Árekstur olíuskips við borgarísjaka 2005.

Fyrir fjórum árum varð það óhapp norður af Íslandi að stórt olíuskip rakst á borgarísjaka og laskaðist talsvert.

Skipið laumaðist inn til Hafnarfjarðar til bráðabirgðaviðgerðar og lét sig síðan hverfa, en íslensk yfirvöld höfðu enga vitneskju um þetta fyrr en síðar.

Þetta kom aldrei í fréttum en fulltrúi frá ráðuneyti upplýsti þetta á fundi um olíuhreinsistöðvar á Bíldudal í fyrra.

Þrátt fyrir að mikið sé gumað af nákvæmni gervitunglamynda var talið að svæðið sem skipið sigldi um væri íslaust og gervitunglamyndir bornar fyrir því.

Hugsanlega er það ekki spurning um hvort heldur hvenær olíuslys verður við Ísland. Miklu munar hvort það verður fyrir austan land eða vestan vegna hafstrauma sem streyma norður með vesturströndinni og Vestfjörðum og þaðan til austurs með norðurströndinni.

Þetta snertir ekki aðeins fiskimiðin heldur ekki síður fuglalífið í þremur stærstu fuglabjörgum Evrópu, Látrabjargi, Hælavíkurbjargi og Hornbjargi.

Ég hef kynnst því af eigin raun á siglningu meðfram Látrabjargi að enda þótt mönnum sýnist fuglarnir vera að mestu í björgunum eru lítið færri á sjónum og í kafi.  

Það er full ástæða til þess að vera á varðbergi og fylgjast með því sem virðist vera fylgifiskur vaxandi olíuflutninga við landið.  

Gæslan fylgist með olíuskipi

Athugasemdir

[Rafn Haraldur Sigurðsson (IP-tala skráð) 20.10.2009 kl. 21:39]

Ég vil bara benda á þetta hérna. Þarf að setja strangar reglur um siglingar með svona varning  og að þeim sé fylgt eftir

kveðja.

[Jón Guðbjörn Guðjónsson, 20.10.2009 kl. 21:52]

Það getur orðið slys með þessi skip sem og önnur skip,og þótt ísjakar séu þarna er skipið með fullkomin siglingatæki.

[inga (IP-tala skráð) 20.10.2009 kl. 21:59]

Þetta er ekki rétt Ómar. Vandamálið var m.a. að skipverjar höfðu ekki samband við Landhelgisgæsluna eða Veðurstofuna til að fá hafisupplýsingar (eins og skip eiga að gera á þessum slóðum), en gæslan hafði þá nýlega farið i flug og nokkur is sást einnig á gervitunglamyndum frá þessum tima. Það var með öðrum orðum vitað um hafisinn. Hitt er annað mál að aldrei sjást allir borgarisjakar eða allur hafis með gervitunglamyndum,  og enginn sem þekkir til heldur sliku fram. Jakar sem sjást einnig illa i skiparatsjám, og eru þvi einna hættulegastir, sjást engan veginn með gervitunglamyndum. Veistu hvort skipið rakst á borgaris eða hafis?  Bestu kveðjur inga

[Bjössi (IP-tala skráð) 20.10.2009 kl. 22:33]

Nokkrar spurningar til þín Ómar :

1.   Hvað hét skipið ?

2.   Lak úr því Olía  ?

3.   Hver er heimildarmaður þinn og  úr hvaða ráðuneyti kom hann ?

4.    Hefuðu sannreynt (eins og þér sem gömlum fréttamanni ætti að vera eiginlegt),

       að viðkomandi heimildarmaður,  hafi farið rétt með staðreyndir  ?

5.    Veistu hvort einhver eftirmál urðu af atvikinu ?

 o.s.frv

                            B. Kveðja Bjössi    

[Ómar Ragnarsson, 20.10.2009 kl. 23:06]

Ég er að fara í erfiða ferð eldsnemma í fyrramálið og get ekki grafið ofan í þetta í kvöld. Þessi maður frá ráðuneytinu var þarna sem fyrirlesari, sérstaklega fenginn til að fræða fundargesti um þessa hlið mála.

Mig minnir að þessi árekstur við ísjakann hafi orðið í júlí 2005.

Ég á fundinn á Bíldudal sem haldinn var upp úr áramótum 2008 á myndspólum en hef ekki tíma núna til að spila þær og aðgæta hver þetta var.

En fundurinn var vel sóttur og allir fundarmenn ættu að muna þetta. Meðal þeirra voru sveitarstjórnarmenn og síðan auðvitað Ólafur Egilsson, talsmaður Rússanna sem sagt er að 99,8% líkur séu á að reisi olíuhreinsistöð í Hvestudal við Arnarfjörð.

[Guðmundur (IP-tala skráð) 20.10.2009 kl. 23:33]

Það skal tekið fram í upphafi að ekki mæli ég mengunarslysum bót, því fer fjarri, en af því að Rafn Haraldur vísar til Exxon Valdes þá er samt rétt að benda á að olían er nátturlegt efni sem brotnar upp á mismunandi löngum tíma. Fer það eftir olíunni sjálfri og umhverfinu hversu hratt þetta gerist. Þegar hafist var handa við hreinsun eftir Exxon Valdes var viljandi skilið eftir ansi stórt svæði sem alveg var látið vera, og var það til að hafa samanburð til rannsóknar.

Mér skilst að niðurstaðan hafi verið sú að það svæði sem var hreinsað með tilheyrandi efnum sé alveg steindautt og erfitt sé fyrir dýralíf að komast í gang þar að nýju meðan að svæðið sem náttúran sá um er komin á fullt skrið. Skýringin sé sú að hreinsiefnin drápu meira en olían.

Ekki mörgum árum eftir Exxon Valdes slysið strandaði olíuflutningaskip við Hjaltlandseyjar í slæmu veðri og miklu brimi. Þar varð mengunin miklu minni þar sem sjógangurinn braut olíuna mjög fljótt upp. Í báðum tilvikum var um svipaða olíu að ræða.

Vissulega hefur svona mengunarslys stórkostleg áhrif og skal að sjálfsögðu gera allt sem unnt er til að koma í veg fyrir slíkt.

[Þorsteinn Briem, 21.10.2009 kl. 00:43]

Umhverfisstofnun:

Mengun hafs og stranda

Strand Wilson Muuga

[Arnór Baldvinsson, 21.10.2009 kl. 01:30]

Sæll Ómar,

Þar sem ég bý, í Port Angeles í Washington fylki, er stöðugur straumur olíuskipa sem koma hér til hafnar til viðhalds og viðgerða.  Þar ber mest á svo nefnum Polar skipum sem eru 125 þúsund tonn og einnig Alaskan skipum sem eru um 185 þúsund tonn og bera 1,0 og 1,3 milljónir tunna af olíu.  Venjulega eru þessi skip tóm þegar þau koma hér til hafnar en það koma líka hlaðin skip, en þau eru venjulega mun minni þar sem þau geta ekki lagst að bryggju hér.  Þegar þessi skip koma hingað eru settar upp flotgirðingar í kringum þau og í sumar var hér um 200 manna hópur frá bæði Bandaríkjunum og Kanada á æfingu til að takast á við hugsanleg mengunarslys. 

Exxon Valdez olían var "hreinsuð" upp, en það þarf ekki að róta nema nokkra sentimetra niður í möl og sand á strandsvæðum þarna uppfrá til að finna olíu.  Með árunum hefur hún borist suður með ströndinni og nær nú hálfleiðina niður vesturströnd Kanada ef ég man rétt.  Það er ekki talið að þessi olía verði endanlega horfin fyrr en um næstu aldamót.  Hreinsiefnin voru e.t.v. ekki svo slæm, en það eru allskonar aukaefni sett í olíu sem valda mun verri mengun heldur en hrein jarðolía. 

Frá því að Exxon Valdez strandaði fyrír 20 árum hefur eitthvað um 20 sinnum meira magn af olíu farið í sjóinn heldur en lak úr Exxon Valdez, þrátt fyrir að skipafélög hafi gert ýmsar bragarbætur.  Oft eru þetta gamlir kláfar sem ættu ekki að vera í notkun og hafa t.d. ekki tvöfaldan byrðing sem nú er gerð krafa um hérna á vestur ströndinni.  Flest þeirra olíuskipa sem hér sigla eru ný, byggð á síðustu 5-8 árum og eru öll með tvöföldan byrðing.  Þau eru líka hólfuð mun meira niður, sem dregur úr því magni sem á að geta lekið og þar með dregur það úr líkunum á stórfelldum mengunarslysum, en það er ekkert sem getur komið algjörlega í veg fyrir þau. 

Maður fær aðra tilfinningu fyrir olíunotkuninni hér þegar maður sér þessi stóru, milljón tunna skip, kannsti tvö eða þrjú af þeim hérna í höfninni á sama tíma og maður veltir fyrir sér að farmurinn í hverju skipi endist Bandaríkjunum í rétt um 70 mínútur, því við hér notum um 21-24 milljónir tunna á dag, svo þetta endist ekki lengi!

Kveðja,