Vitum við hverjir ÞEIR verða?

Þegar vel var tekið í það á alþingi að afhenda Noregskonungi Grímsey benti Einar Þveræingur á það að enda þótt menn teldu sig þekkja konunginn að góðu, vissu þeir ekki hvaða menn þeir hefðu að geyma sem ættu eftir að taka við af honum.

Vel kann að vera að forstjóri og aðaleigandi Magma Energy sé hinn mætasti maður sem og fyrirtækið, en vitum við hve lengi hann verður við stjórnvölinn og hverjir eiga eftir að koma á eftir honum eða eignast fyrirtækið næstu 130 árin?

Það er verið að ræða um allt að 47% hlut Magma sem er talsvert meira en talið er að sé ráðandi eignarhlutur.  

Óraði menn fyrir því fyrir 15 árum að í stað Alusuisse ætti Ríó Tintó, sem á breska þinginu var kallað sóðalegasta fyrirtæki heims, eftir ná yfirráðum yfir álverinu í Straumsvík ?

Horfðum við ekki upp á það í "gróðærinu" hvernig fyrirtæki skiptu um eigendur áður en hægt var að depla auga ?  

Við vitum nokkurn veginn hver við erum, þjóðin sem enn ræður nokkurnveginn yfir auðlindum sínum.

En við vitum ekki hverjir ÞEIR verða sem gætu haft þessar auðlindir í höndum sér fyrr en varir, ef við látum þær frá okkur.  

 

Upplýsandi fundur með Magma

Athugasemdir

[Fannar frá Rifi, 25.8.2009 kl. 23:42]

ættiru ekki að spyrja þá samflokksmenn þína í Samfylkingunni að þessu?

[Ómar Ragnarsson, 26.8.2009 kl. 00:36]

Ég sá suma af þeim á myndum af fundinum í Grindavík í kvöld.

[Benedikt V. Warén, 26.8.2009 kl. 11:11]

Talandi um Grímsey, þá tókst Norðmönnum á ná Jan Mayen af okkur, vegna rænuleysis Íslenskra stjórnvalda. 

Sagan endur tekur sig, - því miður.

[Þorgeir Ragnarsson (IP-tala skráð) 26.8.2009 kl. 16:48]

Það er allvega ljóst af öllum málavöxtum í málum Reykjanesbæjar að veruleg ástæða er til að draga heilindi Árna Sigfússonar, bæjarstjóra, í efa.