Upp með orkubruðlið !

Enn og aftur veifa Sjálfstæðismenn orkufrekum iðnaði sem einni helstu lausn á atvinnuvanda landsmanna.

Í hálfa öld hefur dunið stanslaus síbylja þess hve jákvætt hugtakið "orkufrekur iðnaður" sé. Þetta hefur virkað eins og heilaþvottur líkt og þegar hundur slefar ef veifað er kjötbita fyrir framan hann.

Í rauninni er hugtakið neikvætt í heimi takmarkaðrar orku, því að það þýðir einfaldlega orkubruðl. Ekki er hægt að finna neina starfsemi sem útheimtir meiri orku miðað við framleiðslu en álframleiðslu.

Hún útheimtir til dæmis tíu sinnum meiri orku á hvert framleitt tonn en járnbræðsla. Hvert starf í álbræðslu kostar 200 milljón króna fjárfestingu og er leitun að meira bruðli varðandi það að skapa störf.

Þótt allri orku Íslands og þar með náttúru landsins yrði fórnað fyrir sex risaálver sem framleiddu þrjár milljónir tonna á ári fengi aðeins 2% vinnuafls landsmanna störf í þessum álverum.

Hver orkueining skilar margfalt meiri ávinningi í annarri starfsemi, svo sem ylrækt.  

Sjálfstæðismenn lifa í 80 ára gamalli fortíð þótt forystumennirnir séu ungir. Þeir átta sig ekki á því að nú er komin ný öld, 21. öldin, öld endurmats og fráhvarfs frá bruðli til nýtni og markvissrar og samþættrar nýtingar orkulinda og náttúruverðmæta.

Þeir skynja ekki að það eru til fleiri form nýtingar en þau sem skila tonnum og megavöttum.  

Til eru áttræðir öldungar sem eru ungir í anda. En Sjálfstæðisflokkurinn er áttræður á alla lund, virðist ekkert hafa lært og engu gleymt.  

Sjálfstæðisflokkurinn leggur fram efnahagstillögur

Athugasemdir

[Úrsúla Jünemann, 9.6.2009 kl. 13:46]

Það er nú sem betur fer búið að minnast á það að lítil og meðalstór fyrirtæki eru mest atvinnuskapandi. En sumir menn berja ennþá hausinn við stein.

[Magnús Birgisson (IP-tala skráð) 9.6.2009 kl. 15:15]

Það er engin endir á dellunni sem hérna er sett fram og bókstaflega óhugnanlegt að sjá að margir skrifa undir hvern staf. Hvernig væri fólk að reyna að sjá í gegnum orðskrúðið og reyna að hugsa fyrir sig sjálfur?

 Nokkur dæmi

Ástæða fyrir vinsældum álsins er að hann er léttur málmur og hann er því orkusparandi þegar upp er staðið. Léttari flugvélar og bílar eyða minna á ævi sinni og mikil orka sem fer í framleiðslu á áli kemur því til baka seinna meir. Þetta veit Ómar reyndar, flugkall og bílaáhugamaður sem hann er, en hann kýs að sleppa því að minnast á þetta smáatriði af einhverjum ástæðum.

Ylrækt er misnefni á svokallaðri ljósalamparækt. Ljósalamparnir eyða orku sem þar til nýlega var niðurgreidd af ríkinu auk þess sem framleiðslan nýtur innflutningsverndar í skjóli hafta því hún væri aldrei samkeppnishæf við framleiðslu sem aldrei hefur undir ljósalampa komið. ,,Ylrækt" er því orkusóun í hæsta gæðaflokki. Ljósalamparæktunin íslenska mun aldrei skapa gjaldeyristekjur því á heimsmarkaði er hún í samkepni við afurðir sem nýta sér sólarljósið beint og milliliðalaust.

Hvert starf í álbræðslu kostar íslendinga ekki krónu. Ástæðan er sú að það eru útlendingar sem borga og við ættum að fagna því að þeir eru tilbúnir til þess að festa þetta mikið fé um langan tíma á Íslandi og um leið skapast hérna mörg hundruð störf.

Það eina sem er gamladags er hugsanaháttur þeirra sem kjósa að horfa fram hjá 30 ára frábærri reynslu okkar af því að framleiða rafmagn á Íslandi og selja til þeirra útlendinga sem eru tilbúnir til að greiða hæst verð fyrir orkuna en það hefur hingað til verið álframleiðendur.  Vonandi bætast fleiri orkuneytendur í hópinn í framtíðinni en enn sem komið er virðist það vera 2 fuglar í skólgi.

[Hjalti Finnsson (IP-tala skráð) 10.6.2009 kl. 07:45]

Magnús það er vissulega rétt hjá þér að álið er léttmálmur sem getur leitt til sparnaðar í orkunotkun þeirra farartækja sem hann er notaður í en að hann skili allri þeirri orku sem notuð er við framleiðsluna til baka og meira en það er nú vægast sagt hæpinn útreikningur. Hvaða stærðir ertu þá með inn í útreikningunum? Tekurðu með alla þá olíu sem fer í að flytja hráefni til bræðslu á Íslandi og síðan aftur til að flytja "fullunnið" ál til vinnslu erlendis?  Þetta "fullunna" ál á síðan eftir að fara í gríðarlega vinnslu erlendis þar sem olía eða rafmagn framleitt með olíu er notað við vinnsluna, ertu líka með þá orkunotkun inn í þínum útreikningum?

 Varðandi Ylræktina þá er ylrækt svo sannarlega ekki rangnefni þar sem jarðhiti er notaður til að ná fram hagstæðustu vaxtarskilyrðum plantnanna. Það er rétt hjá þér að þar að auki er notuð raflýsing til að ná fram kjörbirtuskilyrðum og rafmagnið til þessa er enn að nokkru leyti niðurgreitt (dreifing rafmagnsins er niðurgreidd) af ríkinu en eftir sem áður er greitt verulega hærra verð fyrir hverja kílóvattstund til Ylræktar en til álbræðslu. Nú eru að koma á markaðinn nýir lampar sem virka á sama ljóssviði og þessir háþrýstu lampar sem notaðir hafa verið til þessa, en þessir nýju nota aðeins lítið brot af þeirri raforku sem þeir gömlu nota auk sem þeir eru með betri endingu.

Varðandi það hvernig þú færð út að hvert starf í álbræðslu kosti okkur ekki eina krónu er mér alveg hulin ráðgáta. Þú hlýtur þá að gleyma að reikna með að til álbræðslunnar þarf verulegt rafmagn og það er og hefur verið algjörlega á íslenskum höndum að sjá um að skaffa það. Það þarf einnig að sjá til þess að hafnaraðstaða sé til staðar með tilheyrandi bryggjumannvirkjum og dýpkunum sem einnig eru kostaðar af íslenskum stjórnvöldum og sveitarstjórnum. Þá gleymirðu að sjálfsögðu einnig að taka með í reikninginn fórnarkostnað íslenskrar náttúru, sem er svo sem ekkert nýtt þar sem þeim kostnaði hefur verið meira og minna sleppt í stóriðjuumræðunni síðustu áratugi.

Um síðasta punktinn þinn að menn gleymi að horfa til síðustu 30 ára og sjá hverjir hafa verið að greiða hæsta verðið fyrir raforkuna, þá er það nú þannig að allri aðrir en stóriðja hafa verið að greiða hærra verð á hverja framleidda kílóvattstund á síðustu 30 árum. Það eru íslensk heimili, minni fyirrtæki, stærri fyrirtæki, sjávarútvegurinn, sveitarfélög og svona mætti lengi telja sem eru þeir viðskiptavinir síðustu ára sem hafa verið að greiða hæsta verðið fyrir orkuna síðustu 30 ár, og það án þess að verðið til þeirra sé beintengt afurðaverði þeirra á heimsmarkaði eða afkomu þeirra yfirleitt.

Að öðru leiti verð ég að taka undir með þér að maður á að kynna sér málin áður en maður setur fram allskonar staðhæfingar sem svo ekki standast skoðun.