Píratar virðast glíma við sama vandamál og fyrr.

Hreyfingin/Borgaraflokkurinn 2009 og 2013 og arftakarnir Píratar í borgarstjórnarkosningunum 2014 glímdu við það vandamál, að fylgismenn þeirra voru líklegastir allra til að drattast ekki á kjörstað. 

Þetta virðist ætla að verða svipað nú ef marka má könnun Félagsvísindastofnunar. 

Hraðinn á fylgi sumra framboða nú minnir á borgarstjórnarkosningarnar 2010 og Alþingiskosningarnar 1995. 

VG og Píratar hnífjöfn

Sums staðar valda jarðstrengir meiri náttúruspjöllum en loftlínur.

Þegar jarðstrengir eru lagðir um gróið land á láglendi og um byggð eða þegar röskuð svæði, er stærsti kostur þeirra sá, að það verður engin sjónmengun af þeim. 

Í könnun, sem gerð var á viðhorfum ferðamanna til háspennulína kom í ljós að þeim fannst slíkar línur trufla og jafnvel eyðileggja meira upplifunina af óspilltri en flest annað. 

Ferðafólk dæmir oft það sem það sér út frá augnablikinu og áttar sig ekki alltaf á því, að afturkræfar loftlínur valda oft miklu minni spjöllum til lengri tíma litið en óafturkræfar framkvæmdir.

Sömuleiðis áttar fólk sig ekki alltaf á því, að jarðstrengur sem lagður er um ósnortið hraun veldur mun meiri óafturkræfum spjöllum en loftlína.

Leggja þarf vegarslóða meðfram loftlínum til þess að hægt sé að komast að þeim vegna viðhelds eða viðgerða, og geta þeir í sumum tilfellum verið fólgnir í því að aka ofaníburði ofan á hraun, sem hægt er í mörgum tilfellum að fjarlægja síðar ef línan er lögð niður.

Þar sem jarðstrengur er lagður niður í jörð, þarf að rista hana upp með því að grafa stóran skurð, og þegar um úfin ósnortin hraun er að ræða, felast oft í því mikil náttúruspjöll til framtíðar, miklu meiri en ef gerð væri loftlína.  

 

Verða að umhverfismeta jarðstrengi

Nauðsynlegt víðsýni.

Þótt listaheimurinn eigi að vera heimkynni víðsýni hefur hið gagnstæða oft ráðið ríkum á ýmsum sviðum. 

Menn hafa hyllst til þess að raða listinni í aðgreind hólf, svo sem bókmenntir, tónlist, leiklist o.s.frv og einnig í fleiri flokkanir, sem sem í hámenningu og lágmenningu. 

Að sjálfsögðu hefði Bob Dylan fyrir löngu átt að vera búinn að fá bókmenntaverðlaun Nóbels, og er það fagnaðarefni að loks skuli nauðsynlegt víðsýni hafa ráðið för.

Hér heima tók það talsverðan tíma að menn áttuðu sig á list Megasar og það er til dæmis rammíslensk hefð að aðgreina höfunda texta við tónlist í tvo flokka, annars vegar ljóðskáld og hins vegar textahöfunda.

Þar hafa svonefndir "dægurlagatextar" og "dægurlagatextahöfundar" verið í lægsta flokki hjá menningarvitum þjóðar sem syngur "Ég er kominn heim" eftir "dægurlagatextahöfundinn" Jón Sigurðsson fjálglegar en sjálfa þjóðsönginn 55 árum eftir að Óðinn Valdimarsson "dægurlagasöngvari" söng textann við hið erlenda lag fyrst inn á plötu.  

Bob Dylan fær Nóbelinn

Stjórn Steingríms var ekki óstöðug 1988-91.

Það er rétt að að öðru jöfnu sé margra flokka stjórn óstöðugri en tveggja flokka stjórn. En það er ekki algilt. Frá því að stjórn Steingríms Hermannssonar var myndið haustið 1988 sat hún tryggilega til enda kjörtímabilsins 1991. 

Þarna réði meira stjórnmálaleg samskiptasnilld Steingríms en aðrar aðstæður, því að í byrjun hékk stjórnarmeirihlutinn á einu atkvæði þótt fjögur framboð stæðu að stjórninni.

Síðar orðaði hann það svo að löngum stundum hefði jafn mikill tími farið í það hjá honum að semja við Stefán Valgeirsson einan en alla aðra til samans. 

 

Eftir að Steingrímur gat kippt hluta Borgaraflokksins inn í stjórnina stóð hún föstum fótum til enda kjörtímabilsins.

Það er heldur ekki rétt að forseti Íslands hefði aldrei haft áhrif við stjórnarmyndun, því að Ásgeir Ásgeirsson átti drjúgan þátt í myndun minnihlutastjórnar Sjálfstæðisflokks og Alþýðuflokks í desember 1958.

Eftir kosningarnar 1974 var Ólafur Jóhannesson með stjórnarmyndunarumboðið og leiddi stjórnarmyndunarviðræður við Sjálfstæðisflokkinn.

Þær enduðu hins vegar með því að Geir Hallgrímsson varð forsætisráðherra og var sagt í hálfkæringi að Óli Jó hefði myndað stjórnina fyrir hann.

Steingrímur Hermannsson varð forsætisráðherra í ríkisstjórninni 1983 þótt Framsóknarflokkurinn væri snöggt um minni en samstarfsflokkurinn.

Það lítill munur var á fylgi Sjálfstæðisflokks og Framsóknarflokks 2013 að það var engin goðgá að formaður Framsóknarflokksins fengi umboðið eftir fágæta fylgisaukningu hans.

Hins vegar má spyrja þeirrar spurningar hvort staðan væri önnur nú ef Bjarni Benediktsson hefði orðið forsætisráðherra.

Hann var límið sem hélt núverandi stjórn saman og óvíst er að uppljóstranirnar úr Panamaskjölunum hefðu haft sömu áhrif og þau höfðu ef Sigmundur Davíð hefði til dæmis verið fjármálaráðherra. 

Forsetinn myndar ekki stjórnina

Erfitt að áætla fylgi Pírata.

Í þeim kosningum, sem Píratar hafa tekið þátt, hefur reynslan verið sú, að mun færri hafa haft fyrir því að fara á kjörstað til að kjósa þá heldur hafa sagst styðja þá í skoðanakönnunum. 

Þessu veldur að fleiri í þeirra röðum eru heillaðir af netheimum en meðal stuðningsfólks annarra framboða og myndu því vera með meira fylgi ef þeir kysu á netinu. 

Þótt þessu "netheimafólki" fjölgi líklega um á að giska 5% á hverju kjörtímabili sýnist líklegt að allt að helmingur þeirra, sem segjast myndu kjósa Pírata, séu ekki netheimafólk heldur fólk sem kosið hefur aðra flokka fram að þessu. 

Þá snýst spurningin um það hvort hik komi á þetta fólk að kjósa Pírata þegar í kjörklefann er komið. 

Píratar eru glúrnir eins og sést á því að þeir hafa þegar skipað þrjá fulltrúa sína til að fara með umboð til stjórnarmyndunar ef til slíks kemur. 

Ég hef kynnst nógu mörgu af áhrifafólki innan þeirra raða til þess að sjá, að þar er á ferð klárt og efnilegt fólk, sem virðist ákveðið í að verða "stjórntækt".  

Staða þeirra yrði sterkari í ríkisstjórn en í borgarstjórn Reykjavíkur ef þeir halda hinu mikla fylgi sínu. 

Sjö flokkar á þing

Eitt mesta þarfaþingið, Reykjanesfjallgarðurinn, getur breytt miklu.

Á korti veðurfræðings í sjónvarpinu i´kvöld mátti sjá að aðal regnsvæðið, sem spáð er, muni ekki ná til Reykjavíkur og þegar þetta er párað á öðrum tímanum í nótt, er ekki komin hin mikla rigning sem spáð er. 

Á vefnum vedur.is er spá 23ja millimetra heildarúrkomu á næsta sólarhring, sem þætti ekki í frásögur færandi á Kvískerjum. 

Ástæðan er eitthver mesta þarfaþing Reykjavíkur, Reykjanesfjallgarðurinn. Hann rís upp í 6-700 metra hæð á stórum kafla og rífur mesta rakann niður þegar hann steypist þar yfir í hvössum sunnan, suðaustan og austanáttum. 

Þess vegna eru veðurskilyrði umtalsvert betri á Reykjavíkurflugvelli en á Keflavíkurflugvelli, vegna þess að sá síðarnefndi er berskjaldaður fyrir rakri suðaustanátt. 

Áhrif fjallgarðsins eru ekki öllum ljós, sem hafa fjallað um Reykjavíkurflugvöll, eins og til dæmis áhrifum fjallgarðsins á flugvallarstæði í Hvassahrauni, sem er skapa mikla ókyrrð í hvassri suðaustan- og austanátt. 

En sú vindátt er algengasta vindáttin í Reykjavík og flest hvassviðrin koma úr þeirri átt. 

Hlálegasta er þegar menn halda að flugvöllur á Selfossi gæti gert sama gagn og Reykjavíkurflugvöllur sem varavöllur þegar lokað er vegna veðurs í þessari vindátt á Keflavíkurflugvelli. 

Selfoss er nefnilega á svipuðu veðursvæði og Keflavík í þessari vindátt. 

Slökkviliðið við öllu búið

Er heitið tvíþekja svona vont heiti?

Eftir að heitið tvíþekja hefur verið notað yfir fyrirbæri, sem á ensku kallast biplane, í næstum heila öld, ber svo við að allt í einu er farið að tala um tvívængju. 

Það fellur þó ekki undir áhrif úr ensku eins og lenska er hér, því að ekki er minnst á væng í enska heitinu. 

Því yrði útrýming hins ágæta heitis tvíþekja illskiljanleg. 

Nú þegar er skipulega verið að útrýma heitunum skólasystkin, skólafélagi, skólabróðir, skólasystir, bekkjarsystkin, bekkjarfélagi, bekkjarsystir, bekkjarbróðir og sessunautur, alls níu ágætum orðum, með því að taka upp heitið samnemandi, sem er ekki einasta alveg óþarft orð, heldur getur misskilist, því að kennarar eru þá með samnemendur sína. 

Það kann að vera dýpri skýring á tilurð þessara nýju orða en frjór sköpunarmáttur blaðamanna, og sú skýring er vonandi ekki sú rétta, sem sé, að það vanti í orðaforða þeirra og að þeir bjargi sér með því að búa til eigin heiti. 

En grunurinn varðandi ástæðuna fyrir þessu fer vaxandi. 

Fljúga tvívængjum yfir alla Afríku

Forkastanlegt sleifarlag og áhætta.

Á sama tíma og fjöldi ferðamanna á Íslandi hefur rokið upp með hraða eldflaugar, á hraði snigilsins við aðgerðir okkar sjálfra til þess að taka á þeirri óviðunandi áhættu, sem átroðningur og ringulreið skapa á ferðamannaslóðum. 

Þessi áhætta felst í því að stefnt sé í nýtt hrun þegar sleifarlagið, græðgin og kæruleysið fer að hefna sín. 

Því að lögmál viðskiptavildar lætur ekki að sér hæða ef viðskiptavinunum er misboðið. 

En það er gert með því að bjóða upp á umgegni og ástand ferðamannastaða sem er þjóðarskömm og upp á ofurgræðgi í verðlagningu sem hefnir sín líka. 

Gjáin illa farin vegna ágangs

Hverjir hafa verið varðhundar kennitöluflakksins?

Karl Garðarsson Alþingismaður lagði fram frumvarp um að taka í alvöru á því skaðræði sem kennitöluflakkið er, en frumvarpið féll í grýtta jörð hjá viðskiptaráðherra og Sjálfstæðisflokknum. 

Korteri fyrir kosningar segist Bjarni Benediktsson allt í einu vera andvígur kennitöluflakkinu. 

Um það gildir það sama og svo margt annað, sem lofað er þessa dagana, að það voru næg tækifæri til að aðhafast í málinu löngu fyrr, og því augljóst, að ekki er meira að marka loforðin nú en þau sem svikin voru eftir kosningarnar 2013.  

Boðar skýrslu um umfang aflandsfélaga

Túrbínutrixið lifi!

Sjaldan hefur sést jafn einbeittur vilji til að negla niður nýjasta afbrigðið af túrbínutrixinu frá 1970, sem felst í nýjum háspennulínum til Bakka við Húsavík.

Í þetta skiptið á að horfa fram hjá arfa slæmri meðferð virkjanamanna í sveitarstjórnum nyrðri varðandi framkvæmdaleyfi, stjórnsýslulög og náttúruverndarlög með því að setja sérstök lög sem upphefja mistök sveitarstjórnarmannanna og offors línulagnarmanna.

Ætlunin var svipuð í upphafi Laxárdeilunar hér um árið en trixið var einfaldlega of svæsið til þess að það gæti gengið í gegn vegna afar slæmrar málsmeðferðar virkjanamanna gagnvart undirbúningi og lagalegan ramma.

Svipað virðist vera að gerast nú, og það er erfitt að hugsa sér að menn ætli sér virkilega að keyra málið á háhraða í gegn fyrir kosningar.

Mistakameistararnir nyðra verða að axla ábyrgð á gerðum sínum og eðlilegara er að taka málið fyrir eftir kosningar.    

Þingi frestað vegna Bakkamálsins