Hugsjónir og raunsæi í bland.

Í baráttusöng Íslandshreyfingarinnar eru þetta lokaorðin: "...hugsjónir og raunsæi í bland." Það má líkast til orða stefnu Obama á svipaðan hátt og svona var stefna Kennedys á sínum tíma.

Í Íslandshreyfingarsöngnum er orðið "hugsjónir" á undan orðinu "raunsæi", þ. e. hugsjónirnar eru grunnurinn og raunsæi nefnt til að vísa til þeirra aðferða sem best henta til að koma hugsjónunum í framkvæmd.

Lyndon Johnson, sem tók við af Kennedy, var realpólitíkus, raunsæisstjórnmálamaður eins og það er kallað. Kennedy flutti margar frábærar ræður og hreif fólk með þeim. Ekki minnist ég þess að Johnson hafi nokkurn tíma haldið neinar slíkar ræður.

Þegar upp var staðið var það hins vegar Johnson sem náði miklu betri árangri í umbótum fyrir blökkumenn en Kennedy og líklega liggur ekki meira eftir nokkurn Bandaríkjaforseta á því sviði en eftir hann.

Kennedy var ákveðinn í orðum varðandi baráttuna fyrir frelsi og notaði orðalag, sem gat alveg eins verið tekið úr munni haukanna í bandarískum utanríkismálum.

Í Kúbudeilunni sýndi hann hins vegar hófsemi, lagni og yfirvegun og gætti þess að láta haukana ekki leiða sig út á hálan ís.

Menn óttast að orðum Obama muni ekki fylgja efndir, "raunsæið" verði hugsjónunum ofar. Eitt veigamikið atriði mælir á móti því: Enginn Bandaríkjaforseti hefur nokkurn tíma verið eins kunnugur mismunandi menningar- og trúarheimum og mismunandi aðstæðum hjá jarðarbúum og Obama.

Þessi sérstaða hans mun vonandi skila sér í þeim ákvörðunum sem hann tekur.

Hillary Clinton var þingmaður fyrir New York ríki, en í New York er höfuðvígi Gyðinga og þeir hafa gríðarleg áhrif á stjórnmál ríkisins og borgarinnar. Vonandi losar Clinton sig frá áhrifunum af þessu og þjónar víðsýnni stefnu Obama í viðkvæmustu deilumálum heimsins við Miðjarðarhafsbotn.

Ef hún gerir það ekki vona ég að Obama hafi það bein í nefinu að taka fram fyrir hendurnar á henni eða víkja henni til hliðar.

Obama haukur í sauðargæru?

Athugasemdir

[Flosi Kristjánsson, 1.12.2008 kl. 22:49]

Við þurfum að vara okkur á því að slagorð fyrri tíma, hvort sem í hlut áttu Jón Sigurðsson, Martin Luther King eða John Kennedy, eru ekki endilega trygging fyrir því að menn séu á réttri braut. Hverjar voru kringumstæður fyrir fjörutíu árum? Fyrir 150 árum?

Barrrack Obama boðar nýja tíma. Hann virðist vera ótengdur svakalega stórum fyrirtækjum sem eiga ekki sameiginlega hagsmuni með alþýðu manna. En eru engin tengsl þar á milli?

Ræðan í Chicago er æðisleg og ég á eftir að læra hana utanbókar! Hún er, engu að síður, snilldarlegur tilbúningur PR-menningarinnar. Fyrir aðila, sem eru eldri en tveggja vetra og muna sitt af hverju, þá er sigurræða Obama í Chicago upptugga af frösum úr "The Best of American History" frá 1860 til 1950. 

Kynslóðin sem hefur alizt upp við YouTube getur náð í verulegan hluta af ræðunni á upptökum fyrri tíma skörunga. Obama gætti þess þó að fara ekki orðrétt með það sem fyrri tíma menn sögðu. Til dæmis lét hann ógert að nota orðasamband MLK, þegar hann lofaði að skila öllu "sínu fóku" á ákveðinn stað. Hjá MLK hét það "the Promised Land".

[Nína S (IP-tala skráð) 1.12.2008 kl. 22:50]

Mér finnst flott hvernig Obama raðar sínum taflmönnum upp, hann er jú að taka við valdamesta embætti Bandaríkjanna (og þó víðar væri leitað) og þar er allt á tjá og tundri vegna kreppunnar. Þess vegna finnst mér þessi blanda hans frekar raunsæ miðað við aðstæður. M.ö.o. hann tekur við erfiðu búi. Haukur í sauðagæru ætti þá að vísa í haukfrá augu.

[Árni Egilsson (IP-tala skráð) 2.12.2008 kl. 01:19]

AMEN!

Kær kveðja

Árni

[Einar Vilhjálmsson, 2.12.2008 kl. 04:05]

Heill og sæll Ómar

Hvað segir þú um niðurstöðuna í heitapottinum í kvöld:

Heiti potturinn leysti mörg mál í kvöld. Jarðfræðin fær að ráða för. Jarðskorpan markar skil efnahagslegrar samvinnu og réttindi samtarfsaðila okkar. Bandaríkjanna annars vegar og Noregs hins vegar. Við tökum upp nýja mynt , norskan-dollar,  og verðgildi hans miðað við hlutfallslega venslun hagkerfanna og niðurstöðu samninga um efnahagslega samvinnu og tryggingu. Stofnaður verður einn sameiginlegur lífeyrissjóður allra landsmanna - allir jafnir þar. Eignir landsmanna í bönkunum, skuldir fyrirtækja, verða færðar niður í efnahagsreikningi, frá skuld í eigið fé og hluturinn sameign þjóðarinnar. Skuldir heimilanna verðar verða færðar niður sem nemur því hlutfalli sem hver og einn valdi að skuldsetja eign sína en verðið miðað við byggingakostnað í löndunum þremur. Bandarískur banki yfirtekur tvo íslensku bankanna en Íslendingar og Norðmenn sameinast um aðra bankastarfsemi í dreifðri eignaraðild. Íslenskir bankastarfsmenn fá ný og spennandi tækifæri hjá banka á við City Bank. Auðlindir og forgangssamstarf um þær mótast af jarðfræðilegri legu. Þannig ættu Norðmenn forgangsaðgang að samstarfi um Drekasvæðið en Bandaríkin allt svæðið vestan við sprungumótin frá Reykjaneshrygg að Kleifarvatni og svo norðaustur í gegnum landi. Allur lífmassi í hafi, ám og vötnum verður sameign þjóðarinnar þótt núverandi nýtingaréttur verði virtur, vatnsföll af öllum toga einnig sem og orkubúskapur  þjóðarinnar gjörvallur auk landsins alls að öðru leiti. Náttúra landsins mun í auknum mæli færast í þjóðlega umsýslan og lúta ströngustu skilyrðum um sjálfbærni og samfélagslega ábyrga ræktun. Margt fleira kom fram í heita pottinum enda var skipuritið og verklagsferlið allt klárað á 40 mínútum enda karlarnir sumir orðnir ansi estrogenískir hlutfallslega séð út af hitanum og gátu því gert eitthvað annað en tuða. Heiti potturinn er ekki sem verstur sjálfur