Beið keppnin ósigur ?

Það eru alltaf sömu málleysurnar sem lifa góðu lífi í fjölmiðlum ár eftir ár. Það vekur furðu því þær eru ekki svo margar.

Ein þeirra skýtur enn einu sinni upp kollinum í frétt mbl.is af söfnuninni fyrir Grensásdeild og raunar hefur hún líka skotið upp kollinum hjá þulum í Söngvakeppni evrópskra sjónvarpsstöðva og víðar.

Sagt er í frétt mbl.is að tveir menn hafi sigrað keppnina, - "þeir sigruðu keppnina."

Af því hlýtur að leiða að keppnin hafi beðið ósigur fyrir þessum mönnum.  

Málvillur eru hvimleiðar en leiðinlegastar eru þær sem fela í sér rökvillur líka.

Ef maður sigrar einhvern, þá bíður mótaðilinn ósigur fyrir manni.  

Þetta getur ekki verið einfaldara: Mennirnir sigruðu í keppninni, þeir urðu hlutskarpastir í keppninni. Keppnin sjálf beið ekki ósigur fyrir þeim.   

864.000 söfnuðust fyrir Grensásdeild

Athugasemdir

[Þorvaldur Sigurðsson (IP-tala skráð) 7.10.2009 kl. 19:52]

Hér mætti og minnast á málfar íþróttafréttamanna, í hverra hópi ég var í fyrndinni, en þar fer ferlega í mínar fínustu taugar tuggan „kom inn á sem varamaður“. Sá sem kemur inn á í leik var varamaður en er nú orðinn aðal. Komi einhver til leiks eða vinnu „sem eitthvað“ tekur hann þátt sem slíkur til enda. Ég er kennari, en stundum kem ég til vinnu sem smiður og þá smíða ég (eða klambra). Í íþróttum er engin varamannsstaða til á vellinum; þar leika menn sem miðframherjar, svíperar, sem Gísli heitinn Jónsson vildi kalla sneril, eður frelsingjar svo eitthvað sé talið. Þetta tal þeirra sem um knattspyrnu véla í fjölmiðlum að menn leiki „sem varamenn“ er óþörf tugga og þar að auki villandi; fullkomlega er nóg að skrifa: „Jón kom inn á í síðari hálfleik“ til að öllum sé ljóst hvað um er að vera.

Orð eru dýr; spörum þau.

Og nú líður mér ögn betur

Kv

[Manni (IP-tala skráð) 7.10.2009 kl. 20:30]

Mjög algengt er að sjá auglýsingar þar sem fólk "leitar AF"(en ekki AÐ) einhverju td. íbúð,bíl eða einhverju öðru.

[Eiður Svanberg Guðnason, 7.10.2009 kl. 22:57]

 Þarfar ábendingar. Það er  hárrétt að sömu vitleysurnar eru sí og æ endurteknar. Þær  eru  kannski ekki nema  svona 100 til 150 talsins. Kannski ætti að búa til lista og láta þá sem illa  eru að sér  læra utan að  eins og  unglingar voru látnir læra kverið í gamla daga?  Ég bara segi svona.

[Ólafur Þórðarson, 7.10.2009 kl. 23:04]

Það var keppni og einhver sigraði. Viðkomandi var ekki í samkeppni við keppnina sjálfa heldur aðra þá sem tóku þátt í keppninni. Svo það er vel hægt að sigra keppnina enda augljóst að enginn er að halda að verið sé að keppa við sjálfa keppnina.

Hvað með þetta: "Bandamenn sigra stríðið."

Er nokkur maður að halda að þeir hafi verið í stríði við stríðið?  Eða í keppni við keppnina? Má ekki segja að það sé sjálfgefið að fólk skilji hvað átt er við án þess að efast?

Svo þegar notast er við "Þeir sigruðu í keppninni" þá þykir mér þurfa að fylgja um hvað kepnin snýst, þ.e. að fylgja þurfi "Þeir sigruðu í keppninni milli A og B."  Annars sigra þeir bara keppnina.

[Hilmar Sigurðsson (IP-tala skráð) 7.10.2009 kl. 23:16]

Sammála Ómar eins og oft áður !   Þú ert einn af þeim,  sem ég les alltaf.  Mér finnst málfar t.d. í umfjöllun um íþróttir oft vera með ólíkindum.   Valur vann sigur á KR ! Sum sagt sigurinn tapaði !  Betra:  Valur sigraði (eða vann) KR ?   Viðtöl við leikmenn og þjálfara að leik loknum eru oft skrautleg,  skil vel að "adrenalínið" flæðir.   Finnst alltaf jafn einkennilegt þegar viðkomandi segja sem svo að þeir hafi staðið sig illa "varnarlega" en vel  "sóknarlega" !  Af hverju ekki bara slæmir í vörn en góðir í sókn ? Hvaða "legu" tal er þetta    Ennfremur: boltinn barst "upp" völlinn.  Bíddu nú við.  Hallar völlurinn, er hann ekki láréttur, eða er brekka í honum ?  Betra: boltinn barst fram eða aftur.   Margt fleira mætti tína til.  Takk fyrir ánægjulegt blogg þitt, þó ég sé ekki alltaf sammála ! :)