Fólk "kemur að" öllum fjandanum.

Málfarspistlar Eiðs Guðnasonar eiga mikinn rétt á sér enda virðist málkennd fjölmiðlamanna og annarra, sem setja fram mál sitt, hraka svo mjög að áhyggjuefni er.

Eitt einkenni þessa er orðfæð og eltingarleikur við tískuorð eða orðatiltæki sem fara langt með að útrýma öðrum og betri orðum.

Eitt hvimleiðasta orðatiltækið er "að koma að" einhverju.

Það byrjaði einhver á því fyrir rúmum áratug að nota þetta orðalag sem enginn hafði notað áður og allt í einu var eins og mönnum fyndist það mjög fínt að taka svona til orða. 

Nú er svo komið að fólk er hætt að taka þátt í neinu, vinna við eitthvað, fást við eitthvað eða gera eitthvað heldur kemur það að þessu öllu.

Það nýjasta heyrði ég í útvarpsfrétt einni þar sem upplýst var hverjir hefðu sótt fund nokkurn. Í stað þess að segja einfaldlega að þessir menn hefðu verið á fundinum var sagt: "Þeir komu að fundinum."

Leyfist mér að spyrja hve nálægt fundinum þeir komust úr því að þeir komu að honum án þess að komast á hann.

Það er verið að festa það í sessi að orðatiltækið "að koma að einhverju" þýði ekki aðeins þátttöku heldur líka hvar fólk er statt og hvað það gerði. 

Það er kannski stutt í eftirfarandi:

GAMLA ORÐALAGIÐ:                                                   NÝJA ORÐALAGIÐ:

Hann hélt afmælisveislu í dag.                                     Hann kom að afmælisveislu í dag.

Hann syngur í karlakór.                                               Hann kemur að söng í karlakór.

Hann er giftur maður.                                                 Hann kemur að hjónabandi.

Hann keppti í 100 metra hlaupi.                                  Hann kom að keppni í 100 metra hlaupi.    

 

Bráðum verður það hugsanlega hallærislegt að segja að maður sé að blogga, heldur verði að troða inn orðunum "að koma að" um þessa iðju, til dæmis svona:   

Lýk ég hér með þessum pistli sem ég kom að og vona að Eiður haldi áfram að koma að blogginu.  

Athugasemdir

[Þorsteinn Briem, 30.5.2009 kl. 12:17]

Þetta er hrikaleg aðkoma, svona svipuð og þessi á Dalvík:

„Verkefni þeirra er að bjarga 24 sjúklingum sem eru fastir og stórslasaðir í rústunum eftir öflugan jarðskjálfta.”

Þar að auki er málvenja að segja „á Dalvík” en ekki „í Dalvík”.

Rústabjörgunaræfing í Dalvík

[Marteinn Unnar Heiðarsson, 30.5.2009 kl. 21:11]

Bestu kveðjur á Stóra skafl byð að heilsa Hlyni Skagfjörð á Bola :)