Við erum að tala um...með þessum hætti.

Eitthvert algengasta tískuorðalagið um þessar mundir er "við erum að tala um." Sumir virðast ekki geta talað nema stutta stund án þess að þræla þessum orðum inn í tal sitt sí og æ í stað þess að segja beint frá því sem um er að ræða í miklu styttra máli.

Dæmi: Í stað þess að segja einfaldlega: "Það kólnar á morgun" er sagt: "Við erum að tala um að það verði kaldara á morgun." Í stað þess að segja: "Margir munu missa vinnuna" er sagt: "Við erum að tala um aukið atvinnuleysi."

Annað er áberandi, en það er að orðin "svona" og "hvernig" eru að hverfa úr málinu og í staðinn segja menn að þetta eða hitt sé að gert með þessum eða hinum hættinum.

Kannski er stutt í það að í stað þess að syngja um jólin: "Svona gerum við..." verði sungið: "með þessum hætti gerum við".

Í stað þess að segja: "Ég ég veit ekki hvernig á að gera þetta" er sagt: "Ég veit ekki með hvaða hætti á að gera þetta.

Þetta hvimleiða ofnotaða orðalag er óþörf málalenging, - þrjú orð í staðinn fyrir eitt." Sama er að segja um "við erum að tala um..." sýkina.

Athugasemdir

[IGG , 15.12.2008 kl. 20:16]

Heyr, heyr, Ómar! Stöndum vörð um móðurmálið :)

[Þorsteinn Briem, 15.12.2008 kl. 21:55]

Ferlega var gott að feikaða,
í fyrra er vorum að meikaða,
sér er það svið,
svona gerum við,
og látlaust erum að leikaða.