"Take the money and run" - heilkennið.

Ofangreint heilkenni hefur verið meginstefið í orkustefnu Íslendinga. Forskrift Guðmundar Pálmasonar um að gæta skyldi öryggis og framsýni við nýtingu jarðhitasvæða var kastað fyrir róða fyrir 30 árum og síðan hefur æðibunugangurinn ráðið ríkjum.

Sé tekið mið af rannsóknum, kenningum og athugunum helstu fræðimanna okkar á þessu sviði, Guðmundar, Braga Árasonar, Sveinbjörns Björnssonar, Stefáns Arnórssonar og fleiri hentar jarðvarmavinnsla best markvissri og öruggri aukningu raforkuframleiðslunnar þar sem þess er gætt að ekki sé fram úr þolmörkum svæðisins, þannig að orkuvinnslan sé sannanlega endurnýjanleg til framtíðar. 

Þess vegna hentar best að fá hæfilega stór fyrirtæki sem orkukaupendur og fjölga þeim smám saman, ef þess er kostur.

Í staðinn hefur verið tekin sú stefna að risaálver eigi að kaupa orkuna, en það þýðir að þvílík býsn þurfa að vera tryggð í upphafi, að orka heilu andshlutanna sé í boði og þar með engin leið til  að fara eftir forskrift okkar bestu manna í þessu efni.

Úr því að Alcoa þarf þessi býsn af orku fyrir álver á Bakka er það eðlilegt að sýslað sé við alla orkuna sem þarf á einu bretti svo að hægt sé að hafa yfirsýn yfir verkið.

Kröfur um að ákveða strax álver, helst í gær, og að vaða jafnframt sem hraðast inn á öll möguleg virkjanasvæði til að taka þau í nefið án heildaryfirsýnar eða vinnubragða, sem viðurkennd eru við vinnslu úr jörðu á alþjóðavísu, eru skýr dæmi um þá græðgi og ábyrgðarleysi sem veður uppi í þessum málum.    

Engar tilraunaboranir eftir allt saman

Athugasemdir

[Jóhannes Laxdal Baldvinsson, 9.9.2009 kl. 18:19]

Meintirðu kannski að Álrisarnir taka peninginn en við flýjum?

p.s takk fyrir að standa vaktina. Munurinn á óánægjunöldrinu og alvöru mótmælum er úthaldið

[Jóhann Grétar Kröyer Gizurarson (IP-tala skráð) 9.9.2009 kl. 23:21]

Sæll Ómar,

Þar sem þú ert nú kunnari þessum málum en ég langar mig að spyrja þig hvort það sé ekki hagkvæmara að reisa gróðurhús í staðinn fyrir álver, þ.e. m.t.t. til starfsfólk per orkueiningu segjum eininguna -starfsmenn/kílówatt ? 

Ég hef heyrt að það myndi margborga sig að reisa 100 gróðurhús í stað eins álvers auk þess sem fleiri gætu fengið vinnu. Það gæti einnig eytt innflutningi á grænmeti og ávöxtum og sparað umtalsverðan gjaldeyri, auk þess sem gróðurhus menga ekki. Og þegar maður kemur með þessa hugmynd og furðar sig á því afhverju hún er ekki skoðuð niður í þaula, þá er maður talin "úr tengslum við allan raunveruleika" o.s.frv. 

Skv. minni þekkingu ætti það að vera svo langt um hagkvæmara auk þess að þá gætum við haldið utan um náttúruauðlindir okkar og nýtt þær skynsamlega, t.d. það þyrfti ekki að reisa 200 metra háar stíflur tvist og bast um hálendið. 

Með kveðju,

Jóhann Grétar
3. árs BS. nemi í efnafræði

[Hildur Helga Sigurðardóttir, 10.9.2009 kl. 00:20]

"...að gæta öryggis og framsýni við nýtingu jarðhitasvæða".

Já, mikið er þetta eitthvað fyrir 30 árum síðan.

[Dagný Reykjalín (IP-tala skráð) 10.9.2009 kl. 00:21]

Alveg sammála þér Jóhann Grétar, eða ykkur báðum. Mér finnst þetta svo steinliggja að Húsvíkingar stofni samlag í kringum matvælaræktun í hátæknigróðurhúsi. Ég stofnaði hóp á Facebook um þetta fyrir nokkru, sem telur núna nærri þúsund manns.

http://www.facebook.com/group.php?gid=108368176566&ref=ts

Fyrir þá sem ekki eru skráðir á Facebook leyfi ég mér að setja inngangstexta hópsins hér:

Við hvetjum Húsvíkinga eindregið til að setja á fót hátæknigróðurhús og matvælastóriðju á Bakka við Húsavík. Þingeyingar eru rómaðir fyrir góðan mat og eru vonarstjörnur Íslendinga á sviði útflutnings á íslenskum ávöxtum og grænmeti í framtíðinni.
- Húsvíkingar eiga landrými, orku, stórkostlegt vatn, gott loft, góðan mannafla, gætu sjálfir átt stóriðjuna á sínu landi með eigin orkugjafa og innleyst hagnað í sína þágu. Hugsanlega væri hægt að fá stærri fyrirtæki á sviði matvælaframleiðslu í samstarf þar sem þörfin fyrir "hreint hráefni" í heiminum er afskaplega mikilvæg, markaðurinn fyrir lífrænt ræktaðar (ökologiskar) vörur stækkar ár frá ári og útflutningsverð íslenskra vara er orðið samkeppnishæft.
- Grænmetisstóriðja við Bakka myndi stórauka fæðuöryggi Íslendinga og vöruþróun í hátæknigróðurhúsinu eykur fjölbreytni í íslenskri ræktun. Einnig væri hægt að hugsa sér frekari hráefnisvinnslu á matvælum til útflutnings, t.d. pestó, tómatsósa, súrar gúrkur osfr.
- Útflutningur á grænmeti frá Bakka skapar mikinn og dýrmætan gjaldeyri þar sem lítill hluti af aðföngum er innfluttur. Hátækni grænmetisstóriðja myndi minnka þörf fyrir innflutning á grænmeti þar sem fleiri tegundir væri hægt að rækta yfir lengri árstíma.
- Grænmetisstóriðja skapar fjölda starfa á öllum stigum, við framleiðslu, dreifingu, markaðssetningu, vöruþróun, viðhald og þjónustu.
- Grænmeti væri hægt að flytja út til Norðurlandanna oft í viku, þar sem lenging flugbrautarinnar við flugvöllinn á Akureyri er á lokastigi og göng í gegnum Vaðlaheiði munu auðvelda vöruflutninga.
- Hægt er að komast af með minni orku en við annan hátækniiðnað sem þýðir að ágangur á Þeistareykjarsvæðið verður bærilegra, endingin á svæðinu betri og rými skapast fyrir fleiri framleiðslufyrirtæki.

Við skorum á Húsvíkinga að taka örlögin í sínar hendur með því að byggja upp öfluga sjálfsmynd og framtíðarsýn með sínum sterkustu vopnum.

Ég hef hins vegar ekki þekkingu á tæknilegri framkvæmd eða útreikningum, og vildi því gjarnan koma boltanum áfram.

[Jóhann Grétar Kröyer Gizurarson (IP-tala skráð) 10.9.2009 kl. 12:06]

Góðan daginn,

Dagný, mér líst mjög vel á þessa hugmynd. Þú getur fengið hjálp við þróun á þessari hugmynd og tæknilegri útfærslu (og útreikninga) hjá Nýsköpunarmiðstöð Íslands, www.nmi.is . Ég væri mjög til í að sjá hátæknigróðurhús (í fleirtölu) rísa á bakka í staðinn fyrir erlenda stóriðju sem gæti farið hvert sem er ef ódýrari orka væri í boði, t.d. í Kína. 

Með kveðju,

Jóhann Grétar