Hvers vegna ekki fyrr fimm stjörnu hótel?

Loksins hefur fyrsta fimm stjörnu hótel landsins litið dagsins ljós. Að vísu ekki heil bygging heldur efsta hæð hótels.

Nú hafa verið ýmis svo góð hótel á Íslandi að ætla hefði mátt að eitthvað af þeim hlyti að vera fimm stjörnu.

Ein skýringin á þessu , sem ég hef fengið hjá eiganda afar góðs hótels, er sú að það sé betra að vera með fjögurra stjörnu hótel, sem er svo gott, að gestirnir verða undrandi yfir því að stjörnurnar séu ekki fimm og gefa hótelinu því gott orðspor, heldur en að vera með fimm stjörnu hótel, þar sem lítið má út af bregða til að hótelið missi þessa einu stjörnu, sem gerir gæfumuninn.

 

Fyrsta 5 stjörnu hótel landsins

Boxaravélin er 120 ára.

Subaru-verksmiðjurnar eiga allt gott skilið fyrir tryggðina við boxaravél sína, sem nú er hálfrar aldar gömul. Kostirnir eru margir, lítil fyrirferð á lengd og hæð og stuttur sveifarás, lágur þyngdarpunktur, jafn gangur og léttleiki. Boxaravélar, línu-sexur og V-12 eru einu bílvélarnar sem ekki þurfa titringsjöfnun,

Meðal gallanna er að strokkhausarnir eru fleiri en einn. og strokkarnir.

Á gamla Subaru-bílnum mínum liggur varadekkið ofan á vélinni.  

Boxaravélin dregur nafn sitt af því að bullurnar hreyfast á þann hátt, að það likist handleggjahreyfingum hnefaleikamanna.

En boxaravélin í grunngerð sinni er miklu eldri, allt frá dögum Karl Benz 1896.

Sú langfrægasta er vélin í Volkswagen Bjöllunni, sem framleidd í hvorki meira né minna en hátt á þriðja tug milljóna eintaka´og hafa verið í Porshce bílum frá upphafi til þessa dags.

Citroen Bragginn, 2CV, Ami, Dyane og Mehari, og Panhard Dyna voru með tveggja strokka boxaravélar og Citroen GS með fjögurra strokka. Framleiðsla á Bragganum hófst 1948.  

Frá 1959-69 var sex strokka loftkæld boxaravél í bandaríska bílnum Chevrolet Corvair og í meira en 70 ár hefur meirihluti hreyfla í litlum flugvélum verið boxarahreyflar.

BMW 600 og 700 voru með tveggja strokka boxaravélar og BMW vélhjól alla tíð, þó ekki allar gerðir þeirra.

Munurinn á Subaru-vélinni og Volkswagen vélinni er meðal annars sá, að Subaru-vélin er vatnskæld en Volkswagen-vélin er loftkæld.

En fyrsta fjöldframleidda vatnskælda boxaravélin var ekki Subaru-vélin heldur vélin í Lloyd Arbella fjórum árum fyrr.  

Núna eru bæði Subaru-vélin og Porsche-vélin vatnskældar og auk þess með yfirliggjandi kambása og fjóra ventla á hverjum strokk.

Það hefur lengi loðað við boxaravélar að vera í eyðslufrekari kantinum en það hefur dregið úr því með sífelldri þróun vélanna, sem framleiðendur Subaru og Porsche mega verið stoltar af.  

 

Fagnar 50 ára afmæli Boxervélarinnar

Ein af ástæðum þess að leggja ekki embættið niður.

Í upphafi starfs stjórnlagaráðs voru ýmsar tillögur varðandi embætti forseta Íslands skoðaðar.

Ein þeirra var að leggja embætti forseta Íslands niður og önnur að skoða svipað fyrirkomulag og í Frakklandi og Bandaríkjunum.

Í starfi ráðsins var reynt að hafa eins mikið samráð og ferlið eins opið og unnt væri og okkur sýndist eftir athugun á forsetaembættinu að líklegt væri að meirihluti landsmanna vildi ekki leggja embættið niður.

Í lokin var niðurstaðan sú að fela forseta áfram valdið úr 26. grein núverandi stjórnarskrár og að hann gæti átt aðild að ákveðnu ferli varðandi val á hæstaréttardómurum, ef slíkt val lenti í ógöngum.

Í báðum tilfellum yrði forsetinn nokkurs konar neyðarhemill en ætti yfirleitt ekki að þurfa að beita málskotsrétti sínum, vegna þess að í stjórnarskránni yrðu ákvæði um þjóðaratkvæðagreiðslur án aðkomu forseta.  

Þótt málskotsrétturinn yrði mun takmarkaðri en nú, fannst Feneyjaefndinni hann geta skapað óæskilegan óróa í samskiptum forseta við löggjafarvald og dómsvald.

Andstæðingar frumvarps stjórnlagaráðs hafa gert mikið úr þessu, en Feneyjanefndin hefði þá líklega gert miklu alvarlegri athugasemdir við núverandi stjórnarskrá, sem gerir eingöngu forsetanum kleyft slíkt málskot, en andstæðingar nýrrar stjórnarskrár mæra þó hástöfum!

Alveg eins og meirihluti þjóðarinnar virðist vilja sinn eina þjóðkjörna embættismann áfram, er ólíklegt annað en að meirihluti vilji líka viðhalda málskotsréttinum.

Að minnsta kosti tveir forsetaframbjóðendur hafa sett á oddinn hjá sér að í stjórnarskrá verði skýr ákvæði, sem tryggi rétt þjóðarinnar til að ráð beint um stærstu mál sín.

En nú stendur yfir mikil herferð eins frambjóðandans og fylgjenda hans til að fá fólk til að efast um að þessir meðframbjóðendur standi við eitt af aðalatriðunum í stefnumálum sínum.

Má það furðu gegna.

Finnst forsetinn skipta máli

"Smáfréttirnar" um ölvaða ökumenn.

Á morgnana má oft heyra smáfréttir um störf lögreglu til dæmis um það hve margir ölvaðir ökumenn hafi verið stöðvaðir eða ökmenn undir áhrifum fíkniefna.

Ljóst er að þetta er toppurinn á ísjakanum, því að miklu fleiri ökumenn í annarlegu ástandi sleppa.

Þessar "litlu" fréttir þýða að í umferðinni á hverjum tíma er fjöldi stórhættulegra ökumanna á ferð.

Helsta hættan við þá er að þeir eru alveg óútreiknanlegir, en tilvist þeirra samsvarar því að fjöldi gangandi vegfarenda sé vopnaður byssum, og skjóti úr þeim út í loftið af handahófi án þess að slasa neinn.

Ölvaðir og uppdópaðir ökumenn eru sérstaklega hættulegir þar sem umferð er hröð og vegurinn með einni akrein í hvora átt.

Ökumenn, sem aka grandalausir inni við vegarmiðju , geta lítið gert ef bíll, sem kemur á móti þeim, sveigir yfir á rangan vegarhelming.

Enn hættulegri eru ökumenn í vímu fyrir gangandi og hjólandi vegfarendur, sem eru algerlega berskjaldaðir ef eitthvað ber út af.

Hlupu í burtu frá vettvangi

Kennitöluflakkið og feluleikurinn eru heilagar kýr.

Frumvarp Karls Garðarssonar um að koma einhverjum böndum á kennitöluflakk hefur fengið dræmar viðtökur hjá ráðandi öflum, sem virðast líta á grunnforsendur þúsunda milljarða taps og dulbúins ráns frá almenningi eins og heilagar kýr.

Í ágætum fréttaskýringum síðustu vikna hér og þar í fjölmiðlum er byrjað að gægjast inn í þann heim sem hefur skapað tvær þjóðir á Íslandi, annars vegar heim almúgans, sem er læstur inni í krónuhagkerfinu og gjaldeyrishöftum, en hins vegar er yfirþjóðin, sem spilar á möguleikana til að flytja sitt fé til aflandsfélaga eða erlendra peningastofnana og fyrirtækja,- gerir jafnvel allt sitt bókhald í erlendri mynt.

Kjöraðstæður fyrir kennitöluflakk

Fylgið hefur streymt til vinstri út frá miðjunni.

Rúmt síðasta ár hefur orðið svipuð breyting á fylgi stjórnmálaflokka hér og í mörgum öðrum Evrópulöndum, fylgið hefur frá miðjunni út á jaðrana til hægri og vinstri.

Í síðustu kosningum fengu Sjálfstæðis- og Framsóknarflokkur samanlagt 49% atkvæða.

Nú hafa þeir 38% eða 11 prósentustigum minna.

Píratar og Vinstri grænir höfðu um 18% samanlagt en hafa nú um 45%. Fylgi þessara tveggja flokka samanlagt hefuru vaxið um hvorki meira né minna en 27 prósentustig og gert gott betur en að tvöfaldast. Þessi 27 prósentustiga fjölgun er svipað að stærð og allt fylgi Sjálfstæðisflokksins.

Í grófum dráttum hefur fylgið streymt til vinstri. Að vísu er ekki hægt að skilgreina Pírata sem hreinan vinstriflokk, en þó frekar þeim megin en hægra megin, enda í stjórnarandstöðu við hægri stjórn.

Vinstri grænir fara langt með að tvöfalda fylgi sitt og þeir eru hreinn vinstri flokkur.

Hvernig í ósköpunum menn fara að því að túlka hreyfinguna í fylgi stjórnmálaflokkanna þannig að taflið sé´snúast við í áttina til hægri er mér hulin ráðgáta.

Árni Páll Árnason telur í blaðaviðtali að Samfylkingin þurfi að færa sig til hægri í litrófinu til þess að ná í fylgi af miðjunni.

Hvaða miðju? Er virkilega svona mikið að atkvæðum að fá úr því miðjufylgi, sem er ekki nema svipur hjá sjón?

Og á sama tíma streymir fylgið frá miðjunni framhjá Samfylkingunni og úr hennar röðum yfir til Pírata og Vinstri grænna.

Taflið er að snúast við

Tenging kynslóðanna.

NASA hét upphaflega Sjálfstæðishúsið fyrir 70 árum og var Sjalli Reykjavíkur um árabil. Um skeið hét staðurinn Sigtún.

Síðasti hluti blómaskeiðs revíanna var þar frá stríðslokum til 1960.

Það er vel ef salurinn verður nú sem svipaðastur því sem hann var í fyrstu.

Það gefur honum sögulegt gildi og tengir saman kynslóðirnar.

Hann hafði þann kost fram yfir Súlnasalinn á Sögu og síðar Broadway í Mjódd og Brodway við Ármúla, að áhorfendur voru nokkurn veginn beint fyrir framan þá sem komu fram á sviðinu, en á hinum þremur stöðunum var helmingur áhorfenda til beggja hliða.

Þegar Victor Borge kom fram í Brodway, sá hann, að helmingur áhorfenda sæu ekki framan í hann, ef hann sneri beint fram.

Hann sneri sér þess vegna fljótlega á ská til vinstri til að fá sjóntengingu við 75% áhorfenda og láta 25% eiga sig.

Síðan sneri hann sér á ská til hægri og prófaði það.

Nú var hann búinn að reyna alla þrjá möguleikana, sneri sér á ská til vinstri og hélt þeirr stöðu að mestu það sem eftir var af dagskrá hans.

Engar svona ráðstafanir þurfti að gera í Sjálfstæðishúsinu. Þar var gott að koma fram.

Endurbyggja Nasa

Það er ekki annað í boði.

Þegar við fæðumst og færir oss yl  /

framtíðar morgunroði  /

við engu´um það ráðum að erum við til,  /

það er ekki annað í boði. /

 

Þótt lánið oft hverfult í lífinu sé 

og lítið oft viðleitnin stoði

likami þinn var þér látinn í té,

það er ekki annað í boði.

 

Ef misgjörðir fortíðar mæða þinn hug.

Þótt mistökin öll við þig loði,

þá bættu þitt ráð, sýndu djörfung og dug, -

það er ekki annað í boði.

 

Ef hlutskipti betra þú þráir oft heitt

og þér ógna hættur og voði

engu um flest af því færðu hér breytt,

það er ekki annað í boði.

 

Hvernig sem vera þín veltur og fer

í veraldar basli og moði

njóttu þess hvers morgundags eins og hann er.

Það er ekki annað í boði.

 

Náttúra landsins er líf og er hel

og lífsnautn að fólk hana skoði,

sköpun og eyðingu, eilífðarvél, -  

það er ekkert betra í boði.

 

Því jarðlífið sveiflast sem hverfanda hvel.

Í heilsunni´er fjör eða doði.  

Er dauðinn þig tekur, þá taktu´honum vel,

þá er ekki annað í boði. 

 

Núið, hver stund, sem þú nota skalt vel, -

fæðing og lífshlaup, - fjörbrot og hel,

upphaf og endir, hluti´af eilífðarvél, -

það er ekki annað í boði.

 

Já, upphaf og endir í eilífðarvél,-

það er ekki annað í boði.

„Styrkurinn felst í að vera óhrædd“

"Það besta, sem ég veit, er að gera ekkert..." sagði Púlli.

Páll Jónsson, sem gekk undir nafninu Púlli, var lífskúnstner, setti svip á lífið í miðbænum í Reykjavík og var þekktur fyrir lífsgleðin og áhyggjuleysi.

Haraldur Á. Sigurðsson leikari kunni fjölda margar skemmtilegar sögur af Púlla, sem hann sagði á héraðsmótum um allt land árið 1959 og ég hef geymt í huga mér síðan.

Nokkrar sögurnar fjalla um leti Púlla.

1. Auglýst var staða forstjóra Tjarnarbíós. Púlli hitti Harald á förnum vegi, sagðist ætla aö sækja um og bað Harald um meðmæli. "Komdu á skrifstofu mína og við græjum þetta,"svaraði Haraldur, en Púlli sagðist ekki nenna því akkúrat á þessu augnabliki og myndi koma siðar.

Þeir hittust nokkrum sinnum á gangi eftir þetta og Haraldur minnti Púlla á meðmælin, en Púlli svaraði: "Det haster ikke eins og Danskurinn segir."

Daginn áður en umsóknarfresturinn rann út hittust þeir enn og aftur á förnum vegi og Haraldur sagði við Púlla: "Nú verðum við að drífa í þessu, umsóknarfresturinn rennur út á morgun."

En Púlli svaraði: "Æ, ég er hættur við."

"Af hverju?" spurði Haraldur.

"Ég fór að hugsa um það að ég gæti kannski verið ráðinn," svaraði Púlli.

 

2. Púlli var eitt sinn spurður hvað væri það besta sem hann gæti hugsað sér. Svarið kom um hæl: "Það besta, sem ég veit, er að gera ekki neitt og hvíla sig svo vel á eftir."

 

3. Púlli var hjartveikur og gekk með pillur á sér, sem skyldi taka umsvifalaust ef hann fyndi fyrir óþægindum. Hann átti bróður í Vík í Mýrdal, sem lést einn góðan veðurdag.

Daginn eftir var Púlli í skemmtilegu kjaftasnakki í Austurstræti þegar hann var að segja skemmtilega sögu en fann fyrir óþægindum fyrir brjóstinu. En hann tímdi ekki að hætta rabbinu í miðju kafi og tók pillurnar of seint.

Þegar einu vini Púlla voru sögð tíðindin af andláti hans sagði hann: "Þetta var Púlla líkt. Ekki nennti hann að fylgja Böðvari bróður sinum til grafar." 

 

Ætlar að gera „ekkert“ sem forseti

Síbylja kollvarpskenningarinnar.

Síðustu misseri hafa andstæðingar nýrrar íslenskrar stjórnarskrár þulið síbylju um það að hún "kollvarpi" íslensku stjórnkerfi. Svo langt hefur verið gengið við að tala frumvarp stjórnlagaráðs niður að fullyrða að með frumvarpinu sé snúið baki við "hinu norræna módeli" og stjórnarskrám í anda þess besta sem gerist í Evrópu.

Þetta er fjarri sanni og í besta falli gróf vanþekking. Nýja stjórnarskráin viðheldur öllum meginþáttum íslenskrar stjórnskipunar, og við samningu hennar var höfð hliðsjón af því besta sem nýjar stjórnarskrár á Norðurlöndum hafa upp á að bjóða auk þýsku stjórnarskrárinnar.

Meira að segja verður stjórnarskrá Dana frá 1953 að teljast nýleg miðað við þá, sem þeir settu 1849 og er enn að meginstofni í gildi hjá okkur, 166 árum eftir að Jón Sigurðsson og hans menn hófu baráttu fyrir Þjóðfundinum 1851 og gerð nýrrar íslenskrar stjórnarskrár.

Ein af röksemdum kollvarpskenningarinnar er sú athugasemd Feneyjanefndarinnar að nýja stjórnarskráin myndi valda óróa og togstreitu á milli þings, framkvæmdavalds og forseta Íslands vegna málskotsréttar forsetans.

En þessi athugasemd Feneyjanefndarinnar á líka við um núverandi 26. grein um málskotsrétt forseta Íslands, sem vel hefur reynst, og margir hinir sömu, sem nú hamast gegn frumvarpi stjórnlagaráðs, hafa mært 26. greinina og beitingu hennar hástöfum!

Hamagangurinn gegn nýrri stjórnarskrá er beint framhald af því þegar Trampe greifi stöðvaði nýja íslenska stjórnarskrá Jóns Sigurðssonar og Þjóðfundarins fyrir 165 árum.  

1851 var það dönsk valdastétt sem hélt vörð um hagsmuni sína, en nú er það íslensk valdastétt.  

 

 

 

Segir Guðna vilja kollvarpa stjórnarskránni