fyrir háþróaðan í framtíðunni?

Græðgin gleypir sífellt meira til sín og þegar erlendir og innlendir aðilar sameinast um að taka til sín verðmætustu orkugjafanna og ríkisstjórnin greiðir götu þeirra,hvað er þá til varnar? Fagra Ísland flaut framhjá,það var engin innistæða hjá Samfylkingunni.

[Úrsúla Jünemann, 18.7.2008 kl. 22:09]

Almennilegi borgari áttir sig allt of seint á því sem er að gerast í landinu - ef hann áttir síg nokkuð á því einhvern tíma! þetta eru álfurstarnir búnir að notfæra sér og munu gera einnig í framtíðinni.

[Pétur Sig, 18.7.2008 kl. 22:14]

Skemmtilegt að sjá að einungis eru 10 karlar atvinnulausir í sveitarfélaginu þar sem á að byggja álverið, ætla þessir karlar með fulltingi hinna 35 atvinnulausu kvenna, að manna stöðurnar í álverinu?

Húsvíkingar eru mjög flottir að eðlisfari og hið besta fólk, það sannast best á því að nokkur flottustu ferðaþjónustufyrirtæki landsins, og að öðrum ólöstuðum Norðursigling eru einmitt á Húsavík. Hvar á að fást mannskapur til að vinna í þessu áveri? Ekki flytja Reykvíkingar í stórum stíl til Húsavíkur til að vinna í verksmiðju, þó útsýnið á Kinnafjöllin sé stórkostlegt. Hvernig gengur annars að manna álverið í Reyðarfirði? Vonandi vel fyrst það er nú komið.. En samt Húsvíkingar, hugsið málið til enda, ekki bara hugsa um að geta selt húsin ykkar og flutt burt, plássið ykkar eins og þið þekkið það deyr og kemur aldrei aftur, um það geta Reyðfirðingar vitnað. 

[Tryggvi L. Skjaldarson, 19.7.2008 kl. 10:20]

Ágæti slembni einstaklingur.

Þetta er hárrétt sem stendur í bæklingi Alcans:

 "En sterk staða í dag er ekki trygging fyrir neinu á morgun. Keppinautarnir sigla fram úr með nýjum og stærri álver um. Eina trygging ISAL fyrir því að lifa til framtíðar er að fá að stækka og auka hagvæmni í rekstri enn frekar".

 Hér er ekki um neina hótun að ræða heldur staðreynd.  Það á hver og einn að geta geta sagt sér að sá sem ekki getur fylgt eftir framförum hann dregst aftur úr.  Það hafa orðið framfarir í kerrekstri síðan 1969 og án stækkunar dregst álverið í Straumsvík óhjákvæmilega aftur úr. Og hvað þýðir það? Jú keppinautarnir sigla fram úr með nýjum og stærri álverum.  

[Þorsteinn Briem, 19.7.2008 kl. 12:46]

Tryggvi. Einmitt. Stærri og stærri álver, það er framtíðin hjá sumum en ekki meirihluta íslensku þjóðarinnar, sem er búin að fá sig fullsadda á þeim sem komnir eru með álver á heilann:

"Meirihluti þeirra, sem tóku afstöðu í skoðanakönnun, sem Capacent Gallup gerði fyrir þingflokk VG, var andvígur álveri í Helguvík á Reykjanesi."

http://www.mbl.is/mm/frettir/innlent/2008/07/17/fleiri_a_moti_en_med_alveri_i_helguvik/

[Tryggvi L. Skjaldarson, 19.7.2008 kl. 13:29]

Steini Briem

Mín reynsla af samtölum við  margt fólk sem tekið hefur afstöðu gegn álverum er að það segir einsog:" Af hverju hefur þetta ekki komið fram?". "Það vissi ég ekki". "Ég hélt að það væri  miklu meira en 0,25% af landinu sem Landsvirkjun er með undir virkjanir og veitur".o.sfrv.

Það hefur sárlega vantað upplýsta umræðu um stóriðjuna og reynsla mín af kosningabröltinu í kringum álverið í Straumsvík er að einhverra hluta vegna virðast margir andstæðingar álvera tilbúnir til að leggja mikið á sig til að hindra að það takist að halda uppi upplýstri umræðu.

Stærri álver þarf ekkert að vera slæmt ef orka er fyrir hendi. Það þýðir einfaldlega meiri tekjur fyrir alla.

[Þorsteinn Briem, 19.7.2008 kl. 13:55]

Tryggvi. Ekki sýnist mér nú vanta upplýsta umræðu um álver og hvaðeina í íslensku samfélagi. Íslenska þjóðin er vel menntuð á öllum sviðum og vel upplýst. Þess vegna gleypir hún ekki hvaða áróður sem er og kemst að niðurstöðu eftir að hafa velt hlutunum mikið fyrir sér, kostum og göllum í hverju máli fyrir sig.

Og það hefur íslenska þjóðin gert varðandi álverið í Helguvík. Meirihluti þjóðarinnar er á móti því, þrátt fyrir allan áróðurinn.

[Arnar (IP-tala skráð) 19.7.2008 kl. 20:00]

Sæll, endilega hafðu samband við mig á [e-mail] , þarf að ræða við þig um bíl sem þú átt.

[Tryggvi L. Skjaldarson, 21.7.2008 kl. 10:04]

Steini Briem

Hverjir eru með áróðurinn? Af hverju er ekki hægt að taka um virkjanir og stóriðju án gífuryrða og vafasamra fullyrðinga?

[Þorsteinn Briem, 21.7.2008 kl. 22:21]

Tryggvi. Sem "gamall" blaðamaður á Mogganum reyni ég að forðast gífuryrði og vafasamar fullyrðingar, og þurfti aldrei að leiðrétta þar fréttir sem ég hafði skrifað.

[Guðjón Sigþór Jensson, 22.7.2008 kl. 16:31]

Nú hafa undanfarin ár verið óvenjuhagkvæm áliðnaðinum. Hversu lengi það getur orðið, getur yfirleitt ekki gengið lengi. Þetta er mjög óvenjulegt ástand.

Þegar verð lækka, flutningskostnaður og aðföng hækka, þá má reikna með öðru hljóði í skrokkinn.

Mosi