Siðfræði forréttindahópsins.

Siðfræði forréttindahópa byggist oft á því að vegna þess hve fáir einstaklingar séu í viðkomandi hópum muni þjóðfélagið ekkert um að lofa þeim að njóta auðsöfnunar og jafnvel að komast upp með að borga hlutfallslega minna til þjóðfélagsins en aðrir.

Nú virðist sem heill stjórnmálaflokkur í Bandaríkjunum ætli að halda þessari siðfræði fram, og það svo fast, að orðið "stríð" er nefnt um það að dirfast að snerta við þessu. 

Ég var rétt í þessu að blogga um þetta og varla búinn að setja punktinn við næsta blogg á undan þessu, þegar "stríðsyfirlýsing" öldungardeildarþingmanns repúblikanaflokksins þrumar um öldur ljósvakans. 

Sakar Obama um stéttastríð

Republikana vilja hlífa mönnum með 10 millur á mánuði.

Ég man þá tíð þegar Þorvaldur Guðmundsson greiddi hæstu skatta einstaklinga á Íslandi og sagðist gera það með glöðu geði og ekki draga af sér að telja tekjur sínar fram.  Það væri heiður að geta lagt af mörkum til velferðarmála og annarra þarfra málefna.

Nú hefur bandarískur auðkýfingur, sem varla veit aura sinna tal, kvartað yfir því að hann og aðrir slíkir séu látnir sleppa mun billegar en þeir sem minnst bera úr býtum og beðið um að hann og hinir ríkustu séu látnir axla byrðar eins og aðrir þjóðfélagsþegnar. 

Þegar Obama hyggst framkvæmda þetta bregður hins vegar svo við republikanar ætla að leggjast hart gegn þessu. 

Það er ekki eins og Obama ætli að ráðast fólk, sem eigi erfitt með að láta eitthvað af hendi rakna. 

Tekjumarkið samsvarar rúmum tíu milljónum íslenskra króna á mánuði, en það verður greinilega ofraun fyrir menn að samþykkja að eitthvað af því fari í það að taka þátt í því að bregðast við vánni vegna kreppunnar, sem óhjákvæmilega mun verða eitt aðal viðfangsefni þessarar aldar. 

Röksemdin fyrir því að hlífa þeim allra ríkustu og láta þá sleppa eru þekkt: Rétt eins og að í kommúnistaríkjunum áttu menn að verða jafnir en í staðinn urðu sumir jafnari en aðrir, eiga allir í landi frelsisins að vera frjálsir, en í staðinn verða sumir frjálsari en aðrir og ráða því sjálfir, hvort og í hvað þeir þeir ráðstafi auði sínum. 

Reynslan sýnir hins vegar að mikill minnihluti hinna ofurríku tímir því þótt aðrir geri það myndarlega. 

Efnahagshrunið varð vegna þess að yfirgnæfandi meirihluti þeirra ríkustu bruðluðu og yfirspenntu allt af tómri græðgi í að verða enn ríkari.  Nú á að hlífa þeim, svo að þeir geti haldið áfram á sömu braut og áður.

Obama undirbýr hátekjuskatt

Sviplegt fráfall. Hverjum "líkar þetta"?

Ég hef áður sett spurningarmerki við það að þegar fólk vill lesa einhverja frétt á netinu, smelli það við merkið "líkar þetta" þar sem til áherslu er hönd með þumalinn upp í loftið.

Þegar þessi pistill er hripaður sé ég að þrettán manns hafa merkt við það að þeim "líki það" að Kara Kennedy hafi látist sviplega á besta aldri, aðeins 51 árs gömul. 

Það verður að finna eitthvað skárra en "líkar þetta" ef maður vill láta það í ljós að manni finnist frétt þess efnis að hún sé þess virði að lesa hana vel. 

Það er svo hallærislegt að sjá þegar fjöldi fólks gefur út þessa yfirlýsingu: "Líkar þetta" þegar mannslá, slys, hamfarir og aðrar slæmar fréttir dynja yfir. 

Ein úr Kennedyfjölskyldunni látin

Kynþáttamismunun fyrir fæðingu?

Ýmsir fordómar hafa lengi ríkt gagnvart rauðhærðu fólki og sjálfur upplifði ég ýmislegt af því sem krakki þegar stundum var leitað eftir einhverju til að stríða manni á.

Í æskuminningum Hendriks Ottósonar segir hann frá því hvernig rauðhærðir drengir voru hræddir með því að franskir sjómenn sæktust eftir því að klófesta þá og nota þá í beitu. 

Einhverni tíma fyrir langa löngu heyrði ég ávæning af einhverju afbrigðilegu við kynhegðun rauðhærðra kvenna en það er svo langt síðan að ég er búinn að gleyma því í hverju það átti að felast, sem betur fer. 

Upplýst hefur verið að rautt hár sé víkjandi eiginleiki erfðafræðilega séð, og því má furðu gegna ef menn vilja auka á þá mismunun enn frekar með eins konar kynþáttamismunun fyrir fæðingu af hendi sæðisbanka.

Ég finn til mikillar samkenndar með rauðhærðu fólki, nú síðast í gær á ráðstefnu um hjólreiðar, þar sem Jón Gnarr borgarstjóri hélt lokaræðuna. 

Þegar ég hitti Jón í lok ráðstefnunnar tjáði ég honum þessa samkennd og ekki minnkar hún við það að við höfum báðir starfað sem skemmtikraftar, rauðhærðir grínistar.  

 

Sæðisbanki hafnar rauðhærðum

"I am late".

Það er ekki nýtt að stríðni sé beitt gagnvart flugfélagi, sem hefur átt óstundvísi að glíma í lengri eða skemmri tíma.

Á sínum tíma tókst Loftleiðum að hasla sér völl svo um munaði með því að nota hægfara flugvélar á þeim tíma sem þotur voru að ryðja sér til rúms. 

Í fyrstu voru þetta vélar með bulluhreyflum, DC-6B, en síðan Canadair 44 skrúfuþotur. 

Að öðru jöfnu er erfiðara að halda áætlun með hægfara flugvélum á löngum flugleiðum heldur en með hraðfleygum, því að óhagstæðir vindar gera þeim mun meiri usla sem vélin fer hægar. 

Svo óheppilega vildi til að nafnið Icelandic Airlines hægt var að lesa skammstöfunina IAL (Icelandic AirLines) út úr nafni félagsins og láta það standa fyrir I Am Late og fólst í þessu nokkur stríðni. 

Hins vegar skipti þetta farþegana litlu máli, því að félagið bauð lang lægstu fargjöldin yfir Norður-Atlantshafið og þeim viðskiptavinum fjölgaði stöðugt sem að öðrum kosti höfðu ekki efni á því að fljúga yfir hafið. 

„Alltaf seinir“

Hörmulegt slys á "Formúlu eitt flugsins".

Dökka hliðin á bíla- og flugíþróttum eru slysin, sem oft geta orðið hræðileg. Reno flugkeppnin er frægasta keppni af þessu tagi í heiminum og hefur verið það allt frá 1964.

Samkvæmt fréttum sendi flugmaðurinn út neyðarkall áður en hann missti stjórn á vélinni svo hún hrapaði nær lóðrétt niður rétt hjá áhorfendaskaranum við brautina. 

Sama flugvél missti afl í keppninni 1970 en þá tókst flugmaninnum að nauðlenda henni nær óskemmdri. 

Vafalaust verður allt fyrirkomulag og reglur keppninnar teknar til skoðunar eftir þetta hörmulega slys, en ólíklegt er að miklu sé hægt að breyta. 

Það er eðli allrar hreyfingar að henni fylgir hætta og oft því meiri hætta sem hraðinn er meiri.

Flugvélarnar sem att er kappi á í Reno ná allt að 800 kílómetra hraða á klukkustund, en samkvæmt þeim fréttum, sem boris hafa af þessu slysi, virðist það ekki hafa orðið vegna þess að flogið hafi verið of lágt eða hratt, heldur hrapaði vélin eftir ofris í kjölfar þess að hún varð stjórnlaus, hugsanlega vegna vélarbilunar. 

Það á hugsanlega eftir að koma betur í ljós við rannsókn. 

Það er skrýtin tilfinning og ekki beint þægileg að þurfa að bæta á atburði afmælisdags síns þessu slysi ofan á hið hörmulega slys, þegar franska rannsóknarskipið Pourqous pas? strandaði við Mýrar 16. september 1936. 

Hingað til hefur það slys verið eina athugasemdin í íslenskum minnisbókum við þennan dag og mér hefur alltaf fundist það óþægilegt, - hugsað til móður minnar, sem varð 15 ára daginn sem skipið fórst og.  

En svona vegast neikvæðir og jákvæðir hlutir á í lífinu. Við erum fæddir þennan dag, ég, Jón Ársæll Þórðarson (1950) og Artur Björgvin Bollason, - móðir mín hefði orðið níræð í gær og Dagur íslenskrar náttúru er þennan dag. 

Fyrir ári sendi maður mér þá vitneskju í tölvupósti, að 16. september hefðu átta Íslendingar fæðst, allt drengir og allir náðu sjötugsaldri fyrir réttu ári. Það er þó eitthvað til að hugga sig við. 

Þrennt ferst á flugsýningu

Eins og hundar á roði...

Áltrúarmenn eru búnir að hanga á álveri á Bakka eins og hundar á roði síðustu fjögur ár þótt allan tímann hafi legið fyrir hve galið það var að stefna að álveri þar sem þarf að vera með minnst 350 þúsund tonna ársframleiðslu til að bera sig. 

Það þýðir þörf á upp undir 700 megavöttum, sem fjarlægt er að náist að útvega nema virkja öll jarðvarmasvæði í topp og bæta við jökulsánum í Skagafirði, Skjálfandafljóti og jafnvel helmingnum af orku Dettifoss. 

Jafnframt þýddu þessi áform að öll orka Norðurlands og Austurlands yrði sett í hendur einu álfyrirtæki og ekkert eftir handa neinum öðrum. 

Í þessum trylltu áldraumum hefur reiknað með orku frá stækkun Kröfluvirkjunar þótt ekki hafi eftir 35 ára streð verið búið að leysa úr sýruvandamálum þar og einnig hafa menn gefið sér að þrítugfalda orkuframleiðslu Bjarnarflags, sem þegar er farin að skila affallsvatni í átt að Mývatni, svo að tært vatnið í Grjótagjá er orðið gruggugt.

Nú lýsa menn yfir vonbrigðum með það að fundist hafi smærri kaupendur sem bjóðast til að borga hærra orkuverð og skapa fleiri störf á orkueiningu. 

Mikil vonbrigði með rólega og trygga uppbyggingu í stað geggjaðra draumóra orkubruðlsfíkla. 

Álver á Bakka komið út af kortinu?

Glæsilegur verðlaunahafi.

Ég tel að varla hefði verið hægt að finna glæsilegri verðlaunahafa en Ragnar Axelsson á fyrsta Degi íslenskrar náttúru.

Með ævistarfi sínu hefur náð því að vera ekki aðeins að komast í fremstu röð ljósmyndara í heiminum, heldur ekki síður vegna þess að viðfangsefni hans, maður og náttúra á norðurslóðum auk margs annars, hefur verið einstætt á heimsmælikvarða.

Til hamingju minn elsku RAXI!  Knús! 

Glæsilegur verðlaunahafi.

Ég tel að varla hefði verið hægt að finna glæsilegri verðlaunahafa en Ragnar Axelsson á fyrsta Degi íslenskrar náttúru.

Með ævistarfi sínu hefur náð því að vera ekki aðeins að komast í fremstu röð ljósmyndara í heiminum, heldur ekki síður vegna þess að viðfangsefni hans, maður og náttúra á norðurslóðum auk margs annars, hefur verið einstætt á heimsmælikvarða.

Til hamingju minn elsku RAXI!  Knús! 

Ragnar Axelsson hlýtur umhverfisverðlaun

Hefði þurft aðvörun.

Ég gæti sagt hér dramatíska og ótrúlega sögu af 53ja ára gamla sögu af því hvernig malbik getur orðið flughált þegar rignir ofan í ryk á því. Hún er hins vegar of löng, en þegar byrjaði að rigna ofan í öskulagið, sem hafði sest á malbikið á götum Reykjavíkur urðu göturnar mjög hálar.

Þess vegna urðu svona margir árekstrar, - ekki vegna þess eins að göturnar urðu blautar. 

Þessi hálkuskilyrði eru miklu varasamari en hálka sem kemur þegar snjór fellur, því að hún sést alls ekki. 

Hér vantar þekkingu og aðgerðir, því að tugir árekstra og jafnvel slysa eru dýrt spaug. 

Í gamla daga þegar Kanaútvarpið var og hét voru gefin upp skilyrðin á götum herstöðvarinnar. Ég man í svipinn aðeins eftir einni skilgreiningunni: "Alfa limited." 

Þegar minnsti grunur er um að hálla sé á götum borgarinnar en venjulega þarf að vera fyrir hendi mæling við bestu skilyrði, til dæmis hemlunarvegalengd, og síðan gefið upp hve mikið hún hafi aukist. 

Annað, sem er mjög slæmt er það að ekki skuli, eins og víða sést erlendis, vera aðvörunarskilti þar sem alveg nýtt og eggslétt malbikslag hefur verið lagt, einkum þegar rignt hefur. 

Mér er kunnugt um býsna alvarleg slys, sem hafa orðið við slíkar aðstæður hér á landi, og einkum eru svona skilyrði hættuleg fyrir vélhjólafólk. 

Mörgum varð hált á bleytunni