Skiptir nær engu á heimsvísu.

Smáþjóðir eins og Norðurlandaþjóðirnar falla oft í þá gryfju að mæla hluti á sinn mælikvarða og draga síðan af því þá ályktun að það skipti miklu málið fyrir heimsbyggðina.

Það skiptir að vísu miklu máli fyrir Norðmenn að hafa fundið nýjar olíulindir, en nánast engu máli fyrir heimsbyggðina því að Norðmenn komast ekki á lista yfir 17 mestu olíuþjóðir heims og "olíuauður" þeirra er aðeins örlítið brot af vinnanlegri olíu á jörðinni.

Við Íslendingar höfum margir hverjir fengið það inn í höfuðið að Norðmenn séu meðal helstu olíuþjóða heimsins en það sem ruglar okkur er það að Norðmenn eru í hópi smáþjóða með aðeins 0,08% af mannfjölda heimsins og þess vegna munar þá sjálfa mikið um þessar olíulindir á meðan þær munu endast þótt þær teljist vart fréttnæmar á heimsvísu.

Stórfréttir um nýja olíufundi kveikja alltaf í þeim sem telja það vera svartsýnisraus að olíuöldin hafi nú náð hámarki og héðan af geti leiðin ekki lengur legið upp á við heldur niður á við.

Þó er það viðurkennd staðreynd að fásinna er að halda áfram á sömu braut og gert hefur verið, enda verður vinnslan á nýjum olíulindasvæðum alltaf dýrari og dýrari og erfiðara að ná olíunni.

Tvöfalt meiri olía en talið var

Athugasemdir

[Haukur Kristinsson (IP-tala skráð) 22.10.2011 kl. 21:56]

Rétt hjá Ómari og þörf áminning, ekki síst hér á skerinu, þar sem vanþekking og óskhyggja nær of oft tökum á fólki. Auðvitað finnast nýjar olíulindir, en með áframhaldandi notkun, sem eykst stöðugt, verðum við eftir ekki meira en hálfa öld í miklum vanda. Ein ný olíulind og menn telja sjálfum sér trú um að nóg sé af jarðefnaorkugjafa í iðrum jarðar. Einn kaldur dagur og loftslagsbreyting af mannvöldum er hégómi og ímyndun vísindamanna.   

 

[Björn Kristinsson (IP-tala skráð) 23.10.2011 kl. 10:40]

Það er ofmælt um mikilvægi olíunnar fyrir norskt efnahagslíf.  Vissulega skiptir hún máli en vægi hennar er mun minna en fólk telur. 

Það eru þrjár greinar sem norskt efnahagslíf hvílir á, fiskveiðar og fiskeldi, ferðamennska og "offshore" iðnaður. 

Aðeins lítill hluti af tekjum Noregs rennur á hverju ári til raunhagkerfisins.  Um þetta er pólitísk sátt.

Þannig má frekar líta á olíutekjur Noregs á tvennan hátt sem sveiflujöfnun en ekki síður hluta af gjaldeyrisvörnum þjóðarinnar þ.e. norska krónan sveiflast innan ákveðinna vikmarka á móti EUR en USD tekjur í olíu á móti.

Til upplýsingar þá er það áhugavert að um 55% af útflutningstekjum Íslands eru í EUR og tengdum myntum en 45% í USD (heimild Hagstofan).

[K.H.S., 23.10.2011 kl. 11:47]

Það er fyndið að hlusta á Össur ráðherra ræða í sama viðtalinu um að Íslendingar verði fremstir og fyrstir þjóða í að skipta yfir á nátturuvæna orku og að fara skuli með olíusjóðinn sem tekur að hlaðast upp ekki seinna en 2020 sem varlegast eins og Norðmenn hafi gert.

Allir aðrir munu asnast á olíunni. Við Íslendingar alltaf fremstir og mestir. 

[Sigurður Haraldsson, 23.10.2011 kl. 12:40]

Notkun olíu er viðbjóður og arðrán hnattarins!

[Teitur Haraldsson, 23.10.2011 kl. 15:11]

Þessi fundur norðmanna dugar fyrir allri olíunotkun jarðarbúa í yfir 100 daga.
Það er bara ekkert smá á neinn mælikvarða.

[Sigurður Freyr Hafstein (IP-tala skráð) 23.10.2011 kl. 18:26]

Noregur er 8. stærsti olíuútflytjandi í heimi (sjá http://en.wikipedia.org/wiki/Oil_exports) sem telst nú líklega skipta einhverju máli og þessi olíufundur nægir heimsbyggðinni í 17 daga ef allt fer á besta vel (olíunotkun heimsins er ca. 85 milljón tunnur á dag).

[Sigurður Freyr Hafstein (IP-tala skráð) 23.10.2011 kl. 18:34]

Vúps, las fréttina vitlaust, þetta eru tonn en ekki tunnur svo Teitur hefur á réttu að standa. Þessi olía dugar heiminum í yfir 100 daga ef það tekst að vinna hana alla.

[Sigurður Freyr Hafstein (IP-tala skráð) 23.10.2011 kl. 18:54]

Hér er upprunalega fréttin frá Reuters. Afskaplega hefur Moggamönnum gengið illa að skilja þetta rétt. Samtals gætu þetta verið í mesta lagi 3300 milljónir tunna, það væri olíunotkun heimsins í tæpa 40 daga.

http://www.reuters.com/article/2011/10/21/statoil-aldous-idUSL5E7LL0DZ20111021

[Teitur Haraldsson, 24.10.2011 kl. 07:52]

Takk fyrir leiðréttinguna Sigurður Freyr.
Ég gerði fljótærnismistök.