Kílómetrar og mínútur.

Mörg athyglisverð dæmi má nefna varðandi hraða og tíma. Til dæmis kemur í ljós þegar bornar eru saman tvær umtalaðar styttingar á hringveginum, að 16 kílómetra stytting með Vaðlaheiðargöngum styttir ökutímann minna heldur en 14 kílómetra stytting við Blönduós sem auk þess er hugsanlega allt að 7-10 sinnum ódýrari.

Ástæðan er sú að 70 km hámarkshraði verður í Vaðlaheiðargöngunum en 90 km hámarkshraði á hugsanlegri Húnavallaleið. 

Þar að auki myndi Húnavallaleið væntanlega verða lögð þannig framhjá hugsanlegum nýjum þjónustustað við innann landamerkja Blönduósbæjar við Fagranes í Langadal að ekki þyrfti að hægja á sér frekar en gert er þegar ekið er framhjá Staðarskála. 

Hins vegar er 50 kílómetra hámarkshraði á meira en kílómeters kafla á núverandi kafla hringvegarins þar sem hann liggur í gegnum Blönduós. 

Lagning hringvegarins á nýjum stað um land Blönduósbæjar er líklega hagkvæmasta vegaframkvæmd, sem nokkurn tíma hefur verið hægt að framkvæma á Íslandi.

En auðvitað lítur út fyrir það að aldrei verði hægt að hrinda því þjóðþrifaverki í verk ! 

 

Vilja lækka hámarkshraða

September í nóvember.

Íslenski veturinn byrjar samkvæmt almanakinu seint í október og honum lýkur seint í apríl. Hann er um sex mánuðir og þar af er skammdegið rúmur helmingurinn.

Lengd skammdegisins mun ekki breytast um mínútu en ár eftir ár upplifum við það nú að veturinn hefur styst um einn til tvo mánuði flest árin. 

Fyrirsjáanlegt er að það mun varla verða hvít jörð og vetrarsnjóar að falla hér í Reykjavík fyrr en í lok nóvember og það gerist æ fleiri ár að veturinn komi seint og það vorar að sama skapi snemma. 

Í september er meðalhiti í Reykjavík 7,4 stig og í nóvember 1,1 stig, en þessi nóvember verður ekki fjarri venjulegum september og víðsfjarri venjulegum nóvember. 

Rétt eina ferðina enn glymja götur Reykjavíkur að negldum hjólbörðum vikum saman til þess eins og búa til sleipa tjöru sem berst upp á glugga bílanna og verður að slæmu ryki á þurrum dögum. 

Þessar vikurnar valda þessi dekk aukinni slysahættu, því að þau hemla verr á tjöruhálum götum en venjulegir hjólbarðar. 

Lengd dagsins á þessum tíma í nóvember er álíka og í lok janúar og það er næstum því súrreal að slíkt skammdegi skuli vera í svipuðu veðri og er oft síðsumars. 

Gott er að gleðja sig við það og persónulega er ég hamingjusamur með það að í suðlægu áttirnar sem ríkja nú viku eftir viku eru staðviðri hvað snertir það að ég þurfi ekki frekar en ég vil að vera að þvælast milli Reykjavíkur og Selfoss til þess að snúa kyrrsettri FRÚnni á Selfossflugvelli. 

Glittir í vetrarveður