Maður samsæriskenninganna.

Donald Trump virðist sjá samsæri í hverju horni, svo sem svindl í forsetakosningunum og það, að bandarískir hershöfðingjar séu að sækja að Mosul til þess að laga stöðu Hillary Clinton.

Nokkur umræða spannst um stöðuna í Írak og Sýrlandi og Trump taldi Bandaríkjamenn vera að hygla Írönum á alla lund með stefnu sinni þar.   

Svipað hefur komið upp áður skömmu fyrir kosningar.  

Hrakfarir Bandaríkjamanna vegna byltingarinnar í Íran 1979 og í gíslatökumálinu þar í kjölfarið, auk misheppnaðri árásar Kana til að frelsa þá átti stóran þátt í því að Jimmy Carter sitjandi forseti tapaði fyrir Ronald Reagan 1980. 

Gíslarnir voru látnir lausir eftir að Reagan tók við embætti og ýjað var að samsæri í því sambandi. 

Hillary vitnaði í það álit málsmetandi manna að Donald Trump væri ekki treystandi til að fara með úrslitavald varðandi beitingu kjarnorkuherafla landsins og höfðaði þannig til kjósenda, sem óar við mistökum eða misbeitingu í því sambandi.  

 

Mun Trump ekki una niðurstöðunni?

Þegar botninum er náð er aðeins ein leið.

Botninum í sögu kappræðna frambjóðenda fyrir forsetakosningar í Bandaríkjunum var náð í síðustu kappræðu Hillary Clinton og Donalds Trumps, sem varð að dapurlegum leðjuslag. 

Þess vegna eru fyrstu viðbrögð þau við síðustu kappræðu þeirra, sem var að ljúka þegar þetta er skrifað, að eftir að hafa verið á lægsta mögulega plani síðast, hafi varla verið hægt annað en að ummræðan yrði ögn skárri nú.

Engu að síður voru umræðurnar áfram neikvæðar og oft lágkúrulegar, enda óhjákvæmilegt annað en að tala um helstu ásakanir Hillarys og Trumps, sem dunið hafa í fjölmiðlum undanfarna tíu daga.

Fleirum fannst Trump standa sig verr en Hillary síðast, ef marka má skoðanakannanir þar um, og það fer sjálfsagt talsvert eftir almennum stjórnmálaskoðunum fólks, hvað því finnst í þetta sinn.

Fyrsta tilfinning síðuhöfundar er að Trump hafi ekki haft betur í þetta sinn frekar en í hinum kappræðunum tveimur.

Ásakanir hans á hendur Hillary varðandi heilsufar hennar lágu í láginni í kvöld, enda var ekki á henni að sjá á frammistöðu hennar að þessar dylgjur hefðu bit.  

Stefnir í hörkuviðureign í Vegas

Búið að taka átta ár.

Átta ár og 13 dagar eru síðan þeir atburðir, orð og gerðir áttu sér stað, sem loksins nú eru að koma upp á yfirborðið eftir öll þessi ár.

Meðal annars virðist þetta blasa við: 

Starfsmaður Seðabankans brýtur trúnað við bankann og gaukar mikilvægum trúnaðarmálum að lögfræðingi Samtaka fjármálafyrirtækja sem geta þar með nýtt sér dýrmætan mánudag til að bregðast við bankahruni ef þessi vitneskja breiðist út og er nýtt. 

Seðlabankastjóri lætur hljóðrita sérstaklega símtal sitt við forsætisráðherra landsins um neýðarlán handa fallandi banka án þess að láta hann vita af því að símtalið sé hljóðritað.

Þegar þetta vitnast síðar segir ráðherrann fyrrverandi að forsætisráðherra eigi ekki að þurfa að sæta slíku.  

Hann ræðir mál Kaupþings ekki í ríkisstjórn sinni.

Bankahrunið 2008 var að sönnu dæmalaust út af fyrir sig, en margt fleira í kringum það virðist hafa verið það líka.  

Braut trúnað í aðdraganda neyðarlaga

40 kílómetrum styttra frá núverandi flugvelli til Vífilsstaða en frá Keflav.flugvelli.

Það eru 48 kílómetrar frá Keflavíkurflugvelli til núverandi bráðamóttöku í Fossvogi en 8 kílómetrar frá Vífilsstöðum. Mismunurinn er 40 kílómetrar. 

Hvassahraunsflugvöllur er óráð vegna nálægðar við Reykjanesfjallgarðinn og ókyrrðar frá honum. 

Bráðamóttöku má auk þess halda áfram í Fossvogi þótt aðalsjúkrahúsið rísi á Vífilsstöðum. 

Meginatriði málsins hefur ætíð verið haldið fram af síðuhöfundi, að það er 170 kílómetrum lengri samanlögð ferðaleið fram og til baka milli miðju byggðar á höfuðborgarsvæðinu á landi og í lofti ef Keflavíkurflugvöllur er notaður heldur en ef núverandi flugvöllur er notaður. 

Flugvöllur í Vatnsmýri þó að spítali verði á Vífilsstöðum

Fyrirsjáanleg fylgisminnkun Pírata og sótt að Sf úr tveimur áttum.

Fylgisminnkun Pírata hefur verið fyrirsjáanleg og þeir fá minna upp úr kjörkössunum en í skoðanakönnunum. 

Í fyrra stakk Árni Páll Árnason, þáverandi formaður Samfylkingar, upp á því að flokkurinn leitaði inn í ákveðið tómarúm hægra megin á miðjunni. 

Þessu átti margir fylgismenn flokks, sem heitir Jafnaðarmannaflokkur Íslands, erfitt með að kyngja og ekki varð af þessu.

Nú hefur Viðreisn sótt inn í þetta tómarúm.

Vinstra megin eða róttækni megin frá hafa Vinstri græn og Píratar sótt sér fylgi meðal óánægðra kjósenda og aflað sér hluta þess fylgis sem Samfylking hafði áður.  

Aukið fylgi Vinstri grænna

Athyglisverður og næsta dæmigerður fundur í gærkvöldi.

Fyrir hverjar kosningar dynja fyrirspurnir og fundaboð á framboðunum. Svo mikið er þetta flóð, að liggur við að það þurfi að svara spurningalistum frá einstökumm húsfélugum. 

Á fundi sem Náttúruverndarsamtökin héldu með fulltrúum framboðanna í gærkvöldi í Norræna húsinu heyrðist vel hvernig frambjóðendur reyndu að gera hosur sínar grænar fyrir áheyrendum. 

Þar mátti heyra setningar eins og þær að núverandi stjórnarflokkar hefðu alla tíð verið í fararbroddi í náttúruverndar- og umhverfismálum, líka þeir flokkar sem síðustu áratugi hafa haldið fram hinni hörðu stóriðjustefnu, sem hefur haft í för með sér langstærstu óafturkræfu umhverfisspjöll sem möguleg eru. 

Sigríður Andersen var nokkuð sér á parti. Hún taldi, að vegna þess hve mikið munaði um árangur þess að endurheimta votlendi, munaði sáralítið um það hlutfallslega að minnka losun bílaflotans.

Hún taldi meira að segja í upphafi fundar að það þyrfti að aflétta gjöldum af bílaflotanum almennt.  

Hún kvaðst hafa heyrt um það að kolefnisspor rafbíla varðandi framleiðslu þeirra og förgun væri svo stórt að það væri jafnvel meira samanlagt en kolefnisspor annarra bíla. 

Síðar á fundinum talaði hún þó reyndar á jákvæðari hátt um rafbílavæðingu. 

Þegar hún var gagnspurð um það hvort hún héldi að við kæmumst upp með það, einir Evrópuþjóða, að taka upp slíka stefnu gagnvart bílaflotanum, kom hið algenga svar að við ættum ekki að láta ESB ráðskast með okkur. 

Henni var þá bent á það að þetta sérstaka mál væri ekki tengt því að við gengjum í ESB heldur væri einungis um það að ræða að þjóðirnar, sem stæðu að EES-samningnum hefðu ákveðið að verða samferða ESB í þessu máli. 

Hún sagði að skýr dæmi sæust um það að einkaframtakið myndi sjá um að moka ofan í skurðina. 

Og lokaorð hennar voru að engum flokki væri eins annt um náttúru Íslands og umhverfismál en hennar flokki. 

Sú var tíð að þingmennirnir Eysteinn Jónsson Framsóknarflokki og Birgir Kjaran Sjálfstæðisflokki voru í fararbroddi í náttúruverndarmálum á Íslandi. 

En það er langt síðan, mjög, mjög langt síðan, meira en 40 ár. 

Níu framboð í öllum kjördæmum

Minnir á atferli negrastráka í Kenýa.

Þegar keppt hefur verið í hinu magnaða Austur-Afríku safari ralli hefur það verið vandamál, að sums staðar á keppnisleiðunum hafa negrastrákar komið úr strákofaþorpun og farið í þann háskaleik, að stelast út á keppnisleiðirnar og standa það lengi kyrrir þar, að þeir yrðu síðastir til að forða sér.

Það er eitthvað að þegar vel menntað fólk stundar þann háskaleik sem stundaður er í Reynisfjöru.

Einhverjir eru kannski að þessu í meðvitaðri fífldirfsku en það er óhjákvæmilegt að álykta sem svo að það skorti enn á upplýsingagjöf og eftirlit.   

Hlaupa hlæjandi í öldur Reynisfjöru

Gamalt Framsóknarvandamál.

Þegar litið er yfir stjórnarsetuferil Framsóknarflokksins frá upphafi stofnunar hans sést, að hann var 16 ár í vinstri stjórn, 7 ár í miðjustjórn og 31 ár í hægri stjórn.

Stjórn Gunnars Thoroddsens 1980-83 er þarna skilgreind sem vinstri stjórn, en ef hún er skilgreind sem miðjustjórn verða árin í vinstri stjórn enn færri en þarna er stillt upp. 

 

Því verður að líta á meðaltalið af stöðu flokksins sem hægra megin á miðjunni.

Vandamál flokksins í hundrað ár hefur verið að þurfa að sitja á víxl í vinstri og hægri stjórnum og vera "opinn í báða enda" eins og þessu ástandi flokksins var eitt sinn lýst.

Í sjónvarpsviðtali í gærkvöldi skein í gegn í lokin, að Benedikt Jóhannesson átti erfitt með að skilgreina stöðu flokksins í ljósi tilboðs Pírata um stjórnarmyndunarviðræður fyrir kosningar.

Benedikt reyndi að afneita framtíðarsamvinnu við Sjálfstæðisflokk og Framsókn án þess að taka endanlega jákvætt í hugmyndir Pírata um viðræður fyrir kosningar.

Þetta er gamalt Framsóknarvandamál, sem Sigrún Magnúsdóttir myndi jafnvel kalla "lúxusvandamál", - eða "vegir liggja til allra átta."  

Allt á blússandi siglingu hjá okkur

Bjúgverpill.

Bjúgverpill (boomerang), vopn frumbyggja Ástralíu, hlaut heimsfrægð þegar hvítir menn námu þá álfu. Vopnið ku vera kastvopn, sem hefur þann loftflæðisfræðilega eiginleika að taka beygju á fluginu og fljúga til baka til þess sem beitir því. 

Þess eðlis virðist sú ætlan Donalds Trumps hafa verið að skaða framboð Hillary Clinton með því að grafa upp gömul kvennavandræði manns hennar og klína þeim á hana.

Í upphafi skyldi endinn skoða og Trump sást yfir þann möguleika, að svipað yrði hægt að nota gegn honum.

Honum sást einnig yfir það, að nokkur munur var á stöðu hans og Bill Clinton.

Bill er ekki í framboði, þótt hann sé eiginmaður Hillary og myndi þar af leiðandi verða búsettur í Hvíta húsinu, ef hún yrði forseti.

Trump getur sjálfum sér um kennt, verði umræðan um kvennamál næstu búseta í Hvíta húsinu honum til tjóns. Hann hóf þessa umræðu.   

„Ég trúi eiginmanni mínum“

Helsti gallinn er fólksfæðin og návígið.

Flestir Íslendingar kannast við það, að hafa ekki varað sig á því í umræðum um ýmis mál, að hugsanlega væri einhver nákominn flæktur í það mál sem talað væri um. 

Smám saman verður þetta til þess að það myndast einhvers konar smækkuð útgáfa af ástandinu í kommúnistaríkjum Evrópu á sinni tíð, þar sem ýmis mál verða tabú. 

Engin þjóð á hlutfallslega nálægt því eins mörg nöfn í Panama-skjölunum og Íslendingar. 

Og jákvætt viðhorf Íslendinga varðandi sjálfsbjargarviðleitni eykur á það, að horft sé fram hjá þessari nöturlegu staðreynd. 

Því að að með því að flytja auð sinn til útlanda eru viðkomandi að skapa sér hagstæða aðstöðu í erlendu myntkerfi á sama tíma og þorri fólks verður að una því að vera í hávöxtum íslenska krónuhagkerfisins. 

Að þessu leyti búa tvær þjóðir í landinu og misjöfn kjör þeirra eru ekki verjandi. 

Aðrir lekar og engir felustaðir