Lögmál knattspyrnunnar, inná-útaf.

Í knattspyrnu verða allir að sanna sig, leikmennirnir, þjálfarinn og aðstoðarmennirnir. Ef einhver stendur sig ekki fer hann á bekkinn og horfir á leikina á meðan hann er að átta sig á því hvað hann verði að gera til að komast inn á aftur.

Ef hann bætir sig á æfingum og verður aftur jafngóður eða betri en hinir, sem eru inná, fær hann að fara inn á aftur. Og þá verður hann að sanna sig.

Ef þjálfarinn og aðstoðarmennirnir ná ekki árangri og liðið bíður afhroð æ og aftur er þeim skipt út og nýir fengnir til starfans.

Þetta getur verið næsta miskunnarlaust en það er nauðsynlegt fyrir gæði knattspyrnunnar. Enginn getur talið sig svo góðan að hann sé ómissandi og ef hann verður að víkja vegna vangetu, of margra og stórra mistaka eða þá þess að hann fellur ekki inn í liðið og er dragbítur í leik þess, getur hann ekki litið á það sem dóm um saknæmt athæfi heldur aðeins nauðsynlegt gæðamat sem hann hlítir af æðruleysi.

Eiður Smári hefur þurft að hafa fyrir lífinu í hinum harða heimi knattspyrnunnar. Árangur hans nú sýnir að hann hefur haft karakter til að takast á við erfiðleikana og sjálfan sig og ef hann hefði aldrei verið settur á bekkinn væri hann áreiðanlega ekki sá sem hann er nú um stundir.

Samt er ekkert gefið, ef hann stendur sig ekki áfram getur hann lent aftur á bekknum.

Í knattspyrnunni geta menn ekki klúðrað fjórum keppnistímabilum í röð í vissu þess að dómurinn falli ekki fyrr en eftir fjögur ár eins og það er í stjórnmálunum hér á landi.

Bara að við hefðum svipað við og í knattspyrnunni á öllu sviðum þeirra 14:2-stjórnmála sem hafa verið stundið hér á landi undanfarin ár.

Eiður Smári skoraði sigurmark Barcelona

Athugasemdir

[Kristján Logason, 15.1.2009 kl. 11:03]

Stjórnvöld

hvorki hafa þol né þor/
þora engu bylta/
liggja þau með lús í for/
líkt og grís og gylta/

[Ari (IP-tala skráð) 15.1.2009 kl. 14:09]

Ágætis líking þó hún sé ekki fullkomin. Fullkomin að því leyti að ef stjórnandi klúðrar málunum fyrir alla leikmennina/almenning þá á hann að segja af sér.

Geir er enn að tala um alheimsstorminn sem gerði þetta og bendir á bankana. ENNÞÁ. Slík er afneitunin. Þegar vandinn er nr. 1 heimaskapaður vegna gífurlegra erlendra skulda og að hann sem hæsti maður ber einna mest ábyrgð á því að leyfa bönkunum að stækka í margföld Íslönd.

[Þorsteinn Briem, 15.1.2009 kl. 15:45]

Oftast hann er ei inn'á,
en ætíð eru líkurnar þá,
að snillingur skori smá,
hjá Sollu í gærkveldi lá.