Með fleiri líf en kötturinn.

Ef Kastró kemst aftur til valda á Kúbu verður það enn eitt merkið um það að þessi maður hefur fleiri líf en kötturinn.

Síðan Kastró komst til valda á gamlársdag 1959 hafa hvorki meira né minna en tíu forsetar setið á forsetastóli í Bandaríkjunum og upplýst hefur veirð um tugi ef ekki hundruð tilræða við hann, sem bandaríska leyniþjónustan hefur reynt að koma í framkvæmd. 

Kastró aftur til valda á Kúbu?

Ekkert á að geta skyggt á gleðina.

Það hefur ríkt mikið lán yfir Gleðigöngunni undanfarin ár þegar þess er gætt að að meðaltali eru tveir af hverjum þremur sumardögum rigningardagar á sunnanverðu landinu.

Ég er einmitt að velta vöngum yfir því hvernig ég muni bregðast við því vandamáli sem skapast ef það rignir, en ætla ekki að svo stöddu að segja frá því hvernig stendur á því að rigningin getur skapað mér vandamál. 

Kjörorðið er nefnilega einfalt: Ekkert á að geta skyggt á gleðigönguna! 

Gæti rignt á gesti gleðigöngu

Gott hjá borgarstjóranum.

Heimavöllur borgarstjórans er leiksviðið og því var það vel til fundið hjá honum að koma fram í draggi á opnunarhátíð hinsegin daga.

Stór hluti samkynhneigðra hefur orðið að ganga í gegnum erfiða daga á æviferli sínum og því er það gott að þeir finni fyrir stuðningi þjóðarinnar þegar þeir halda sína árlegu hátíð. 

Þetta gefur góðan tón fyrir framhaldið. 

Óvæntur gestur

"...ekki dísil..." "Snýst um ímyndina."

Tilsvar Jóns Gnarr borgarstjóra um nýja borgarstjórabílinn, sem reyndar er nú aðeins í þriggja mánaða láni, þess efnis að það sé nú munur að þetta sé "ekki dísil..." minnir á það að hér á landi og í Bandaríkjunum ríkir merkileg afstaða gagnvart dísilvélum. 

Aðeins 2,5% bílaflotans ameríska eru dísilbílar en helmingur allra bíla í Evrópu og athyglisvert er hvernig menn skauta yfir kosti dísilbíla í umræðunni.

Sem dæmi nefni ég forsetabílinn okkar en mér gafst einnig tækifæri til að ræða það mál stuttlega við forsetann þegar ég hitti hann nýlega. 

Ég rakti fyrir honum að Lexus-tvinnbíll forsetaembættisins eyddi ekki minna eldsneyti en sama stærð af BMW 7 dísilbíl sem væri jafn hraðskreiður, jafn viðbragðsfljótur og gerði alla hluti jafnvel, hvað snerti þægindi og notagildi. 

Hins vegar væri tvinnbíllinn undanþeginn gjöldum vegna þess að hann teldist vistvænn og væri hann þó með mun flóknari og dýrari vélbúnaði en samsvarandi dísilbíll og að því leyti til dýrari. 

Þegar við bætist afslátturinn á opinberum gjöldum af tvinnbílinn væri hann þar með í raun mun dýrari fyrir ríkissjóð en samsvarandi dísilbíll. 

"Já, en þetta snýst um ímyndina" svaraði forsetinn og hitti naglann á höfuðið með svo snjöllu og hreinskilnu tilsvari sem ég gef honum stórt prik fyrir. Með þessu átti forsetinn við að íslensk stjórnvöld hafa viðurkennt tvinnbíla sem vistvæna en ekki dísilbíla.

Jón Gnarr viðurkennir í viðtalinu við mbl. is að hann hafi ekki farið yfir allt dæmið og er að því leyti jafn hreinskilinn og forsetinn. 

Það vantar margt inn í dæmið svo sem það að tveggja tonna bíll er næstum því tvöfalt dýrari í viðhaldi og fjármagskostnaði en helmingi léttari bíll, hvort sem knúinn er á vistvænan hátt eða ekki. 

Jón Gnarr er sjálfum sér samkvæmur að því leyti til að hann lýsti því yfir að hann byði sig fram í borgarstjóraembættið á þeim forsendum að fá þægilegt, skemmtilegt og vel borgað starf. 

Að því leyti til lá það í orðum hans að hann viðurkenndi það sem aðrir leyndu fyrir kjósendum meðal annars það að honum finnst flott að láta aka sér um á sem stærstum og dýrustum bíl. 

Það væri því úr takti við ummæli hans í kosningabaráttunni ef hann færi að láta sjá sig á "hallærislegum" minni bíl. 

 

 

 

Ekki hallærislegur á vistvænum bíl

Hver eru áhrif virkjana jökulfljóta?

Í hinni merku bók Guðmundar Páls Ólafssonar um Þjórsárver er athyglisverð umfjöllun hans um áhrif þess að aurframburður jökulfljóta hættir að berast til sjávar og fellur í staðinn til botns í miðlunarlónum.

Þessu atriði hefur verið lítið sinnt hér á landi, miklu minna en maður hefði haldið að nauðsynlegt væri miðað við þá hagsmuni sem  í húfi eru. 

Í tengslum við Kárahnjúkavirkjun var beðið um álit á áhrifum þess að níu milljónir tonna af aur féllu til botns í Hálslóni í stað þess að berast til sjávar út í Héraðsflóa og var tíminn svo naumur og fjárveitingin svo léleg til þess arna að vafasamt er að neitt gagn hafi verið af þessu. 

Margar spurningar vakna í þessu sambandi. Getur verið að aukið aurmagn, sem fljótin fluttu til sjávar á hlýindaárunum 1920 til 1965, hafi átt þátt í því að þorskstofninn óx við landið? 

Getur einnig verið að kólnun á árunum 1965 - 1995 ásamt því að aur í Þjórsá minnkaði vegna virkjana hafi átt þátt í því að þorskstofninn stórminnkaði á þessum árum? 

Áhrif eldgossins á plöntusvif

Ráða strax.

Eðli máls og aðstæður ættu að ráða fremur en lagabókstafur við að velja í starf umboðsmanns skuldara.

Nýbúið er að fara yfir þær umsóknir sem bárust og það flýtir mjög fyrir að taka aðkallandi ákvörðun, sem enga bið þolir. 

Líkurnar á því að einhverjir aðrir sæki um en gerðu í upphafi hljóta að vera litlar og vega léttara en hin brýna nauðsyn að öflug manneskja taki þegar í stað til hendinni við brýnt verkefni. 

Telur að auglýsa þurfi að nýju

Gömul villa kemur í hugann.

Flestir eiga einhverjar bernskuminningar um að hafa villst. Ein slík kemur upp í hugann í sambandi við það þegar átta ára drengur týndist við Norðurá í gær.

Móðir mín hafði farið til tannlæknis við Óðinstorg og ég beið frammi á biðstofu á meðan. 

Líklega hef ég verið um fjögurra ára gamall. Yfirleitt var ég þekktur fyrir það á þessum bernskuárum að vera ótrúlega rólegur og sitja kyrr við að dunda eitthvað eða spekúlera þegar ég hún setti mig á stól eða í sófa þegar hún heimsótti vinkonur sínar og frænkur. 

En í þetta skipti var eitthvað utan dyra sem heillaði mig og ég fór út í að mér fannst afar stuttan göngutúr. 

En ég gleymdi mér aðeins og var fyrr en varði orðinn rammviltur og gekk í angist um göturnar í grenndinni. Aftur og aftur kom ég þó á svipaðar slóðir og Óðinstorg en aldrei á réttan stað og mér leið alveg óskaplega illa, bæði yfir því að vera týndur og ekki síður yfir því að hafa strokið út um dyrnar á biðstofunni. 

Að lokum fór ég að læra á umhverfið og tókst að komast til baka á biðstofuna og setjast þar áður en mamma kæmi loksins út frá tannlækninum. 

Auðvitað þorði ég ekki fyrir mitt litla líf að segja henni frá þessu og hef aldrei sagt nokkrum frá þessu fyrr en nú.  Það var mikið. 

Átta ára fór villur vega

Bílveltur urðu og verða...

Nú nýlega komst tískubullið "bílvelta varð" (í staðinn fyrir að segja einfaldlega "bíll valt") á nýtt stig hér á mbl. is þegar skrifað var "bílveltur urðu."

Hliðstæða væri að segja "tveir húsbrunar urðu" í stað þess að segja "tvö hús brunnu", - segja "tvær afsagnir urðu" í stað þess að segja "tveir sögðu af sér" eða að segja "tvö lærbrot urðu" í stað þess að segja "tveir lærbrotnuðu."

Nú kemur "bílvelta varð" enn einu sinni í frétt hér og um það hef ég aðeins þetta að segja: 

 

Bílveltur urðu og urðu, - 

það orðalag vekur furðu

en óstöðvandi 

er þessi fjandi

á okkar landi. 

 

Já, bílveltur verða og verða

og vitleysan fer sinna ferða. 

Svo arfaslakt er það, - 

þú undireins sérð það, - 

að bílveltur verða að verða.

 

Í felum á Klambratúni

Best var verri.

George Best var einhver mesti knattspyrnusnillingur sögunnar en málaði bæinn oft rauðan og gerði forráðamenn Manchester gráhærða.

Rooney er það ungur að þetta lítur svosem ekki vel út hjá honum, en hegðun hans er þó áreiðanlega smámunir miðað við það sem Best afrekaði á svallsviðinu enda eyðilagði hann feril sinn og líf með óreglunni og lést um aldur fram. 

Ummæli hans um það hvernig hann sólundaði öllum auðæfum sínum lifa: "Ég eyddi miklum peningum í vín og konur og restinni í bölvaða vitleysu."

Vonandi fer ekki eins fyrir Rooney. 

Rooney búinn að koma sér í vandræði

Bætist við fyrri vísbendingar.

Ég hef áður bloggað um mikla rannsókn sem tímaritið Time greindi frá fyrir rúmlega fimmtán árum með þeim niðurstöðum að konur laðist að karlmönnum sem hafa vald fremur en að aldurinn skipti máli.

Þess vegna njóti hermenn og menn í einkennisbúningum kvenhylli.

Ég greindi frá því í þessu bloggi mínu að þetta gæti átt við mitt fjölskyldumynstur því að fjögur af sjö börnum okkar hjóna fæddust um það bil níu mánuðum eftir jól og áramót á þeim árum þegar ég klæddist jólasveinabúningi daglega.

Nú eru það nýjar rannsóknir sem renna frekari stoðum undir þetta því að það, að rauði liturinn sé aðlaðandi í augum kvenna, passar alveg við þetta hvað snertir rauðasta einkennisbúning allra búninga, jólasveinabúninginn !  Að ekki sé nú talað um að á þessum árum var ég með eldrautt hár ! 

Konur laðast að rauðum körlum