Gildi píslarvættisdauðans.

Píslarvættisdauði þar sem píslarvotturinn drepur aðra, er illu heilli oft mærður af þjóðum og trúarhópum. Slíkar sjálfsmorðsárásir eru óhugnanlegar og óverjandi. 

Dæmin eru mýmörg, allt frá því að senda menn útí opinn dauðann í orrustum eða jafnvel loftárásum, bara til þess eins að drepa sem flesta aðra. 

Í svonefndri Doolittle-árás á Japan vorið 1942 vissu flugmennirnir á vélunum 16, sem flogið var, að líkurnar á því að þeir lifðu af væru óvenju litlar, því að forsenda árásarinnar var að flugvélunum yrði flogið aðeins aðra leiðina, af því að þær höfðu ekki flugþol til að komast til baka. 

En heppnin var með árásarmönnum og þeir komust langflestir lífs af. 

50 þúsund ungir Bretar voru sendir út í opinn dauðann fyrsta daginn í orrustunni við Somme fyrir réttri öld til þess að fórna sér fyrir föðurlandi og drepa sem flesta Þjóðverja. 

Í lok Seinni heimsstyrjaldarinnar sendi Hitler kornunga drengi á vígvöllinn til þess að deyja fyrir föðurlandið. 

70 prósent þeirra, sem sendir voru á þýskum kafbátum til að sökkva skipum bandamanna og drepa óvini, lifðu kafbátahernaðinn ekki af, voru í raun sendir út í opinn dauðann.  

Þessar árásir ásamt ótal öðrum voru gerðar af kristnum þjóðum en þjóðir með ýmis trúarbrögð hafa frá örófi alda látið unga menn fórna sér fyrir föðurlandið. 

Kamikaze loftárásir Japana á bandarísk skip undir lok Seinni heimsstyrjaldarinnar byggðust á því að einn maður dæi píslarvættisdauða og dræpi sem flesta óvini. 

Þetta var á skjön við orð bandaríska hershöfðingjans Pattons:  "Menn fara ekki í stríð til að fórna lífi sínu fyrir föðurlandið, heldur til þess að hinn villimaðurinn fórni sínu lífi fyrir sitt föðurland. 

Píslarvætti er að ýmsum tegundum. Grundvöllur kristinnar trúar er píslarvætti Krists, sem þó fólst ekki í því að drepa neinn. Var samt fórn foreldris, því að grundvallarsetning Biblíunnar er þó svona: "Svo elskaði Guð heiminn, að hann gaf son sinn eingetinn til að hver sem á hann trúir, glatist ekki, heldur eigi eilíft líf."

12 til 14 ára barn í sprengjuvestinu

Athugasemdir

[Hörður Þormar, 21.8.2016 kl. 19:18]

Ég minnist þess að fyrir nokkrum árum þá sendu Hamas liðar á Gaza þroskaheftan dreng með sprengjubelti yfir landamærin til Ísraels. Af einhverjum ástæðum þá sprakk beltið ekki. Ísraelskir hermenn tóku á móti drengnum og gerðu beltið óvirkt. 

[Steindór Sigurðsson (IP-tala skráð) 21.8.2016 kl. 20:36]

Þetta er frábær grein hjá þér Ómar og mjög góð heimild um það að kristnir eru stundm ekkert betri en hinir. Í mínum huga eru í grundvallaratriðum tvær tegundir að kristni. Ég flokka það í veraldlega kristna og andlega kristna. Þessir veraldlegu kristnu eru þeir sem tilheyra kristnu trúarbrögðunum og í þeim hópi eru flestir.

Andlega kristnir eru þeir sem eru sannkristnir og hafa það eitt að markmiði að bæta sjálfa sig. En að gera þessu almennileg skil í stuttu máli er bara einfaldlega ekki hægt. Ég er búinn að vera með það í maganum í mörg ár að skrifa bók um þetta mál. Sennilega kemst ég ekki í það fyrr en ég fer á eftirlaun. En þakka þér fyrir frábæra grein.

Og að lokum. Bókin á að heita:"Drottinn dó fyrir sekan mann."