Varðar mestu að klekkja á keppinautunum?

Vegna þess að ég var og verð fréttamaður til æviloka er ég með tvo farsíma til þess að ég geti helst alltaf svarað tafarlaust í annan þeirra og að ég verði aldrei sambandslaus.

Einnig til að finna týndan síma með því að hringja í hann úr hinum símanum. Hefur komið sér vel ótal sinnum. 

Ég nota 699-1414 til að svara og 892-1414 til að hringja og senda sms-skilaboð.

Að undanförnu hefur verið hringt þrisvar í mig frá öðru símafyrirtækinu til þess að bjóða mér gull og græna skóga, frábær tilboð og hvaðeina, ef ég hætti við að skipta við hitt símafyrirtækið.

Þegar ég hef spurt hvort ekki væri nær að bjóða mér þessi vildarkjör á símanum, sem ég hef hjá fyrirtækinu, sem hringt er fyrir, verður fátt um svör. Nei, það er ekki í boði. Þetta snýst bara um að klekkja á keppinautnum. 

Greinilegt er að þeir / þær sem hringdu vissu það ekki að ég væri með síma hjá báðum fyrirtækjunum og þegar ég svaraði þeim svona virðist áhuginn enginn á að bjóða mér þessi vildarkjör nema ég færði hitt símanúmerið yfir.

Mitt lokasvar í öll skiptin hefur verið það að ég hafi ekki í hyggju að breyta neinu úr því að það er boðið með því skilyrði að ég klekki á samkeppnisaðilanum, sem ég á ekkert sökótt við.

Ég spyr um viðskiptasiðferðið sem liggur að baki ofangreindu. Lærðu menn ekkert af síðustu árum og afleiðingum þess sem þá var spólað upp í hæstu hæðir?

Telst ofangreint vera "tær viðskiptasnilld"?

Við síðasta sölufulltrúann hefði ég kannski átt að segja að fyrirtæki hans ætti skilið að ég segði upp viðskiptum við það. Hefði það ekki bara verið mátulegt á það?   

Athugasemdir

[Einar Guðjónsson, 23.6.2009 kl. 00:19]

Símaokrið sem hér hefur viðgengist er auðvitað yfirgengilegt.Hafði verið hjá Símanum

fyrir og eftir Bakkavör frá 1993 með NMT og seinna skipti ég í gemsa.Fann um daginn

reikning fyrir fyrsta NMT símanum og hann kostaði 60.000 kr og 40.000 kr að setja hann í bílinn.Finnst því hækkun á verði gsm síma hafa lækkað lítið m.v. útbreiðslu.Man t.d. að faxtæki kostaði 300.000. kr árið 1983 en var komið niður í 3000 kr 4 árum seinna.Hvað um það. Kunningi minn kenndi mér að til að fá bestu verðin þá á maður að skipta reglulega.Þannig fór ég frá Símanum til Tals og reikningurinn lækkaði verulega.Nú er ég á leiðinni til Vodafone og við það lækkar hann ennfrekar. Hins vegar eru þau öll varasöm og það þarf að fylgjast vel með reikningunum.Hinsvegar eiga þessi félög það öll sameiginlegt að nýjustu viðskiptavinunum bjóðast alltaf bestu kjörin.

[Sigurður #1 (IP-tala skráð) 23.6.2009 kl. 13:18]

Öll símafélögin eiga það sameiginlegt, að viðskitpavinurinn hefur aldrei hugmynd um hvað mínútan kostar þegar hann er að hringja.

Viðskiptavinurinn fær ENGA viðvörun eða áminningu (t.d. bara lítið píp) þegar hann er að hringja á milli kerfa.

Einu sinni sá maður það á símanúmerinu í hvaða kerfi það var, það er ekki hægt lengur.

Þannig hefur maður aldrei nokkra minnstu hugmynd hvað maður er að borga á mínútuna.

Hitt er alveg brilljant, að hafa tvo gemsa, einn til að hringja í hinn þegar hann týnist :)